Jelemiya 2
2
Lusuno lwakwe Lesa pabene Isilaeli
1Mpomunyaawo Mwaami Lesa wakandwiita ayi, 2“Koya ukaambilishe maswi aya kundabala ya Jelusalemu ayi
‘Ndiingashite mbowakalinga kulyaabite kuli ndime koocili cikula bwangu.
Ndiingashite mbowakalinga kunsuni koocili nabwiinga wangu,
ee, mbowakankonkela ndindakakwiinsha muluyanga,
ncakwiila mucishi citaliimwa.
3Isilaeli wakalinga kusalalite kuMwaami Lesa.
Wakalinga mbuli shisepo shitaanshi kutebulwa.
Abo boonse bakamucisa ndakabapa mulandu
aboobo mapensho akabashikila.’ ”
Mwaami Lesa waamba.
Kubisha kwa bamashali bakulukulu ba bene Isilaeli
4Amunyumfwe maswi a Mwaami Lesa,
mwebo nobamulunyungu lwakwe Jakobo,
ee, noshipani sha mumikowa ya bene Isilaeli.
5Mwaami Lesa utokwiipusha ayi,
“Ino ncibiibinshi bamashali banu bakulukulu ncebakambonena,
ico cakabalengesha kupambuka bobulya kuswa munshila yangu?
Beene bakakonkela shibumbwabumbwa shitaaku mboshibete,
lyalo abalo beene bakaba bantu bataaku mbobabete.
6Tabakwe kwiipushawo ayi,
‘Ino uli kuli Mwaami Lesa
uyo wakatukusha muIjipiti
akutwiinsha mucishi citacite ashimenaamo.
Ncakwiila ncishi camayanga ashicengo sha mabwe
ee, cishi ciyumu nta alimwi camunshinshe,
muteendi nabi kwikala bantu.’
7Ndakamuleta mucishi ca mboleshi
kwaamba ayi mulye shisepo abutebushi kuswa muli ncico.
Sombi ndimwakenjilaamo mwakacilengesha kutanoosalalite,
ncakwiila mwakalengesha cishi cangu kulensha bunya.
8Bapailishi tabakwe kwiipushawo ayi,
‘Ino Mwaami Lesa uli kuli?’
Ncakwiila babona pamilawo tebakalinga kwinshiiwo, sobwe.
Bamatanjilili abalo bakangashukila.
Balaluki bakalinga kulaluka muliina lyakwe Baali,
ee, kabakonkela shibumbwabumbwa shitaaku mboshibete.”
Mulandu Mwaami Lesa ngwaakapa bantu bakwe
9Ono Mwaami Lesa waamba ayi,
“Mwebo ntoomupa mulandu alimwi.
Abalo bamulunyungu lwa bana banu ndaakubapa mulandu bweenka mbuli ndimwe.
10Amusubukile kwitala lya Mulonga wa Kitimu mubone.
Amutume muntu kuKeda aye abonesheshe na camushobo uyu cakacitikawo kale.
11Sa kuliwo mushobo wakakakaawo lesa wa nguwo?
Nakubi boobo teshi balesa bancinencine.
Sombi bantu bangu bakaka Lesa wabo kwaamba ayi bakonkele balesa bataaku mbobabete.
12Loonda oliculu pacikani ici
alimwi tutuma aboowa buunji.
13Bantu bangu bakacita shibiibi shobilo.
Bamfutatila nebo nekantupu ka buumi
akulikabila mikalo yabo beene,
mikalo itakoonshi kusunga amaanshi.
Shakaswa mukutashomeka kwa bene Isilaeli
14“Sa Isilaeli ngumusebenshi? Sa ngumusha kuswabo kukushalwa kwakwe?
Ino nceeboonshi waba cintu cakusaala kubalwani bakwe?
15Bamubulumina anga ninkalamu
kumubulumina cabukali.
Cishi cakwe bacilengesha kuba matongo,
aalo mandabala akwe anyonyoolwa akushiyikwabo cisuukila.
16Abalo bene Memfisi abene Taapanesi
bakanyonyoola bulemu bwa kumutwi wako.
17Aya mapensho mwaliletelabo nobene
ceebo cakusuula Mwaami Lesa, Lesa wanu
uyo wakalinga kumutanjilila munshila shanu shoonse.
18Ino bulya mutooya mukucitanshi kuIjipiti?
Sa mutooya mukunwa maanshi muMulonga wa Nailo?
Ino mutooya mukucitanshi kuAsilya?
Sa mutooya mukunwa maanshi muMulonga wa Yufuletisi?
19Bubi bwanu nobeene butoomupa mulandu.
Kumfutatila kwanu kutoomuletela bukali bwangu.
Lyalo mulaakwishiba mbocibica alimwi mbocilubite
kusuula ndime nebo neMwaami Lesa, Lesa wanu
akucileka kushomeka kuli ndime.
