Judisi 2
2
1Mucaaka wa 18 cabwaami bwakwe Nebukadinesa, mwaami wa Asilya, panshiku mumweenshi utaanshi, bampanda maano bamwaami bakanyumfwana ayi babooshe cishole pashishi shoonse, mbuli mbwakashomesha mwaami. 2Lakwe wakabunjika bacinenenene abamanene babeshilumamba bakapangana mbweenga baya mukulwana mubushishi. Wakabalwiita ncaakalinga kusuni kukomena limwi cishi coonse kweelana akukomena kwamusebaanyo ngobakacita. 3Lyalo mwaami wakapingula ayi woonse utana kunyumfwila maswi akwe ulyeelete kucaikwa. 4Ndyaakamana kusansulula nshakalinga kuyeeya, kucita, wakeeta Olofenesi, munene wabeshilumamba bakwe uyo ukonkela mwaami, akumulwiita ayi, 5“Nebo neNebukadinesa nemwaami munene, mwaami wa cishi coonse ca paanshi, ndapingula na uswe papano, ubwese bashilumamba bacishi kulwana nkondo ya paanshi bali 120,000 abeshi kulwanina pamaaki bali 12,000. 6Baye bakalwaane abantu boonse bakushishi sha kumatwa batakwe kunyumfila mulawo wangu. 7Ubalwiitile limwi ayi babambe bulongo amaanshi mukwiinga ntoosa abukali mukubanyonyoola. Bashilumamba balaakuya cilyatoolalyatoola cishi cabo coonse akusaala shintu shoonse. 8Nyika shabo shoonse shilaakusula bantu bakayaswa, amilonga yoonse iniini ainene ilaakusula abantu bafwite mpaaka apamulomo. 9Beshi bakacaalewo ndakubatola mubusha kumelelesho acishi coonse ca paanshi.
10Webo Olofenesi koya ukankomeneko shishi shoonse, nebo kantana kushika. Na ukabakome ukabaange kushikila ciindi ceshi kabape mulandu. 11Nabakacite shitaala utakabanyumfwili nkumbu, ukabacaaye akusaala cishi cabo coonse. 12Ndalumbila cakushomesha kweelana ankusu shangu, ayi isho nsheendaamba ndakushicita mbuli mbondalumbila. 13Ono webo utasotoki mulawo wangu nabi womwi, nebo ndi mwaami wako. Ukonkele cakushomesha makani oonse ngondapingula utacelwi.”
Olofenesi mbwaakalwana nkondo
14Ndibakapansaana amwaami, Olofenesi wakeeta beshikupingula shankondo, batanjilili abacinenenene bankondo ba bene Asilya. 15Wakabalwiita ayi babunjike bantu basalitwe mbuli mwaami mbwaakamulasha, beshikulwanina paanshi 120,000, beshikuwaala mifwi abo beendela pamaaki 12,000. 16Wakabeemika pamindando ya nkondo, bweenka mbocita batanjilili ba nkondo. 17Wakabwesa angamela shiinji abuumbi, ambongolo amule shishikunyamuna shintu. Ambelele, mpongo kubikaawo aŋombe shitabelengeki kwaamba beshilumamba bakanoolya. 18Bakayumuna shoonse shibakalinga kuyandoola beshilumamba bakwe, kubikaawo agolodi uunji asilifa shakaswa muŋanda yamwaami.
19Lyalo boonse abo bakanyamukaakwe alikoto lyoonse lya beshilumamba, likoto ilyo lyakatanjila kunembo lya mwaami Nebukadinesa. Wakalinga kusuni kwaamba ayi akome cishi coonse cakumatwa, ashikoci shankondo abeshikweendela pamaaki abeshi kweenda paanshi. 20Pantu pomwi abaabo kwakaya likoto lyabantu anga cisoshi nabi musese wapa cishi ca paanshi. Kwakalinga bantu batabelengeki. 21Ndyeebakaswa kuNinife bakeenda nshiku shotatwe kushika kucinyika ca Bekitileti. Kwakalinga bantu batabelengeki kumisumba. 22Kuswa kooko Olofenesi wakaya kucishi camalundu abeshilumamba bakwe boonse, beshikweenda paanshi, bapamaaki abashikoci. 23Bakanyonyoola ndabala ya Puti alimwi a Ludi akusaala shintu shabantu bakuLasisi abene Ishimaeli abo bekala kweela kwa Luyanda, kumalenge lya cishi ca Akelya. 24Pesule, bakasubuka mulonga wa Yufuletisi kuya mukwiinda mucishi ca Mesopotamya. Bakanyonyoola mandabala oonse amuumbu shamweela Lweenge lwa Abiloni kuya mukushika kulweenge lwa Mwinyo. 25Wakakoma cishi ca Silisiya akucaya bantu boonse bakalinga kucita shitaala. Mpeeke wakashika kunyinsa yakumalenge ya cishi ca Jafeti ilangene acishi ca Alebya. 26Wakakoma bene Mindyani akutenta misumba yabo, akubanyaya mbelele shabo. 27Ciindi cakucesa wiiti, wakashika kucinyika ca Damasikasi kaya citenta shintu shabo akunyonyoola shifubwa shabo. Alimwi wanyonyoola ndabala yabo acishi cabo coonse, akucaya bacikula bwangu amupeeni. 28Nceceeco bantu boonse bamweela Lweenge bakatalika kunyumfwa boowa. Bantu bakalinga kwikala kuTaya aku Sidoni, kuSuli akuOkina, akuJamina kushika Ashidoti, akuAshekeloni, boonse abo bakaaba abowa butaambiki.
Currently Selected:
Judisi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.