Matiye 27
27
Miram ti Yesu nga mbuŋ Pilat
(Yo pura Mark 15.1; Luk 23.1-2; Zaŋ 18.28-32)
1Ngi miprik prik naŋ na, masay madiɗahay ati mizli micawwa ngi Yudehey a ngilam wuy ar Yesu, ɓa a gakaŋ kiita ngi mucu. 2Joˀ a juwakaŋ, a ram di, a vulaka da Pilat, buy miwi li.
Muc ngi Yudas
(Yo pura Slra 1.18-19)
3Yudas muvula Yesu ɓa a jaka tuwa, naŋ mupura a gaka kiita ngi muc le da Yesu na, a zil marava, a mi ti suloy mizli ngir makir tuwa da masay madiɗahay ati mizli micawwahay a muŋ. 4A ɓa taŋ: «Ya muvula mbur migi gwat ta, ɓa a kiɗaka vagay na, yi gi mungra le.» Amma taŋ a mbiɗakaŋ di: «A ca ndra le kwa? Ka gi di.» 5Yudas a zliɗa dala tuwa ng'ar hay ngi Bumbulvuŋ, ara luwa vu naŋ. 6Masay madiɗahay a hilaka dala tuwa, a ɓam: «Ɓa i paka dala hana nga wuzla zlili ngir hay ngi Bumbulvuŋ na, ɓi ndra a pula jiviɗ nah ta, asi i dala ngi pumbus ngi mburu.» 7A dirba taŋ mingilam wuy ar dala nah na, a hiɗikam di guva avu mbur mindira gwatay, ɓa ngi dika mulakay. 8Vurˀe, a zilaka guva nah «Guva ngi pumbus» hã dana aruŋ. 9Naŋ kine, ɓi mijiviɗ Zeremi miɓa zleˀe na, a gi le muduba, a ɓi na: «A hilam suloy kukur makir, i dala mizli Israyeley mungiɓamˀay ɓa a hiɗikakaŋ ti naŋ. 10Joˀ a hiɗikam di guva avu mbur mindira gwatay, kaɓa Bumbulvuŋ miɓiy di zleˀe.»
Pilat mucufuɗa Yesu
(Yo pura Mark 15.2-5; Luk 23.3-5; Zaŋ 18.33-38)
11A ram ti Yesu le a mbuŋ buy miwi li, joˀ buy miwi li a cufuɗaŋ: «Ki buy ngi Yudehey kwa?» Yesu a mbiɗaŋ di: «Ki ɓa le ta kwa!» 12Amma masay madiɗahay ati mizli micawwa ngi Yudehey majakaŋ ɓi na, ko Yesu a mbiɗa neˀ ta. 13Dar Pilat tuwa a ɓaŋ: «Sedewo magaka ar kahana gar na, k'anta cine ta kwa?» 14Amma Yesu a mbiɗaŋ mi ko pal ta, hã a zuma hirnga da buy miwi li haɗa.
Migaka kiita ngi muc da Yesu
(Yo pura Mark 15.6-15; Luk 23.13-25; Zaŋ 18.39—19.16)
15Angi muguzlum Pak gar na, buy miwi li a sirik le, naŋ da pul mbur dangay da zigiduwo mbak le, mbur taŋ muwuɗam le. 16Ti di nah na, mbur dangay ada, slimiɗ naŋ a zil haɗi, a zilaka Yesu Barabas.#27.16 Mekelemey haɗi a tohoko aka: Barabas tewle. 17Joˀ Pilat a cufuɗa zigiduw mukus kos kos tuwa: «Ki wuɗam i pulukum waka? Yesu Barabas kwa, malla Yesu mazilaka Kristu#27.17 Kristu ti mi Grek a wuɓ a ɓi: Bumbulvuŋ muwunaŋ i buy. na kwa?» 18Pilat a si na le, a vulakaŋ Yesu asi ara gam di suloŋ. 19Pilata, ti naŋ muar li gi kiita na, ngwas naŋ a slino ng'avaŋ, a ɓaŋ: «Ko ki ci ar ɓi ngi mbur mijeŋ hana ta. Asi ngi duvuɗ ngadana, yi musuwun le, ɓi naŋ a vuliy wuluk le haɗa.» 20Amma masay madiɗahay ati mizli micawwahay a paka mi da zigiduw ɓa a cufuɗam, a pulaka taŋ Barabas, amma ɓa a kiɗa Yesu vagay. 21Buy miwi li a zla a cufuɗa taŋ ma: «Ki wuɗam i pulukum wa asi mizli mucuw tayna ka?» A mbiɗakaŋ di: «Pula ndra Barabas!» 22Pilat a cufuɗa taŋ: «Na, Yesu mazilaka Kristu na, yi sa ga mbri ska?» Taŋ gar a mbiɗakaŋ di: «Dira avu dum mizliraŋ!» 23Pilat a ɓa taŋ ma: «Na, a gi gwat malambaˀ mi ska?» Amma taŋ a tilam mi ti gidaŋ fineˀ misi zleˀe ma jak, a ɓam: «Dira avu dum mizliraŋ!» 24Pilat a pura na, a gi gwat ko neˀ gu mata, yo mizli a wuɗ a slikiɗam ɓi, a wuɗ yam, a buna haŋ ceɗ ceɗ a mbuŋ zigiduw gar, a ɓi: «Mbur hana, zayɓi ngi muc naŋ anta a hirnga ɗu ta! Hana i ɓi kum.» 25Mizli gar a mbiɗakaŋ di: «Anja zayɓi ngi muc naŋ a mbiɗi nga hirnga ndra ati ziri ndrahay.» 26Dar Pilat a pula taŋ Barabasa, a ɓi ɓa a sliɗaka Yesu. A dirba nah a vula taŋ di ɓa a dirakaŋ avu dum mizliraŋ.
