LEVIHEY 3
3
Mikuli ngi ngiɓiˀay
1Da mbur a wuɗ le ɓa a gi mikuli ngi jumoˀay ati ya Bumbulvuŋ ti sla na, sey a jo di i gusoŋ malla bulkoŋ manja hereweɗ ava, nga mbuŋ ɗu. 2Mbur vuna, a buca haŋ bac a hirnga ginew naŋ muso di tuwa, dar a slaka ˀay naŋ a mizlingre guɗuk ngi zlir ti ya Bumbulvuŋ. Masayay, ziri ngi Aroŋhoyo, a kucaka pumbus da ciki li gi mikuli gun gun zlar. 3Mikuli ngi ngiɓiˀay na, a wuɗam ngi zlumo, i mungul misirit ar jofo, waɗ ngi vi tanday naŋ.
4Yo ɗugur dubahaya cuw taŋ jom ti mungul naŋhaya, meficek naŋhay milaw lawa, waɗ muguzlurvuy ngi mevele torro bac ng'avu ɗugur dubahaya. 5Akẽh na, ziri ngi Aroŋhoy a wuraka taŋ ar li gi mikuli, jom ng'avu mikuli ngi zlum ti zlum miɓaˀ ar dum miɗiyam di vu ar li gi mikuli tuwa. Hana i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ. 6Da mbur a wuɗ le ