Jelemiya 1
1
1Aya ngamaswi akaamba Jelemiya mwanaakwe Ilikiya mupailishi wa kuAnatoti mucishi ca Benjameni.#2 Baami 22:3—23:27; 2 Maka 34:8—35:19 2Mwaami Lesa wakaamba kuli nguwe mumwaaka wa likumi ayotatwe wa bwaami bwakwe Josiya mwanaakwe Amoni mwaami wa cishi ca Juda. 3Mwaami Lesa wakabandikaakwe lwabili mubwaami bwakwe Jeoiyakimu mwanaakwe Josiya mwaami wa Juda, kushika mumweenshi wasanu wa mwaaka walikumi awomwi wa bwaami bakwe Sedekiya mwanaakwe Josiya mwaami wa Juda. Ico nceciindi bene Jelusalemu ndibakatolwa busha.#2 Baami 23:36—24:7; 2 Maka 36:5-8; 2 Baami 24:18—25:21 2 Baami 36:11-21.
Kwiitwa kwakwe Jelemiya
4Mwaami Lesa wakaŋambila ayi,
5“Kaantana kukubumba mulifumo lya banyoko,
ndakalinga kukwishi kale.
Ncakwiila ndakakubika palubasu kootana kushalwa.
Ndakakusala ayi ube mulaluki kumishobo iinji.”
6Lyalo ndakakumbula ayi, “NoBaami baLesa, noBeshinkusu shoonse, nebo nshicishiiwo kwaamba alimwi ncili mwanike.”
7Sombi Mwaami Lesa wakankumbula ayi, “Utaambi ayi ucili mwanike. Sombi ulyeelete kuya kubantu abo mbondakutumako mukubalwiita shoonse nsheenga ndakulwiita. 8Kutabaloonda ceebo ndanooli awebo alimwi ndanookufuna. Nebo ne Mwaami Lesa ndaamba.”
9Mpomunyaawo Mwaami Lesa wakatambika lyaansa lyakwe, wancata pamulomo akundwiita ayi, “Bona, ndabika maswi angu mumulomo wako. 10Sunu ndakupa nkusu pamishobo yoonse apamalelo oonse, nkusu shakushula akumwayoola, kunyonyoola akukoma, kuyaka akushanga.”
Shili anga nshiloto shobilo
11Kuswawaawo Mwaami Lesa wakanjipusha ayi, “Jelemiya nciinshi ncewabona?” Anebo ndakakumbula ayi, “Ndaboona musampi wa cisamu ciitwa ayi alumondi.”
12Mpomunyaawo Mwaami Lesa wakandwiita ayi, “Waamba lushinisho ceebo anebo ntoolangilisha akubona ayi maswi angu aswitilila.”
13Lyalo Mwaami Lesa wakanjipusha lwabili ayi, “Nciinshi ncoobweene?” Anebo ndakakumbula ayi, “Ndabona nongo itoobila yasendama kuswa kulubasu lwa kumatwa.” 14Lyalo Mwaami Lesa wakakumbula ayi “Mapensho alaakuswa kumatwa akunyonyoola bantu boonse bekala mucishi cilya. 15Ntooyanda kwiita mishobo yoonse ya kumatwa.
Bamaami babo balaakwisa akubika shuuna shabo sha bwaami
kumanjililo akumilyango inene ya kuJelusalemu.
Balaakushinguluka mumbu shakwe shoonse
amandabala oonse a mucishi ca Juda.
16Ndaakupa mulandu bantu bangu
ceebo ca bubi bwabo bwakunsuula
mukunootentela balesa babo tununkila kabotu
amukulambila shakapanga maansaabo beene.
17“Ono libambile! Nyamuka uye ubalwiite shoonse nsheshi nkulwiite. Utabaloondi, sobwe ceebo nebo inga ndakulengesha kuba aboowa pameenso abo. 18Aboobo sunu ndakuyumya anga nindabala icite lilinga, nabi anga ndicinko lya nshimbi nabi anga ndubumbu lwa bulonse ayi upikishe cishi coonse, bamaami bene Juda, bacinenenene babo, bapailishi abantu boonse ba mucishi. 19Balaakukulwana sombi teshi bakakukomeewo ceebo ndi awebo alimwi ndanookufuna. Nebo neMwaami Lesa ndaamba.”
Currently Selected:
Jelemiya 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.