1 Kɔrɛntɩ KAJALAƔ TƆM
KAJALAƔ TƆM
Ɛsɔtɔm susuu nʋmɔʋ naalɛ ñɩŋgʋ ŋgʋ́ Pɔɔlɩ ɖɔm-kʋ yɔ, kɩ-taa ɛɖʋ Kɔrɛntɩ Krɩstʋ ŋgbɛyɛ. Kɔrɛntɩ kɛ Grɛɛsɩ ɛjaɖɛ taa tɛtʋ sɔsɔtʋ natʋyʋ. Tɛtʋ ńdʋ́, tɩɩwɛnɩ ñɩm sakɩyɛ mbʋ́ pʋyɔɔ yɔ, tɩɩwɛnɩ mɛlɛnaa ɖɩsɩŋɩyɛ naalɛ. Ɛlɛ́, ɖɩ-taa kʋñɔndɩnaa nɛ yomaa kaaɖɔwa ɖɔɖɔ. Ɛyáa sakɩyɛ lakaɣ yem yem.
Alɩwaatʋ ńdʋ́ tɩ-taa, Kɔrɛntɩ ñɩma tɩŋaɣ Ɛsɔ nɩmaŋ ndɩ ndɩ nɛ palakɩ yem yem. Mbá papɩsɩ Krɩstʋ ñɩma yɔ, paatɩŋ Ɛsɔ nɩmaŋ ɩnɩ ɩ-taa nɩɩyɩ nɛ pʋcɔ pɛlɛɣzɩ pa-laŋa.
Pɔɔlɩ nɩ Kɔrɛntɩ ñɩma ḿbá pa-lakasɩ ńzɩ́ sɩ-tɔm (ɩkalɩ 1.11 nɛ 7.11 taa). Mbʋ́ pɩcɛyɩɣ Krɩstʋ ñɩma peeɖe yɔ, pʋɖɔwa. Pa nɛ mbá patɩŋɩɣ Ɛsɔ nɩmaŋ lɛɛŋ yɔ, paanɩɣnɩ ɖama wezuu caɣʋ paɣtʋ yɔɔ. Pʋyɔɔ Pɔɔlɩ ma-wɛ ɛ-kajalaɣ takayaɣ se eloli-wɛ, nɛ ɛkɛdɩ-wɛ Ɛsɔ paɣtʋ.
Kpaɣnɩ ñʋʋ 1 nɛ pɩsɩɩnɩ 4 ñɩŋgʋ taa, Pɔɔlɩ yɔɔdʋʋ Kɔrɛntɩ Krɩstʋ ñɩma, nɛ ɛyáa mbá posusi-wɛ Ɛsɔtɔm yɔ, pɔ-tɔm. Paanɩɣnɩ ɖama nɛ pɛtɛyɩ Kɔrɛntɩ Krɩstʋ ŋgbɛyɛ. Paa weyi lɛ, ɛɖɔŋ weyi eheyi-i Ɛsɔtɔm yɔ, ɛ-paɣtʋ yɔɔ ɖeke (1.10-13; 4.6). Ŋgʋ́, tɔm ndʋ́ peheyi-wɛ yɔ, ńdʋ́ kɩlɩnɩ wazaɣ: Ńdʋ́ lɛ se Krɩstʋ weyi Ɛsɔ tiyaa yɔ, pakam-ɩ kaamaŋkaɣ yɔɔ. Tɔm tʋnɛ tɩ-ɖeke tɩkɩlɩ ɛyáa lɛɣtʋ (1.18-2.15). Yesu Krɩstʋ tiyiyaa kɛ Ɛsɔ tʋmlaɖaa nɛ patɩŋa palakɩ tʋmɩyɛ kʋɖʋmɖɩyɛ (ñʋʋ 3 ñɩŋgʋ).
