Amós 3
3
Rabhadh do Iosrael
Gairm an Fháidh
1Éist leis an mbriathar seo a labhair an Tiarna i d'aghaidh, a phobal Iosrael, in aghaidh na clainne go léir a thug mé aníos ó thír na hÉigipte:
2Sibhse amháin as ciníocha uile
an domhain a fuair aitheantas uaim;
dá bhrí sin smachtóidh mé sibh
mar gheall ar bhur n‑uile pheaca.
3An siúlann beirt le chéile ar an tslí
gan [aithne] acu ar a chéile?
4An mbúireann an leon san fhoraois
agus é gan seilg?
An scairteann an coileán leoin óna phluais
agus é gan chreach?
An dtiteann éan isteach i ngaiste ar an talamh
agus gan dada ann chun é a mhealladh?
5An bpreabann an gaiste aníos ón talamh
agus gan aon rud ceaptha aige?
6An séideann trumpa sa chathair
gan eagla a theacht ar an bpobal?
An mbuaileann tubaiste an chathair
nach é an Tiarna is cúis leis?
7Go dearfa, ní dhéanann an Tiarna aon rud
gan a rún a ligean lena sheirbhísigh, na fáithe.
8Bhúir an leon; cé air nach mbeidh eagla?
Labhraíonn an Tiarna Dia;
cé a d'fhéadfadh gan tairngreacht a dhéanamh?
Díothú na Samáire
9Fógair é i bpáláis na hAsaíre
agus i bpáláis na hÉigipte agus abair:
“Cruinnigí le chéile ar shléibhte na Samáire
agus breathnaígí uaibh mí-eagar na cathrach sin
agus an leatrom laistigh di.”
10“Níl aon chiall do chothrom na féinne acu,”
a deir an Tiarna,
“ach líonann siad a bpáláis leis an gcreach
a fuair siad le foréigean agus le slad.”
11Dá bhrí sin is mar seo a deir an Tiarna Dia:
“Timpeallóidh an namhaid an tír,
bainfidh sé do chumhacht díot
agus creachfar do pháláis.”
12Mar seo a deir an Tiarna:
Mar a sciobann an t‑aoire ó bhéal an leoin
dhá chois nó leadhb de chluais,
is mar sin a fhuasclófar clann Iosrael
a chónaíonn sa tSamáir,
agus gan ach cnaiste leapa nó trasnán
de chathaoir thoilg slánaithe acu.
In Aghaidh Bhéit Éil
13Éistigí agus tugaigí fianaise
in aghaidh theach Iacóib,
a deir an Tiarna, Dia na Slua.
14An lá a smachtóidh mé Iosrael mar gheall ar a chionta,
smachtóidh mé altóirí Bhéit Éil chomh maith:
gearrfar adharca na haltóra anuas
agus titfidh siad ar lár.
15Scriosfaidh mé idir theach geimhridh
agus theach samhraidh,
bascfar na tithe eabhair
agus scartálfar mórán tithe,
a deir an Tiarna.
Currently Selected:
Amós 3: ABN
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
An Bíobla Naofa copyright © 1981 An Sagart. Úsáidtear le cead. Used by permission.