Sojehey misingiram ar Yesu
(Yo pura Mark 15.16-20; Zaŋ 19.2-3)
27Joˀ soje ngi Pilatay a ram ti Yesu ngi hay buy miwi li, a cikiloko cil taŋhaya cek gun hirnga naŋ. 28A cukokoŋ zanahay avra, a kakaŋ jibe gagaza. 29A fuɗam loppol ngi hadaw, a cakaŋ di a hirnga waɗ a vulakaŋ lavaɗ kaw tir haŋ hazumo. A dilkam a mbuŋ naŋ, a singiram angaŋ, a ɓakaŋ: «Zuy zuy aya, Buy ngi Yudehey!» 30A tufakaŋ tazlay, a tiɓaka lavaɗ tuwa, a kiɗakaŋ ti naŋ a hirnga. 31A dirba taŋ misingiram anga na, a cukoko jibe gagaza tuwa avra, a kakaŋ zanahay a muŋ, a ram di nga dir avu dum mizliraŋ.
Midiraka Yesu avu dum mizliraŋ
(Yo pura Mark 15.21-32; Luk 23.26-43; Zaŋ 19.17-27)
32Ti taŋ mabam le na, a jam hirnga ti mbur ngi hirwuy Sirene, a zilaka Simoŋ. A tikakaŋ ˀay ɓa a zuɓa dum ngi dira Yesu, a jijiraŋ. 33A ndilam aŋgi li mazilaka Golgota, mbiɗeˀvra: «guduguzluŋ hirnga». 34A vulaka mbaazla milihiɗa ti meɗelek#27.34 Meɗelek nah, zliv a tisla vu ngi mburo zuyyo, ɓa a si bonoy haɗi mata. da Yesu. Yesu mititila titileˀ na, a ngum sa ta. 35A dirba taŋ midiraka na, a kiɗam caca ɓa a wunkaka zana naŋhaya. 36Dar a cifam joˀakẽh ɓa a jiginakaŋ. 37Ɓi taŋ migakaŋ kiita ngi muc aseˀe vuna, a tohoko toh toh waɗ law avu dum a hirnga naŋ. A tohoko ani: «Mbur hana i Yesu, buy ngi Yudehey.» 38A diram mufuyvuhoy le cuw a ciki Yesu vuna ya, pal tir vay hazum, pal mekeleme tir vay gula. 39Joˀ mizli macohomo, a hizigiɗam hirnga, a zakaŋ, 40a ɓam: «Ka mambuzla hay ngi Bumbulvuŋ ɓa ki ndira hiri naŋ a muŋ ar hin makir tuwa, da ki Mangal ngi Buymisemuŋ na, laha hirnga ɗik vuna ti haŋ ɗike so, yo po sar tir dum mizliraŋ!» 41Buy ngi ɓimujuwahay, mizli micawwahay ati masay madiɗahay a singiram anga kanah ya, 42a ɓam: «A laha mizli mekelemeye le ɓula, amma a laha hirnga naŋ gu ta kwa? I buy ngi Israyel ta kwa? Anja a po sar wurenna tir dum mizlira, ɓa i sa tiɓakaŋ so. 43A pula vu naŋ le mbak da Buymisemuŋ, asi a ɓi le: «Yi Mangal ngi Buymisemuŋ!» Na, da Buymisemuŋ ada wuɗaŋ na, anja a lahaŋ wurenna muduba so ayɗi!» 44Ko mufuyvuhoy midiraka taŋ bumoˀ ati naŋ vuna kwana, ara zakaŋ ya.
