Judisi 3
3
Bantu basuni shaluumuno batuma nkombe kuli Olofenesi
1Lyalo bantu basuni luumuno bakatuma nkombe kuli Olofenesi. 2Balo bakamulwiita ayi, “Swebo ndiswe beshi nkombe ba mwaami munene Nebukadinesa tutoofukama pameenso anu. Mutucite bweenka mbomusuni. 3Maanda esu oonse, cishi cesu coonse, myuunda yesu yoonse ya wiiti, shifubwa shesu shoonse, pantu pomwi ashimpati shesu shoonse, misumba yesu, shoonse shili mumaansa anu. 4Mandabala esu oonse abantu bali mumandabala umo, boonse mbasha banu. Amwise mucite bweenka mbomusuni.”
5Bantu bakwe Olofenesi bakaya mukumwaambila maswi eenka ayo. 6Mpeenka apo lakwe wakashikila ku loombe lwa Lweenge, wakabika bashilumamba muminjililo yoonse, yamandala akubwesaamo bantu bakasalwa kabotu ayi bamucafwe. 7Bantu bakooko abamucishi coonse bakamutambula, bakafwala mishini yamateu akumushanisha saase, ashalo ngoma kashilila. 8Lakwe Olofenesi wapwayoola maanda akulambilaamo mukwiinga mwaami wakamwaambila ayi kooya ukanyonyoole tulesa toonse twamucishi ico akukakatisha bantu ba mishobo yoonse ayi banoolambilabo Nebukadinesa eenkabo. Wakalinga kusuni ayi bantu mishobo yoonse a milaka ipusenepusene banoolambilabo nguwe mbuli Lesa.
9Pesule Olofenesi wakaya ku Esidileloni, pafwaafwi andabala ya Dotani, iyo ilangene anyinsa yaJuda. 10Wakayaka misumba ya nkondo pakati ka Geba aSoyitopolisi. Kweenka uko wakaya mukwikala mweenshi wakabumbulu akubunjika shakalinga kuyandika mulikoto lyakwe lya beshilumamba.
Currently Selected:
Judisi 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.