Mika 2
2
Meelelesho abaabo balyatilila bakandu
1Mapensho kuli baabo beshikuyeeya shibiibi,
abaabo bapinga kucita shibiibi nabi kabalete!
Na bwaca macuunsa balacita shibiibi nshebayeeya
mukwiinga balakonsha kushicita.
2Ncakwiila na balisuni myuunda baleebwesa,
na balisuni maanda balaabwesa.
Balabwesa ŋanda ya muntu mukumwiinda kumaano
akubwesa buboni bwakwe mbwaakapyana munshila njemunya.
3Paceebo ceeco Mwaami Lesa waamba ayi,
“Ntooyeeya kumuletela mapensho mwebo nobantu
alimwi teshi mukakonshe kulipulusha.
Teshi mukanokweendawo cakulisumpula
ceebo cilaakuba ciindi ca mapensho.
4Pabushiku ubo bantu balaakumuseka.
Balaakumupensha alwiimbo ulu lwabuumba lwakwaamba ayi,
‘Twanyonyoolwa cakumaninina.
Mwaami Lesa watunyaya cishi ncaakatupa
akucipa kubaabo bakatutola busha.’ ”
5Mulikoto lya mwaami Lesa teshi mukabe wamulunyungu nabi womwi
uyo weshi akoome cisolo kumubaanya cishi.
6Bantu balaŋambila ayi, “Cileke kulaluka,
ee, cileke kulaluka pamakani aya.
Lesa teshi akatulekelele ayi tusebaane.
7Sa utooyeeya ayi bamulunyungu lwakwe Jakobo balishingenwe?
Sa Mushimu wa Mwaami Lesa ulikalalite?
Sa ncakwiila inga wacita cintu ca mushobo uyo?
Sa taambi cankumbu kubaabo bacite nshila shiluleme?”
8Ono Mwaami Lesa waamba ayi,
“Mwebo mulalwana bantu bangu anga mbalwani babo.
Bashilumamba balapiluka kunkondo
kabayeeya ayi kumishaabo taaku cakulisukama.
Sombi mwebo mulababelamina ayi mwiipe shakufwala shabo sha peculu.
9Mulatandaanya banakashi ba bantu bangu,
ee, kubatandaanya kuswa mumaandaabo abotu.
Mulaakukusha coolwe cangu pabana babo ayi bacibuule kwalyoonse alyoonse.
10Amunyamuke, munooya
mukwiinga uno teshi musena wanu wakookesheshaawo.
Shibiibi shanu shalengesha musena uno kutaba usalalite.
Ncakwiila ulaakunyonyoolwa cakumaninina.
11“Na mubeshi nabi shikucenjeeka wesa waamba ayi,
‘Ntoomulalukila kutambula waini abwalwa buunji,’
Uyu ulaakuba ngomulaluki bantu aba ngobasuni.
12“Nobamulunyungu lwakwe Jakobo ncakwiila ndaakumuyobolola noonse.
Ndaakuyobolola bene Isilaeli bakacaala boonse.
Ndaakubabunganya anga nimbelele mucimpati,
ee, anga nditanga kumafulo a ndilyo.
Musena uyo ulaakwisula bantu.”
13Lesa ngweshi akabacalwite nshila
akubatanjilila kuswa mubusha.
Balaakupasula mwinjililo akuswaamo umo.
Mwaami wabo ulaakutaanguna kupula.
Ee, Mwaami Lesa ngweshi akabe kunembo lyabo.
Currently Selected:
Mika 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.