Muc ngi Yesu
(Yo pura Mark 15.33-41; Luk 23.44-49; Zaŋ 19.28-30)
45Pas a gi le deŋ, luvuŋ a gi asi ruwuy keɗeɗe, hã a ndila pas ngi ɓula away ngi hay. 46Hirak ti pas ngi ɓula away ngi hay tuwa na, Yesu a til mi ti gidaŋ: «Eli, Eli, lemasabaktani?» Mbiɗeˀvra: «Buymisemuŋ ɗu, Buymisemuŋ ɗu, ki puliy fuk vur mike?» 47Mekelemey a wuzla mizli misi akẽh micinaka na, a ɓam: «Pura, naŋ mazila Eli!» 48Mbur pal asi taŋ a kil kutum, ara yupo gugumay ar mbaazla mikwerek, a ngika ngik a mi lavaɗ, dar a sikaŋ di ɓa a saŋ. 49Amma mizli mekelemey a ɓam: «Ɗagay, purukum di, da Eli vuna a sa so lahaŋ kwana!» 50Amma Yesu a til mi ti gidaŋ ava ma, dar a mucu. 51Hirak ti nah na, godo misi ar hay ngi Bumbulvuŋ a Zeruzaleme, a ngir puɗak a wuzla cuw, zle a muŋ sesẽŋ a ruwuy. Hirwuy a wus, mandazlay muwãhay a ciram puɗak puɗak. 52Zivihey a wunam, mizli ngi Bumbulvuŋhoy haɗi mumicam zleˀe, a slikiɗam a muŋ. 53A dirba Yesu mislikiɗ na, a boko tir ziviheye, a cam ng'ar walahay madiɗa mipala, hã mizli haɗi a puraka taŋ le. 54Sojehey ati madiɗa taŋ, taŋ majiginaka Yesu bumoˀ tuwa mupuraka hirwuy muwus ati gwatay migam gar na, a ga taŋ zluwun le haɗi, a ɓam: «Mbur hana i Mangal ngi Buymisemuŋ zleˀe gisiŋ gisiŋ!» 55Ngwasay ada haɗi akẽh zar neˀe, ara puram hiri. Tˀada sipaka Yesu zleˀe zle a Galile ti gaŋ gwat naŋ mawuɗ gar. 56Mariya ngi Magdala, Mariya mumuŋ ngi Zak ati Zozef waɗ mumuŋ ngi ziri ngi Zebedeheye, t'ada a wuzla taŋ aya.
Mikaka vagay ngi Yesu ar vigiɗi
(Yo pura Mark 15.42-47; Luk 23.50-56; Zaŋ 19.38-42)
57Ngi pastaˀ wãˀ na, mbur misi zlili ngi ruwuy Arimate a ndilawa, a zilaka Zozef. Naŋ vuna kwana a tiri mbur ngi si Yesu le aya. 58Aru ng'avi Pilata, a cufuɗa ɓa a vulaŋ vagay ngi Yesu. Pilat a ɓi ɓa a vulakaŋ di. 59Zozef a zuɓa vagay ngi Yesu, a tuwuɗa ti gabaga manawayaŋ mislirkeɗ. 60A ra ka ar vigiɗ naŋ muguro hĩˀĩ da naŋ wureˀ aruŋ ar mandazlay muwã. Dar a gidigilo ɗugur madiɗa, a disla mi naŋ ti naŋ, a cuh. 61Ti nah na, Mariya ngi Magdala ati Mariya mekeleme, t'ada joˀakẽh, hiri pulaˀ pulaˀ nga mi zivi vuna.
Soje mijigina zivihey
62Put ngi miprik naŋ na, i hin ngi juwa vu ngi sabat. Masay madiɗahay ati Farisahay a ram arleˀe ng'avu Pilata, 63a ɓakaŋ: «Buy, i wulkam le keŋ ar ɓi ngi mbur misi slir nah, ti naŋ mumuc t'aruŋ zleˀe na, a ɓi: «Angi hin mimakir naŋ na, yi sa slikiɗi.» 64Zuwen ɓi, ɓa sojehey a jiginaka zivi hã a ndila hin makir, vur mizli ngi seˀehey masara huloko vagay naŋ. A dirba nah, a sa ɓaka mizli: «A slikiɗ le.» Naɓa slir taŋ ngi dirba nah na, a sa funa ngi dumbuŋ wãˀ le.» 65Pilat a ɓa taŋ: «Sojehey anihĩ, aram, jiginaka zivi ka kum mawuɗam.» 66Dar ara slurɓaka ɗugur ngi mizivi tuwaŋ, waɗ a pam sojehey sek ɓa a jiginakaŋ.
Currently Selected:
Matiye 27: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.