ZAKARI 14
14
Bumbulvuŋ a sa zum buy asi ruwuy gar
1Zeruzalem, hin ara ndilawa ani, i hin ngi Bumbulvuŋ,
tapasa, mizli a sa wunkaka zlili ɗike daˀ a mihiri ɗik vuna si. 2Asi mike na, i sa kuso sukwi ngi mizli gar a ciki Zeruzalem ɓa ngi zla kiɗa vu. A sa tiɓaka walahaya, a sa hilaka gwat ngi hayaya, a sa hinam ti ngwasaya ti gidaŋ. A sa jaka mizli ngir walahaya cah nga ruwuy mulak, amma mizli masa ndiram neˀ na, t'anta sa ngizlam ta.
3Bumbulvuŋ a sa zla kiɗa mizli tayna,
kaɓa angi hin naŋ makiɗ vu,
kaɓa angi hin ngi vurum.
4Tapas nah na, a sa ɗuva saraya taˀ ar muwã tutumbur mupuɗak ar Zeruzalem, kini tisi pas ngi miprik na. Muwã tutumbur a sa cir puɗak a wuzla cuw, zle tisi pas ngi miprik, hã tisi pas ngi pastaˀa, a sa tiri sozo madiɗa ndah ndah. Muwã micah mekeleme, a sa kirih ngir tir vay muŋ, yo numuŋ kwana ngir tir vay ruwuy.
5Dar kisa kilam tir sozo misi ɓaˀ ar wala muwã ɗuwoyo, vur sozo a sa ndil sesẽŋ a Asal. Ki sa kilam kaɓa kum mikilam zleˀe ti hirwuy muwus ti hin ngi zumabuy ngi Oziyas, buy Zuda. Akẽh na, Bumbulvuŋ, Buymisemuŋ ɗu a sa ndilawa, mizli naŋhay mipal na gar sesek aseˀeŋ.
6Tapasa, li minjahha anta mata, ko li anta sa gi yaɓyaɓ ta, yo ko yam anta sa tisl, hã a ji ngboˀ ngboˀo ta.
7A sa gi i hin mipal avu mekelemeye, i Bumbulvuŋ misina tewle. Papas malla duvuɗ anta gi mata, amma hirak ti pastaˀ na, li a sa pusluɗ njahha.
8Tapasa, miviɗiviɗi ngi yam a sa bo ti Zeruzaleme, yam a sa ɓul cah ngir tisi pas mabawa, yo cah kwana ngir tisi pas madiɗi. Ti hinpas ati viya kwana, a sa ndir kanah. 9Dar Bumbulvuŋ a sa biga vu naŋ i buy madiɗa ngi si ruwuy gar. Tapasa, Bumbulvuŋ a sa ndir i naŋ tewle, yo slimiɗ inga naŋ tewle.
10Hirwuy gar na, a sa tiri li micay, zle a Geba, hã a Rimoŋ a Zeruzalem tir vay ruwuy naŋ. Zeruzalem a sa zuɓ ɗingir a muŋ daˀ arleˀe, zle a mizlingre Benjameŋ, hã ar li ngi mizlingre magala zleˀe, sesẽŋ a mizlingre misi a mivay ngi moholoy mira zliram, yo zle avu hay madiɗa ngi Hananeyel, sesẽŋ ar li ɗuco gwat ngi buy.
11Mizli a sa pam anga,
ngizla vu ngi vul da Bumbulvuŋ anta sa gi mata,
Zeruzalem a sa ndir setette.
12Mizli gar masa soko gi vurum ti Zeruzalem na,
jiji naŋ masa ngizla taŋ ti naŋ na anihĩ:
ar taŋ muroko deŋ ti sar taŋ tekeɗe kwana,
useˀ ngi vu taŋ a sa zĩˀĩ,
hiri taŋhay a sa zãˀãm daˀ ar mododok hiri taŋhaya, yo irne taŋhay a sa zãˀãm a balama.
13Tapasa, Bumbulvuŋ a sa yo taŋ muɗa didak a wuzla taŋ,
mbur gar a sa zliga cil naŋ,
a sa kiɗam vu ar wala taŋ.
14Zudahay a sa kiɗam vu tisi Zeruzaleme.
Akẽh na, a sa cikilaka zlili ngi sukwi ngi mizli gar cikal cikal zikitiŋ arleˀe: ɓiri tapasl tapasl, ɓiri bara, zana zikitiŋ haɗa.
15I jiji misi purla masa ndilo avu pilisey, avu zungu-pilesey, zlogomohoy, zunguhoy, na zle avu ginew misi ar walahay guɗuk taŋ gar si. I jiji mupurla mingizla mizli na.
16Akẽh na, mizli mindiram ti siifa, miram zleˀe gar nga kiɗa vu ati Zeruzaleme, vur vi gar na, a sa ra huruk hurukam ti miliwis a mbuŋ buy Bumbulvuŋ misi gidaŋ wãˀa, yo ɓa ngi gi muguzlum ngi Guɗukoyo.
17Amma sukwi ngi mizli ngi si ruwuy misi t'anta sa ram nga huruk huruk a mbuŋ buy Bumbulvuŋ misi gidaŋ wãˀa ta na, vuŋ anta sa gi asi ruwuy taŋ ta.
18Da mizli Eziptehey
anta ngumam ru nga Zeruzaleme ta na,
jiji Bumbulvuŋ masa kiɗa sukwi ngi mizli maram nga gi muguzlum ngi Guɗukoy na ta na,
a sa kiɗa taŋ ti naŋ ta kwa?
19Ezipteheye, bonoy ngi kuti taŋ i nah, yo sukwi ngi mizli gar misi t'anta sa ram nga gi muguzlum ngi Guɗukoy na ta na, bonoy ngi kuti taŋ kwana i nah.
20Tapasa, ko mawuyar ngi si ˀay pilisey kwana, a tohom mingiɓi avu t'ani: «Muvula le da Bumbulvuŋ». Misirgaɗ ngir hay ngi Bumbulvuŋhoyo, a sa ndiram kaɓa sikiɗ ngi pusla gwat a mbuŋ li gi mikuli.
21Misirgaɗ misi ada a Zuda malla a Zeruzalem gar na, a sa vulaka taŋ da Bumbulvuŋ misi gidaŋ wãˀa. Mizli gar masa soko ti gwat taŋhay ngi gi mikuli na, a sa gam slra ti misirgaɗ tayna ngi di gwat ngi mikuli taŋhay. Tapasa, ar hay ngi Bumbulvuŋ misi gidaŋ wãˀa, migi tererehey anta mata.
Currently Selected:
ZAKARI 14: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.