Efeziyeŋ 6
6
Bəza hay ta baba ta maya ta hay
1Bəza hay, tsənəmatar sləmay a baba kwar, ta may kwar hay da mezəley ma Bay’ərlam, na ŋga na na, kassla. 2Tsənatar sləmay andza baba ɗek ta may ɗek, neney na mey ma mewey tsəfəmey ana, a dam ka vaw na ta guma neney ma tsəmawa na: 3ma aza ka ndzefey wuiya ta sifa haɗadzidzay ka dala neney. 4Kuray tey andza baba ta maya, ka da kəmatar tek me tsey mevel aha a wawa kwar hay zlay, ama kendzey ma ka gəlam na, səpam ma ləmadəmata, ta me tsey guma a 'ar na, ma sawa da Bay’ərlam ana.
Beke hay ta ndaw ma wumata na hay
5Beke hay, tsənəmatar sləmay a ndaw ma wumakwar ka dala na hay, ta me wesey aha kwasl kwasl, ta mevel ləfeɗeɗe ha, andza a Kriste. 6Hərway a tsukurəmakwar aha seŋgey kakay, andza ka səpam na ka datar 'ar a ndaw hay kakay, amana, andza beke ma Kriste hay, ma kam tek tsam tsam ma dar 'ar a Bay ma Bəla ana. 7Kam mber ta mevel asləta, andza ka kam na, meslərey ma Bay’ərlam zləna, ma ndaw hay kakay. 8Kuray ana ka səradama seŋgey: tek ma ndaw me key hayna na, kwa way way a da ndzafa ka tsakay ma Bay’ərlam, a da key na beke, dakay ndaw ma wa 'ar aŋga na na. 9Kuray tey ndaw ta beke na hay, kəmatar andza ha tey, mbəkadama ma tsəlafəmata zluwer, ka səradama ha ma ta na na, andza ma kwar ana tsa, Bay na, ŋga da 'ərlam, ka slam dey ŋga na, me weley ndaw dakay.
Tek ma har ma Kretieŋ
10Ma da ndəvada na, dzuwam vaw ta gədaŋ da mezəley ma Bay’ərlam, ta gədaŋ aŋga ma slafa tabiyaha na. 11Dzuwam vaw na, ta tek ma har ma Bay ma Bəla, ma kuray ka slafama me dzəŋgərey ka vaw kwar, ka wewer ma Sataŋ. 12I da kakwama vərom na, ta ndaw hay kakay, amana, ta Ndaw me wey ndaw hay, ta Bay hay, ta Ndaw me kərey ndaw hay, ka bəla ma ləvaŋ a neney, ta gədaŋ ma mesəfrey haya kakay ana hay da 'ərlam. 13Zəgam tok na, tek ma har ma Bay ma Bəla, ma aza ta pas haya kakay ana na, ha slafama me dzəŋgərey ta me lətsey, andza tek a neney hay ma kaya tsoy tabiyaha na. 14Lətsam tok: dərka na andza kanda me rey a bəzay, dzerey na andza mbal ma me dzəŋgərey ka vaw ana. 15Andza tahərak aha a sek na, me mbəɗey sek a kwar, ma tələkada mey ta Mey Wayna ma zozoy. 16Mbaray aha na, zəgam me pey 'ar, a slafa ma təkafakwar sumbor ta waw aha kava, ma Ndaw Werwer ana ba. 17A dəba na tok na, təɓam mbəram daw ma me buwey ta sleɗ ma tsakay ma Mesəfrey, ka ləva na Guma ma Bay ma Bəla. 18Ɗulam mey zarra, ta me ɗuley mey waray waray na, ta me dzəney ma Mesəfrey kokwaɗ ana, har ma me tufəkwey kwar hay tabiyaha na, padama na a me ɗuley mey, mandzara ka mətsakwar har, hərway ma ndaw Kokwaɗ ana hay tabiyaha, 19hərway ɗaw tiyatsa: hayna guma na ka key da huɗa mey ɗaw na, ma tələkada mey ta mey ma kəzla na ma Mey Wayna ta matanduroŋ aha. 20na yah adziya ŋga na, ma dzuwa ha ta megesele ana. Ɗulam mey tok na, ma i ka ndzefey matanduroŋ da Mey a neney Wayna ka nefey ma i ka tsey andza na a dafa i ka tsa andza ha na.
Me tsey guma a vaw
21A saya na kuray ka səradama tiyatsa, mendzey ɗaw ana, tek a ɗaw me key ana. Tisik malam na i ma wuɗa haɗa na, bəzey me slərey hayna, ma tsəney sləmay ana da mezəley ma Bay’ərlam, a da ɓadakwar tek ana wayna hay tabiya ha. 22I sləradəkuraɓa na ta har, ma aza ka tsakwar na, la ka waray, arka ka makwar 'ərev. 23Malam a ɗaw hay, hayna ndzafam zozoy, ma wuɗa vaw ta me pey 'ar, ta har ma Bay ma Bəla Baba, ta Bay’ərlam Yezu Kriste. 24Hayna hahaya ka ndzey ta ndaw ma wuɗama Bay’ərlam a lakwa Yezu Kriste, da ma wuɗa vaw me ndəvey kakay ana tabiyaha.
Currently Selected:
Efeziyeŋ 6: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun