TUWUY 1
1
Zeruzaleme, ɗoɗok kaɓa ngwas wudiga
1ˀEy eh! Walahay misi mizli haɗa araŋ,
mbak ɗoɗok pal naŋ ka ngwas wudiga mbrike!
Zleˀe na, slimiɗ naŋ a zil deŋ a wuzla sukwi ngi mizli ngbaŋ,
i maˀãy a wuzla hirwuy ngi buy miwi liheye,
ani wurenna i beke ngi gi slra mitakˀay so.
2Vur duvuɗ gar na, a ro ar li tuwuy,
kwala ceɗ ceɗ ti tuwuy.
A wuzla ngama naŋhay gar na,
ko mitikin naŋ ɓa a taˀa tuwuy anta.
Cil naŋhay gar a vulakaŋ le ngi ji,
a tiram mesene naŋhay le.
3A ra jaka sukwi ngi Zuda nga hirwuy mulak,
a hin hirnga le, a tiri beke le.
A cifi le a wuzla misi kulihey,
amma naŋ anta lum li pi haya ta.
Misipi naŋhay nder ndere, ara gidiɗakaŋ,
a gucokoŋ mi le guc.
4Jiviɗ ngi Siyoŋhoy gar, a ndiram le daŋ daŋ,
ko mbur mawi haŋ nga diga anta.
Mizli anta ar li ngi lumahaya mata,
masay ngi raˀahaya, ara niˀicam.
Ziri diili ngi raˀahaya, ara likam,
kay, i bonoy mukuyta wãˀ avu Siyoŋ.
5Mizli mazliram ti naŋ ta, a funakaŋ le,
mesene naŋhay ara pulam vu,
naŋ masi bonoy na, i Bumbulvuŋ migaŋ di,
asi slikiɗa ɓi naŋ mihaɗa na.
Ziri naŋhay i mijahay le,
mizli mazliram ti taŋ ta, ara ɓulaka taŋ sesek a mbuŋ,
ara ram taŋ le nga hirwuy mulak.
6Aw Siyoŋ mimezle,
busukum ngi vi dangwal naŋ a diɗ le wãˀ.
Yarma ngi raˀahaya,
a tiram le kaɓa gawla muunihey,
t'anta lumam li zumo mata:
ara cohom le hiyik hiyik,
a mbuŋ misipi taŋhay nder ndere.
7Zeruzaleme, ar hin tayna, naŋ maliˀi lambaˀ
waɗ ar hin tayna mitikakaŋ ˀay na,
gwat mupuɗaw puɗaw naŋhay gar,
misi zlezlezleˀe tuwa, a wulka taŋ pay.
Da mizli naŋhay a cam le
asi haŋ ngi mizli mazliram ti taŋ ta,
yo mbur mukulo widi taŋ anta na,
mizli mazliram ti taŋ ta a puraka:
a singiram ar taŋ, asi a hĩhĩyam le.
8Zeruzalem a gi malambaˀ le haɗa,
puraka a tiri kitikil le.
Mizli mavulakaŋ dudok gar na, ara hirisakaŋ,
asi ara purakaŋ, naŋ gulndiŋ kine,
naŋ vuna pulaˀ duba,
ara gidigil ti niˀic.
9Dili a pur ndim ndim avu patari naŋ,
gwat masa lumaŋ na, a wulka ɓaˀfar le ta.
Naŋ mihĩhĩy na, kay a zumaŋ hirnga le,
ko mbur ngi tikin naŋ ar li tuwuy anta.
Dar a ɓi: «Aw Bumbulvuŋ ɗu,
pura, a tikikiy ˀay le,
mesene ɗu a lum bugawla le ar ya.»
10Mizli mazliram ti naŋ ta,
a tiɗam haŋ le ar zlili naŋhaya gar.
Naŋ kanah, ara pura mizli duniyahay,
ara cam ng'ar hay naŋ mipala,
Buymisemuŋ, ki ɓi le ɗaˀ le zleˀe,
mizli duniyahay na, a cam ng'ar kus ngi ɗike ta ngbaŋ.
11Mizli naŋhay keɗeɗe a roko niˀicam,
a roko sipam gwat ngi zum,
zlili taŋhaya, a mbiɗam taŋ gwat ngi zum,
ɓa a ngiram ti naŋ.
Dar Zeruzalem a ɓi:
«Aw Bumbulvuŋ ɗu, pura,
y'ani cuˀum, hiris le ani.»
