1 Kɔrɛntɩ 2
2
Pɔɔlɩ susaa se pakam Krɩstʋ kaamaŋkaɣ yɔɔ
1Taabalaa, alɩwaatʋ ndʋ́ mɔnkɔm mɩ-tɛ se meheyi-mɩ Ɛsɔ tɔm ndʋ́ tɩwɛ mɛsaɣ tɛɛ yɔ, pɩtɛkɛ tɔm sɔsɔtʋ natʋyʋ yaa lɔŋsɩnɖɛ sɔsɔɖɛ naɖɩyɛ meheyini-mɩ-tʋ. 2Mbʋ́ pʋyɔɔ yɔ, pʋcɔ mɔnkɔɔ mɩ-tɛ lɛ, manɖʋwa se alɩwaatʋ ndʋ́ mɛwɛɣ mɩ-tɛ yɔ, maaheyiɣ-mɩ natʋyʋ nɛ pɩtasɩnɩ Yesu Krɩstʋ tɔm. Kɔzɩkɔzɩ sɩm mbʋ́ ɛsɩbɩ kaamaŋkaɣ yɔɔ yɔ pʋ-tɔm. 3Man-tɩ tɩŋa maawɛʋ mɩ-cɔlɔ yɔ, mɛwɛ ɛjandʋ taa nɛ sɔɔndʋ kpaɣ-m pɩtɩɩfɛyɩ nɛ menseliɣ. 4Monsusaɣ-mɩ Ɛsɔtɔm lɛ, pɩtɛkɛ ɛyáa lɔŋsɩnɖɛ monsusaɣnɩ-mɩ-tʋ se mawabɩnɩ-mɩ. Ɛlɛ́, Fezuu Kiɖeɖeu ɖoŋ wɩlɩnɩ-mɩ se tɔm ndʋ́ monsusuu yɔ, tɩkɛ toovenim. 5Ḿbʋ́ yebina nɛ ɩwɛnɩ lidaʋ Ɛsɔ ɖoŋ yɔɔ. Ɛlɛ́, pɩtɛkɛ ɛyáa lɔŋsɩnɖɛ yɔɔ pɩtɩŋnaa.
Ɛsɔ lɔŋsɩnɖɛ tɔm
6Ŋgʋ́, lɔŋsɩnɖɛ tɔm ɖisusuu ɛyáa mbá papɩ Ɛsɔ nʋmɔʋ taa siŋŋ yɔ. Ɛlɛ́, pɩtɛkɛ kedeŋa ñɩma lɔŋsɩnɖɛ yaa kedeŋa awiya mbá pɔkɔŋ labʋ asayʋʋ yɔ pa-ñɩnɖɛ. 7Ɛsɔ lɔŋsɩnɖɛ nɖɩ́ ɖɩɩwɛ ɛyáa mɛsaɣ tɛɛ yɔ, ɖɩ-tɔm ɖisusuu. Tɩ-taa wɛ cukaŋ. Pʋcɔ Ɛsɔ la kedeŋa lɛ, ɛɛɖʋwa se pɩtɩŋnɩ ɖɩ-yɔɔ nɛ ɖɩwɛɛ e-koboyaɣ taa. 8Kedeŋa awiya taa nɔɔyʋ tasɩ lɔŋsɩnɖɛ ńɖɩ́. Mbʋ́ pʋyɔɔ yɔ, yee paasɩm-ɖɩ yɔ, pataaka Kɩpaɣlʋ weyi ɛtɩnɩ koboyaɣ yɔ kaamaŋkaɣ yɔɔ. 9Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Mbʋ́ ɛyʋ
tana wiɖiyi kaʋ
yaa ɛtanɩɩ yɔ,
mbʋ́ ɛyʋ tamaɣzɩ pʋ-yɔɔ wiɖiyi kaʋ yɔ,
toovenim lɛ, ḿbʋ́
Ɛsɔ ñɔɔzaa nɛ
ɛsɩɩ mbá pɔsɔɔlɩ-ɩ yɔ.»
10Đa Ɛsɔ tɩŋnɩ e-Fezuu Kiɖeɖeu yɔɔ nɛ ɛwɩlɩ-pʋ. Toovenim lɛ se Fezuu Kiɖeɖeu sɩm pɩtɩŋa payɩ, halɩ pɩkpɛndɩnɩ mbʋ́ pʋwɛ ɖooo Ɛsɔ taa yɔ. 11Apɩzɩɣ ɛtɩlɩ mbʋ́ pʋwɛ lɛlʋ taa yɔ? Ɛlɛ́, paa weyi ɛ-maɣmaɣ ɛ-kalɩzaɣ tɩlɩɣnɩ mbʋ́ pʋwɛ ɛ-taa yɔ. Ḿbʋ́ ɖɔɖɔ mbʋ́ pʋwɛ Ɛsɔ taa yɔ, nɔɔyʋ ɛɛpɩzɩɣ ɛtɩlɩ-pʋ nɛ pɩtasɩnɩ Ɛsɔ ɛnʋ ɛ-maɣmaɣ e-Fezuu. 12Ŋgʋ́ ɖa lɛ, pɩtɛkɛ kedeŋa fezuu paha-ɖʋ. Ɛlɛ́, Ɛsɔ hanɩ-ɖʋ e-Fezuu Kiɖeɖeu se ɖɩpɩzɩ ɖɩtɩlɩ ɛ-ñɩm mbʋ́ paha-ɖʋ falaa yɔ. 13Đɩɩyɔɔdʋʋ pʋ-tɔm nɛ tɔm ndʋ́ kedeŋa lɔŋsɩnɖaa wɩlɩɣ yɔ. Ɛlɛ́, ndʋ́ Fezuu Kiɖeɖeu wɩlɩɣ yɔ ɖɩyɔɔdʋʋna. Pʋ-yɔɔ ɖɩlɩzɩɣ kʋ-tɔm ńdʋ́ tɩ-tɔbʋʋ mbá Ɛsɔ ha-wɛ-kʋ yɔ.
14Ɛlɛ́, mbá ɛtaha-wɛ-kʋ yɔ, paapɩzɩɣ petisi toovenim tɔm ndʋ́ kiheyiɣ ɛyáa yɔ. Pamaɣzɩɣ se tɩkɛ kɩmɛlɛndʋ tɔm. Paapɩzɩɣ panɩɩ-tʋ. Mbʋ́ pʋyɔɔ yɔ, mbá Ɛsɔ ha-wɛ e-Fezuu Kiɖeɖeu yɔ pe-ɖeke papɩzɩɣna panɩɩ tɩ-tɔbʋʋ. 15Mbá ɛha-wɛ-kʋ yɔ, papɩzɩɣ patɩlɩ mbʋ́ pʋwɛ ɖeu yaa mbʋ́ pɩfɛyɩ ɖeu yɔ. Nɔɔyʋ ɛɛpɩzɩɣ ɛkpɛzɩnɩ-wɛ. 16Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Asɩm Kɩpaɣlʋ lɩmaɣza?
Apɩzɩɣ ɛtasɩ-ɩ tɔm?»
Ŋgʋ́ ɖa yɔ, ɖɩmaɣzɩɣ ɛzɩ Krɩstʋ maɣzʋʋ yɔ.
Currently Selected:
1 Kɔrɛntɩ 2: KABI
Highlight
Share
Copy
Want to have your highlights saved across all your devices? Sign up or sign in