Nebo neMwaami Lesa, Lesa Shinkusu shoonse ndaamba.”
Isilaeli mbwaakakaka kulambila Mwaami Lesa
20Mwaami Lesa utokwaamba ayi,
“Nobene Isilaeli mwakakakabo kale kale bweendeleshi bwangu.
Mwakakaka kunyumfwila akunambila.
Peculu lyatulundu tulaamfu amunshaashisamu shoonse shicite shimfule shibotu
mwakalinga kucita bufuule mukulambila balesa bamwi.
21Ndakakushanga bweenka mbuli munyansa ubotu wakuswa kumbuto ibotu abuumbi.
Ino wakasanduka buyani kuba munyansa ulula wamuluundu?
22Nabi usambe amushika na soopo uunji,
kusombela kwa shibiibi shako kulaakunoobweneketebo.
23Ino inga waamba buyani ayi, ‘Nshisalalite,
nshina kukonkelaawo ba Bali.’
Bona mbuli mbowakacita kooli mucinyika,
yeeya nshewakacita.
Ulibo anga ningamela yanakashi iya bucicabo uku akooku.
24Ee, ulibo anga nimbongolo yamulundu ishibite kwikala muluyanga.
Anu ngani weenga waikasha na keeli paceembela?
Shisankwa shiisuni tashipengiiwo akuyandoola
mukwiinga ciindi ca ceembela nkwiicana njeyi.
25Utacici kushikila shimpanta shako shikamaninine mukati
akuyuma panshingo kunyotwa.
Sombi webo ulaamba ayi,
‘Tacicite mulandu.
Nebo ndisuni balesa beensu,
aboobo ndyeelete kubakonkela.’ ”
Isilaeli ulyeelete kupekwa mulandu
26Mwaami Lesa waamba ayi,
“Bweenka mwiipi mbwaasebaanishikwa na wacatwa,
mbweeke ubo amwebo nobene Isilaeli mbweshi mukasebaanishikwe.
Nkokwaamba ayi mwebo nobeene, bamaami banu abacinenenene,
bapailishi babo pantu pomwi abalaluki.
27Mwebo mulaambila cisamu ayi, ‘Mwebo ndimwe bata.’
Mulaambila libwe ayi, ‘Mwebo ndimwe bama.’
Mwafutatikabo misana yanu, sombi kuteshi shiwa.
Ncakwiila na mwaba mumapensho mulanjita ayi, ‘Kamwisa mutufuneeko.’
28Ino ono balesa banu mbomwakalipangila bali kuli?
Kabesa bamufuune na inga bacikonsha kumufuna ndyemuba amapensho.
Sa te mwebo nobene Juda mulicitebo balesa baanji anga ngamandabala anu?”
29Ono Mwaami Lesa waamba ayi,
“Ceebonshi mutoompa milandu?
Sa te noonsebo mwakangashukila?
30Ndakalipenshabo kumupa mulandu nobene Juda.
Ncakwiila mwakakaka kusumina kululikwa.
Amubone mwakacaya balaluki amipeeni yanu
bweenka nkalamu mbweenyonyoola na yaluma.
31Mwebo nobamulishalane lino, amuyeeye a Mwaami Lesa akwaamba ayi,
‘Sa ndaba anga nduyanga kuli ndimwe nobene Isilaeli?
Sa ndaba anga ncishi ca munshinshe ushiya mbi?’
Ino ono ceebonshi nobantu bangu mutokwaamba ayi,
‘Tulyaangulukite kucita cili coonse ncetusuni,
teshi tukaboolewo tubili kuli ndiwe.’
32Sa mooye inga waluba shakulibotesha shakwe?
Sa nabwiinga inga walubako lilaaya lyakwe lya pabwiinga?
Sombi nebo bantu bangu bakanduba kwa ciindi cilaamfu,
ee, kwanshiku shitakoonshi kubelengekwa.
33Webo ulicibwene kuya busuna basankwa.
Ncakwiila nabibo banakashi beenditeewo bufuule inga beeya nshila shako.
34Kushakufwala shako bantu balacanaako
bulowa bwa bakandu batacite milandu
nakubi kwaamba ayi tookwe kubacata kabeepa.
Nakubi boobo
35webo ulaamba ayi, ‘Nshicitewo mulandu alimwi Mwaami Lesa taatucitile bukali.’
Sombi nebo neMwaami Lesa ndaakukupa mulandu
ceebo ulaamba ayi, ‘Nshina kucitawo cibiibi.’
36Ino utoopampookilanshi bobulya munshila shako?
Bene Ijipiti balaakukulensha nsoni bweenka bwakakucita bene Asilya.
37Kumusena uyo ulaakuswaako koolicatite kumutwi
ceebo Mwaami Lesa ulibakakite abo mbooshoma.
Ncakwiila teshi bakakucafwewo napaceyi.”
Currently Selected:
Jelemiya 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.