Kpaɣnɩ 5.1 nɛ pɩsɩɩnɩ 11.6 taa, Pɔɔlɩ yɔɔdʋʋ wezuu caɣʋ tɩlasɩ tɔm nɛ ɛyɔɔdʋʋ ɛzɩma Krɩstʋ ñɩma pɩzɩɣ pacaɣnɩ wezuu ɛzɩ pɔsɔɔlʋʋ yɔ pʋ-tɔm (ɩkalɩ ñʋʋ 9 ñɩŋgʋ). Yee payaɣ-ŋ se Krɩstʋ tʋ yɔ, ñɛ-ŋgbɛyɛ taa ñɩma ɩɩpɩzɩɣ petisi se ŋla kɩwɛɛkɩm (ñʋʋ 5 nɛ 6 ñɩŋgʋ). Pɔɔlɩ cosuu ɖɔɖɔ Kɔrɛntɩ ñɩma tɔm halɩkpaɣyɛ yɔɔ (ñʋʋ 7 ñɩŋgʋ), nɛ eheyiɣ-wɛ ɖɔɖɔ ɛzɩma pakpaɣ mbá patɩŋɩɣ Ɛsɔ nɩmaŋ lɛɛŋ yɔ pɔ-sɔnzɩ yɔ (kpaɣ ñʋʋ 8 nɛ pɩsɩɩnɩ 10 ñɩŋgʋ). Tɔm tʋnɛ tɩtɩŋa tɩ-yɔɔ lɛ, eheyiɣ Krɩstʋ ñɩma se pala mbʋ́ pʋwazɩɣ lɛlaa yɔ nɛ pañam-wɛ.
Kpaɣnɩ 11.17 nɛ pɩsɩɩnɩ 14.40 taa, Pɔɔlɩ yɔɔdʋʋ Krɩstʋ ñɩma ŋgbɛyɛ taa wezuu caɣʋ paɣtʋ tɔm. Ɛwɩlɩɣ ɖenɖe you nɛ tayʋʋ lɩnaa yɔ. Ɛyɔɔdʋʋ ɖɔɖɔ mbʋ́ pɩpɩzɩɣ pʋkɔna ɖama nɩnaʋ nɛ nɔɔ kʋɖʋmaɣ Krɩstʋ ŋgbɛyɛ taa yɔ pʋ-tɔm. Paa anɩ, ɛwɛ wazaɣ Krɩstʋ ŋgbɛyɛ taa. Pʋwɛɛ se ɩnɩɩ se Krɩstʋ ñɩma wɛ ɛzɩ ɛyʋ tomnaɣ wɛʋ yɔ: paa tomnaɣ hɔɔlʋʋ ŋgʋ́ lɛ, kɩwɛ wazaɣ tomnaɣ kpeekpe. Sɔɔlɩm ɖɔkʋʋnɩ Krɩstʋ ñɩma ŋgbɛyɛ (ñʋʋ 13 taa).
Ñʋʋ 15 ñɩŋgʋ tɔzʋʋ-ɖʋ se Ɛsɔ fezi Yesu sɩɖaa taa, nɛ wiɖiyi lɛ, sɩɖaa tɩŋa kaɣ fem ɖɔɖɔ. Yee Krɩstʋ ñɩma etisi tɔm tʋnɛ tɩ-yɔɔ yɔ, pɛwɛɣnɩ wezuu caɣʋ nɛ Ɛsɔ yɔɔ lidaʋ keekee.
Ɛzɩ takayɩsɩ lɛɛsɩ yɔ, Pɔɔlɩ tɛzɩɣ takayaɣ kanɛ nɛ tɔm lɛɛtʋ nɛ sɛtʋ (ñʋʋ 16 ñɩŋgʋ).
Kɔrɛntɩ ñɩma tɛkɛ Krɩstʋ ñɩma mbá patʋzaa yɔ. Ɛlɛ́, Pɔɔlɩ sɛɣ Ɛsɔ pɔ-yɔɔ (1.4-9 taa). Tɩlasɩ nɛ yiɣduu sakɩyɛ wɛ Krɩstʋ aŋgba tɩŋa taa. Ɛlɛ́, Ɛsɔ ñɛwɛɛ ɛlakɩ-wɛ lootiye nɛ eheyiɣ Krɩstʋ ñɩma se pañaɣ pana nɛ pɛtɛzɩ wɛʋ siɣsiɣ.
Currently Selected:
1 Kɔrɛntɩ KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in