TUWUY 2
2
Bumbulvuŋ migi kaɓa i mesene ngi Zeruzaleme
1ˀEy ehe! Bumbulvuŋ muzuɓ himaˀ na,
a wuɗ a pula Siyoŋ mimezle timbiɗim!
A hizigo gwat mawucuɗa Israyele le,
paɗ ti muŋ nga ruwuy.
Tapas naŋ muzuɓ himaˀ na,
a wulka li ɗuva sar naŋ keŋ mata.
2Li zum ti ginew ngi Zakopoyo,
Bumbulvuŋ a nda taŋ suɗuk suɗuk, manja ircece.
Naŋ mislikiɗ himaˀ na,
a mbizla walahay Yude mimezle muguno ti moholoyo le ngurof ngurof a ruwuy:
zumabuy ati buy ngi raˀahaya, a hirya taŋ le.
3Naŋ muzuɓ himaˀ fõh fõh na, a susuymo
gidaŋ ngi Israyele le leɗeɗ wãˀ.
A mbuŋ meseneheye,
naŋ anta cici zlak ta.
A bul vu hilɓiɓ a ruwuy Zakopo,
jo ˀa wura gwat mugun ngi ciki naŋhaya gar.
4A ngirɗa leke kaɓa mesene ngi mbur,
a ro ngik ti luvut tir haŋ hazumo,
kaɓa mbur mazlir ti cil naŋ ta,
mbur naŋ mupura le kuy avu hiri gar na,
a kiɗa vagay.
A pa himaˀ naŋ misi ka vu na,
nga hirnga guɗuk ngi Siyoŋ mimezle.
5Bumbulvuŋ a gi kaɓa mesene ngi mbur,
a nda Israyele suɗuk,
a mbizla mohol naŋ matikaŋ hiriheye cek,
a waha walahay naŋ muguno ti moholoyo.
A ga ɓa mbulo mi ati tuwuy
a gi haɗa a ruwuy Zuda mimezle.
6A turo zluɓ ngi jarne naŋ,
waɗ a turo mazlaɓ naŋ macifi aseˀe,
a hirya li ngi zlir naŋ ati ndra.
Hin ngi muguzlumoy waɗ Sabata,
Bumbulvuŋ a ga ɓa mizli a puyukom di hirnga a Siyoŋ.
Naŋ miji mevel ka vu na,
a ɓula buy ati masayay avra.
7Bumbulvuŋ a hiziga li gi mikuli naŋ le avra,
a pura li naŋ mipala kuyta wãˀ,
dalam ngi hay mimezle ngir walahay Siyoŋ,
a vula taŋ asi haŋ ngi mesene taŋhay.
A wudam ar hay ngi Bumbulvuŋ,
kaɓa mawudam ti hin ngi muguzlum.
8Bumbulvuŋ a juwa le ngi waha
mohol ngi Siyoŋ mimezle.
a sa waha ngirnin,
naŋ anta pula haŋ ava ta,
sey da naŋ mususuyumo le ngirnin.
Mohol ngi huroˀo ati ngi vra,
a tiri taŋ diŋ le, ara mbizlam cuw taŋ.
9Mizlingre ngi Siyoŋhoy a cam le nga ruwuy,
a hirya waɗ a ngila magandaŋ naŋhaya.
Buy naŋ ati yarma naŋhaya,
taŋ asi haŋ ngi mizli misi i duniyahay.
Ɓimujuwa anta mata.
Ko mijiviɗ naŋhay kwana,
anta puram gwat ngi Bumbulvuŋ ti kleŋ mata.
10Mizli micawwa ngi Siyoŋ Mimezle,
a cifam le joˀ a ruwuy, lek lek,
a pam murɓuk a hirnga.
A kam zana ngi vagay ɓaˀ ɓaˀ avu vu.
Ziri diili Zeruzalemeye,
hirnga jik jik a ruwuy.
11Tuwuy a tikiy gidaŋ ngi hiri le,
kwacay ɗu a mbiɗi di kucoˀosl kucoˀosl,
gidaŋ ɗu anta mata, a tiki le,
asi hiryi muluma mizli ɗuwoy na.
Ti di nah na, naɓa ziri gazahay ati ngi dubahaya,
a roko ndilam nguruf nguruf,
ar li ngi luuma ngir walahayaya.
12Ziri tuwa, a ɓaka mumuŋ taŋhaya:
«Gwat ngi zum ati ngi si amaka?»
