Mika 3
3
Mika mbwaakakalalila bamatanjilili bene Isilaeli
1Nebo neMika ndakaamba ayi,
“Amunyumfwe mwebo nobamatanjilili ba bamulunyungu lwakwe Jakobo,
ee, mwebo nobaleli ba bene Isilaeli.
Mwebo mulyeelete kubika maano kukoombolosha cakutanyengelela,
2sombi mulipatite shibotu akusuna bubi.
Mulafunda bantu bangu kabacili boomi
akukusha minyemfu kushifuwa shabo.
3Mulalya bantu bangu,
kufunda shipaya shabo,
kupwayoola shifuwa shabo
akutimboola anga ninyama yakuteleka mumupika.
4Ciindi cilaakushika ndyeshi mukalilile Mwaami Lesa,
sombi lakwe ulaakukaka kumucafwa.
Teshi akakutike kumipailo yanu
ceebo ca bubi mbomwakacita.”
5Mwaami Lesa waamba ayi,
“Mwebo nobalaluki nomulubya bantu bangu,
na umwi wamupa cakulya
mulaamba shaluumuno.
Na taamupi, mulalaluka shankondo.
6Paceebo ceeco mashiku alaakwisa alimwi teshi muboneewo cili anga nciloto.
Ncakwiila munshinshe ulaakwisa alimwi teshi mukasondeewo napaceyi.
Lisuba lilaakwipila kubalaluki abo,
ndushinisho kulaakuboolabo mbi kuli mbabo.
7Balaluki balaakufwa nsoni
abalo beshikusonda balaakulenshekwa nsoni.
Balaakulosha shiwa panshi mukwiinga Lesa taatoobakumbula.”
8Ono nebo Mwaami Lesa wampa nkusu shiinji
pantu pomwi aMushimu wakwe.
Wampa amaano akoombolosha cakutanyengelela akunengesha kubula boowa
kwaamba ayi nkalwiite bamulunyungu lwakwe Jakobo shilubo shabo,
ee, kulwiita bene Isilaeli shibiibi shabo.
9Amukutike mwebo nobamatanjilili ba bamulunyungu lwakwe Jakobo,
ee, mwebo nobaleli ba bene Isilaeli.
Amukutike mwebo nomupatite koombolosha cakutanyengelela
akusandula shiluleme kuba shitaluleme.
10Amukutike mwebo nomuyaka Siyoni kwiinda mukutila bulowa
akuyaka ndabala ya Jelusalemu mukucita bubi.
11Bamatanjilili baloombolosha na bapekwa makulo.
Bapailishi baleeishabo kwaamba ayi balipilwe,
abalo balaluki balasansulabo nshebayubulwitwa na kwaba kupekwa maali.
Nakubi boobo balicinkite manungo muMwaami Lesa akwaamba ayi,
“Mwaami Lesa uli pakati kesu.
Aboobo mapensho taakoonshi kutushikila.”
12Paceebo ceeco, ceebo ca ndimwe
Siyoni ulaakushabwa anga ngumuunda.
Jelusalemu ulaakuba matongo.
Kalundu ka Ŋanda yakwe Lesa kalaakuba musaansa.#Jele 26:18
Currently Selected:
Mika 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.