Matiye 28
28
Yesu mislikiɗ ti wuzla mumucahay
(Yo pura Mark 16.1-10; Luk 24.1-12; Zaŋ 20.1-10)
1A dirba sabat, ɓa li a wun i dimas na, Mariya ngi Magdala ati Mariya mekelem, a soko nga pura zivi. 2Gurjik si na, hirwuy a zla a wus hiɓik hiɓik haɗi. Modro ngi Bumbulvuŋ a po sar paɗ a muŋ, a gidigila ɗugur misi a mi zivi tuwa murvay, a cifi araŋ. 3Modro vuna a wucuɗ ka vuŋ, zana naŋhaya babara ndarara ka gugumay. 4Soje mijigina zivihey tuwa muzluwunam di na, a jijikam ngbaˀ ngbaˀ, hã a mburom kitikpak kitikpak ka mbur mumuca. 5Amma modro a ɓa ngwasay tuwa: «Kumo, ki zluwunam ta. Yi si na le, ki sipam di i Yesu midiraka avu dum mizlira na. 6N'anta aka ta, a slikiɗ le ka naŋ miɓa zleˀe tuwa. Soko puraka li naŋ miɓaˀ ara zleˀe na. 7Wurenna so na, aram kutum, ɓaka ɓi nah da mizli ngi seˀeheye: «Yesu a slikiɗ le ti wuzla mumucahaya, ara ru dumbuŋ ar kum nga Galile. Ki sa puraka a diga. Ɓi ya muɓukum di na, i hana.» 8Ngwasay tuwa a bam kutum ti mizive, ara zluwunam, ara mumulom haɗi cici ma. A kilam ti ɓi nah da mizli ngi seˀeheye. 9Neˀ na, Yesu a so ji ti taŋ hirnga, a ɓa taŋ: «Zuy zuy kum aya!» Ngwasay tuwa a girdaˀam ng'avaŋ, a jakaŋ debe debe avu sara. 10Dar Yesu a ɓa taŋ: «Ki zluwunam ta. A ra ɓaka sukum ɗuwoyo, sey a ram nga Galile, a sa purikiy a diga.»
Ɓi ngi soje mijigina zivihey muslufaka
11Ngwasay tuwa, taŋ maram a jiviɗe na, mekelemey a wuzla soje mijigina ziviheye, a soko ng'ar walahay. A slufaka labara nah gar da masay madiɗahaya. 12Masay madiɗahaya kwana, a kusom ati mizli micawwa ngi Yudeheye, a ngilam wuy. A dirba nah na, a vulaka dala haɗi da sojeheye, 13a ɓaka taŋ: «Ki sa ɓam na: ‹Hirak ti ndra mahinjam ngi duvuɗ na, mizli ngi seˀehey a soko, a huloko vagay naŋ le.› 14Da ko buy miwi li a sa cin ɓi nah le kwana, i ndra masa mucakaŋ mevele, i sa gaka ɓi nah ti wer ɓa didak a muɗukum ta.» 15Dar sojehey a tiɓaka dala, a gaka kaɓa taŋ miɓaka taŋ di tuwa. Naŋ kine, ɓi nah a wuh a wuzla Yudeheye gar hã dana.
Yesu mibiga vu da mizli ngi seˀehey
(Yo pura Mark 16.14-18; Luk 24.36-49; Zaŋ 20.19-23; Slra 1.6-8)
16Mizli ngisi Yesu mukuruˀ ngaŋ kaˀhaya, a ram nga Galile, a muwã, Yesu miɓa taŋ di zleˀe tuwa. 17Ti taŋ mupuraka na, a huruk hurukam a mbuŋ naŋ, amma numuŋhoy ara wulkam cuw cuw ɓula. 18Joˀ Yesu a kirih ng'avi taŋ, a ɓa taŋ: «A vulikiy madiɗa le ngi wa muŋ ati hirwuyo gar. 19A ram ng'avu sukwi ngi mizli gar so, tiram taŋ mizli ngi si yahay: Caka taŋ ar yam ti slimiɗ ngi Cine, ngi Mangal ati ngi ˀUf Mipal. 20Dubunaka taŋ ɓi ya muɓukum di ɗaˀ le na gar, ɓa a jaka a hirnga. Yo ya, y'ada ati kumo vur hin gar hã avu kiɗa mi ngi duniya.»
Currently Selected:
Matiye 28: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.