A roko ndilam nguruf nguruf,
ar li ngi luuma ngir walahayaya,
kaɓa mizli mulumam waˀa le,
a roko micam gumbuˀ gumbuˀ
a didak mumuŋ taŋhaya.
13Aw Zeruzalem ɗu Mimezle,
i gi sedewo wana ar ka aruŋ maka?
I sa wa ɓi ɗik ati ɓi wana aruŋ maka?
I sa ɓuw di i ɓi wana ngi tikin ɗike,
ɓa ki taˀa tuwuyo ka? Siyoŋ walahay Mimezle.
Kay, hiryi mulumuw na,
naŋ haɗa kaɓa firndiw ngi mubuliy.
Mambuluw gu i waka?
14Mijiviɗ ɗikey ara puram gwat ti kleŋ vur ka ngbaŋ,
amma i ɓi ngi slir, yo i ɓi ngatara lambaˀ.
Tˀanta njikukuw malambaˀ ɗike ta,
anja ani ki mbiɗa joˀ ɗike le zleˀe.
A ra puram gwat ti kleŋ vur ka,
amma a tilam di i mi ti ɓi ngi slir ati tikina vu.
15Mizli macohom a jiviɗ gar na,
ara kiɗam kirpasl, asi ɓi ɗike,
a fuyukom deŋ, a hizigiɗam hirnga
ar ka Zeruzalem Mimezle mihiryi na,
a ɓam: «Mazilam zleˀe:
mukuy teˀe, mumul ngi duniya gar tuwa,
i walahay hana vuna ya?»
16Mesene ɗikey gar,
a ɓam ɓi ngi jigina mi avu ka.
A fuyukom deŋ, a ngirɗam sliŋ,
a ɓam: «I ndakaŋ le suɗuk.
Yawwa! Hana i hin ndra makutukoko tuwa so:
I nduloko le anga, i ra puraka.»
17Bumbulvuŋ a ga gwat naŋ muwulka ngi gi na le,
ɓi naŋ ɓi micica zle ngadana ta na, a ga le.
A nguɓuca gwataya, manja pura ircece.
A ga ɓa mesene ɗik a mumul,
vur ka misi ar bonoy na,
a ska gidaŋ ngi mizli mazliram ti ka tahaya le.
18Mizli Zeruzalemey ara tuwam
jom arleˀe ng'avu Bumbulvuŋ.
Duvuɗ ati papas gar na,
Gala ngi Siyoŋ Mimezle,
pula tuwuy ɗik a ɓul kol kol ka mizaw.
Anta puluw ki musuk vu neˀ le ta,
tuwuy ngi hiri ɗike, a cici deŋ le ta.
19Ka mupuɗuk le ti duvuɗ gar na,
slikiɗi, tuwuy ng'avu Bumbulvuŋ.
Zuko ɓi ngir mevel ɗike,
kaɓa yam a mbuŋ Bumbulvuŋ.
Tumbuloŋ haŋ sik ng'avaŋ,
ɓa ngi laha siifa ngi ziri memeɗe ɗikey,
mandilam nguruf nguruf ti may
ar mazlaka jiviɗey gar na.
20Bumbulvuŋ ɗu, pura ɗi,
mbur ka magi di kanah vuna i waka, inga pura.
Ɓa ngwasay a humbuɗaka ziri taŋhay
mugundur gundur, taŋ mawuɗam taŋ na, a zlir le kwa?
Masayay ati mijiviɗeye,
ɓa mizli a kiɗaka taŋ
daˀ ar hay ngi ɗik ka Bumbulvuŋ na, a tiɓaŋ le kwa?
21Ziri ziri aruŋ ati midigilahaya,
a roko a jiviɗ saɓaɓa a ruwuy,
ziri diili ati gawla ɗuwoyo,
a roko siɗfil siɗfil a ruwuy, mikiɗa ti maslalam.
Ki ngizla mizli le tapas ka miji mevele,
ki slaˀay ngi mizli le manja ircece.
22Mizli ngi zluwun ti taŋ, mugun hirnga ɗu na,
ki zilo taŋ ng'ar ya,
kaɓa mazilam mizli ng'ar muguzlum.
Tapas ji mevel ngi Bumbulvuŋ,
wuy ta mizli a laham le,
wuy ta a ndiram le ti siifa na, anta mata.
Ziri ya masirka taŋ ati ya magila taŋ na,
mesene ɗu a kiɗa mi taŋ le teleleˀ.
Currently Selected:
TUWUY 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.