Jelemiya 3
3
Isilaeli utashomeki
1Mwaami Lesa waamba ayi,
“Sa na musankwa waleka mukaakwe,
alakwe waswaako akuya mukweebwa kumwi,
sa inga wamuboosha alimwi?
Te ico inga calengesha cishi kutasalala?
Sombi webo Isilaeli weebweebwa anga ngumwanakashi mufuule.
Ono sa sunu ulisuni kupilukila kuli ndime alimwi?
2Amulange peculu lya tulundu tutacite bwiisu mubone.
Sa kuliwo pakacaala mpomutana kutacitilawo bufuule?
Mwakalinga kunookala mweela nshila kulindilila basankwa
bweenka mbuli bucita muAlabu muluyanga.
Aboobo mwalengesha cishi kutanoosalalite ceebo ca bufuule abubi bwanu.
3Paceebo ceeco mfula ya tepetepe yakacatwa,
ee, imfula yakupisha shishango teekwe kulokaawo.
Nakubi boobo mwebo mulibo nta mubufuule,
ncakwiila cakutanyumfwaawo ansooni napaceyi.
4Sa teshi ndimwe mwalinga kunjita coonoonobo ayi, ‘Ta,’
akwaamba ayi, ‘Mwebo muli beensuma kuswabo katucili bacikula bwangu.
5Sa munanookalalitebo lyoonse?
Sa bukali bwanu teshi bukamaneewo?’
Mbomutookwaamba ubo mwebo,
sombi namwaambi boobo, mucitolelela kubisha.”
Isilaeli aJuda balyeelete kusanduka kuswa kushibiibi
6Muciindi ca bulelo bwakwe Josiya, Mwaami Lesa wakandwiita ayi, “Sa wamubona Isilaeli mwanakashi mufuule utashomeki nshaatoocita. Ulatanta peculu lya tulundu toonse amunshaashisamu shoonse shicite shimfule shibotu akunoocita bufuule.#2 Baami 22:1—23:30; 2 Maka 34:1—35:27 7Nebo ndakalinga kuyeeya ayi amana kucita shoonse ishi, ulaakusandukila kuli ndime alimwi. Sombi lakwe taakwe kucita boobo, sobwe. Alakwe Juda mukwabo utashomeki wakashibona ishi. 8Lyalo Isilaeli ndakamupa nkalata yakumuleka akumutandaanya ceebo ca bufuule bwakwe. Sombi Juda mukwabo utashomeki ulya taakwe kuloondawo, sobwe. Ncakwiila alakwe wakacita bweenka ubo. 9Juda taakwe kunyumfwawo nsoni pasheesho shakacita Isilaeli. Ndushinisho alakwe wakalengesha cishi kutanoosalalite. Wakacita bufuule kwiinda mukulambila mabwe ashisamu. 10Nakubi boobo, Juda mukwabo Isilaeli mwanakashi utashomeki taakwe kwisa kuli ndime camoyo wakwe woonse. Sombi wakesabo cakweena. Nebo neMwaami Lesa ndaamba.”
11Ono Mwaami Lesa wakandwiita ayi, “Isilaeli utashomeki ulilulemeeko kwiinda Juda. 12Koya ukaambilishe makani aya kumatwa ayi,
‘Piluka Isilaeli webo nootashomeki,
Teshi nkakulangewo tubili cakukushibuluka
ceebo ndi muntu ucite nkumbu.
Teshi nkakubikilewo mfundilishi kwamuyayaya, sobwe.
13Citooyandikabo nkusumina mulandu wako.
Webo wakaashukila ndime neMwaami Lesa, Lesa wako.
Wakalinga kubikila maano balesa beensu munshaashisamu shoonse shicite shimfule shibotu.
Mukucita boobo tewakalinga kunyumfwila.
Nebo neMwaami Lesa ndaamba.’ ”
14Mwaami Lesa waamba ayi, “Amupiluke, mwebo nobantu batashomeki ceebo nebo ndime ibaanu. Ndaakusala womwi womwi kuswa mumandabala oonse akusala bobilo bobilo kuswa mushipani shanu shoonse kwaamba ayi nkamubooshe kuKalundu ka Siyoni. 15Lyalo ndaakumupa bamatanjilili bapa moyo wangu abo beshi bakanoomweendelesha cabusongo alimwi amaano akunyumfwisha shintu. 16Mwaakufuula mucishi cilya, bantu teshi bakanokwaambawo paLibokoshi lya Cipangano, sobwe. Teshi bakaliyeeyewo nabi kulyaanukaawo. Teshi bakalisunewo nabi kuyeeya kupanga limwi, sobwe. 17Ciindi ico balaakunookwiita ndabala ya Jelusalemu ayi, ‘Cuuna ca bwaami ca Mwaami Lesa.’ Uko mishobo yoonse nkweshi ikabungane kulemeka liina lya Mwaami Lesa. Lyalo teshi bakakonkele tubili bwaashu bwa myoyo yabo ya bushicimpamya. 18Munshiku isho bene Juda balaakupaankana abene Isilaeli, lyalo boonse balaakuswa kucishi ca busha cakumatwa kwisa kucishi ico ncendakapa bamashali babo bakulukulu ayi ncabo.”
Bantu bakwe Lesa mbobakalambila shibumbwabumbwa
19Mwaami Lesa waamba ayi,
“Ndakalinga kukondetwe abuumbi kunoomulama anga mbana bangu.
Ndakakondwa kumupa cishi cikondelesha,
ee, cishi ciindaawo kubota mucishi coonse ca panshi.
Ndakalinga kusuni ayi munoonjita ayi, ‘Ta,’
cakubula kumfutatilawo tubili.
20Sombi bweenka mbuli mwanakashi utashomeki kuli ibaye,
mbweeke ubo amwebo mbomutashomeki kuli ndime mwebo nobene Isilaeli.
Nebo neMwaami Lesa ndaamba.”
21Mibila yanyumfwika peculu lya tulundu.
Mbene Isilaeli batoolila akukombelela
ceebo bekala buumi bwakubisha
alimwi akuluba Mwaami Lesa, Lesa wabo.
22“Amupiluke mwebo nobantu batashomeki,
nebo ndaakumushilika ayi mukanooshomeka.”
Mpeeke balo bakakumbula ayi,
“Ee, tutoosa kuli ndimwe,
ceebo mwebo ndimwe Baami baLesa, baLesa besu.
23Ncakwiila kulambila kwa bakunsengwe patulundu takucite lucafwo.
Ndushinisho kupulushikwa kwa bene Isilaeli kulaswabo kuMwaami Lesa, Lesa wesu.
24Kuswa kubucikula bwangu bwesu
balesa balensha nsoni bakamana shakayuwila bamashali besu bakulukulu.
Ncakwiila bakamana mbelele, ŋombe alimwi abana babo basankwa abanakashi.
25Atoone panshi kunsoni akuleka ayi shitucaaye.
Twakabishisha Mwaami Lesa, Lesa wesu,
swebo pantu pomwi abamashali besu bakulukulu.
Kuswa kubwanike bwesu kushika sunu
tatunyumfwiliiwo Mwaami Lesa, Lesa wesu, napaceyi.”
Currently Selected:
Jelemiya 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.