12Kum mizli gar macohom ar jiviɗ hana,
gwat misenna a gi ɗaˀ avu kumo ta,
ani, puraka ɗi,
ki puram bonoy ɗaˀ ɗaˀ ka nga ya na ta,
ara guzuvuriy haɗi.
I bonoy Bumbulvuŋ migiy di
tapas naŋ muzuɓ himaˀ haɗa na.
13Buymisemuŋ a hizigo vu paɗ ti muŋ,
a ci sesẽŋ kasl avu tesl ɗuwoyo, buy naŋ i naŋ.
A ngiy ngamngam kaˀ a mbuŋ ɗu,
a hizigiɗiy ngbizl mirkendel,
a tiri ti ya ngwas muɗoɗok pal naŋ,
hin gar na, vu ɗu ndum ta.
14Mungra ɗuwoyo, a juw taŋ galalaŋ ti haŋ naŋ,
a hirzligam ngbok ngbok asi haŋ naŋ.
Mungra ɗuwoy a jiɗam sesẽŋ asi ˀay ɗu,
dudok naŋ, a tika gidaŋ ɗu le.
Bumbulvuŋ a vuliy asi haŋ ngi mizli misi kahana,
mbak i cici deŋ a mbuŋ taŋ gu ta.
15Mizli miwirwirey misi zleˀe a hay ɗu gar na,
Bumbulvuŋ a ɓula taŋ le avra.
A ɗuf hin taˀ ngi gi kus vur ya,
ɓa ngi ngurufo gawla ɗuwoyo.
Bumbulvuŋ a njirsliy, ya Zeruzalem,
walahay mimezle ngi Zuda le asi sar,
kaɓa manjirslam yi ngi gudubun ar li ɗuc naŋ.
16Ya matuwuy na aseˀeŋ,
hiri ɗu ara budug tuwuy.
Asi mbur ngi tikin ɗu ɓa i taˀa tuwuyo,
mbur ɓa a vuliy gidaŋ na,
naŋ kileŋ avu ya.
Ziri ɗuwoyo, a zizam le avu ya,
asi mesene ɗu, naŋ gidaŋ haɗa.
17Siyoŋ a tila haŋ a tila haŋ,
ko mbur mitikin naŋ, ɓa a taˀa tuwuyo, anta.
Zakopo, mizli mazliram ti naŋ tahaya, a roko gun hirnga naŋ.
Bumbulvuŋ a ɓa taŋ ɗaˀ ɓa ara lumakaŋ.
Zeruzalem misi a wuzla taŋ na,
a tiri kitikil le.
18«Bumbulvuŋ naŋ jeŋŋe,
a ga kanah, asi naŋ miɓi ɗaˀ na, yi cinaŋ mi ta.
Kum mizli gar, cinam so,
puraka bonoy ya masa na.
Ziri diili ati ziri gawla ɗuwoyo,
a jaka taŋ le nga hirwuy mulak.
19I zila mizli muwuɗ ɗuwoyo le:
amma taŋ a gikiy gilaw le,
masay ati mizli micawwa ɗuwoyo,
a micam le ar walahaya,
naɓa ara sipam gwat ngi zum vur hirnga taŋ,
ɓa a ngiram ti naŋ ngbaŋ.
20Aw Bumbulvuŋ ɗu, pura ɗi,
nga ya, i si na bonoy tewle,
kwacay ɗu ara mbiɗi di kucoˀosl kucoˀosl,
didak ara muɗiy a hur ɗo,
asi cin mi na, i cin ta gwaɗ naŋ.
Tivra, maslalam ara zuma dideˀ ɗuwoyo,
a hur haya, i puraka kaɓa ndra a wuzla mumucahay.
21Mizli ara cinam niˀic ɗu vuna ngbaŋ:
amma ko mbur mitikin ɗu, ɓa i taˀa tuwuyo, anta,
mesene ɗuwoy gar ara cinaka ɓi ngi bonoy ɗu na,
ka miga ɓa i si bonoyo, ara mumulom di:
hin ka muɗuva na, ki ga le ɓa a ndilawa.
Anja taŋ kwana, a ndiram kaɓa ya vuna ya.
22Anja wer taŋ gar na, a bigi ngbay a mbuŋ ɗike,
yo gi ti taŋ,
kaɓa ka migi ti ya,
vur slikiɗa ɓi ɗuwoy gar na ya.
Asi mike na, niˀic ɗu a gi le haɗa,
dumvu ɗu gar naŋ ti jiji.»
Currently Selected:
TUWUY 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.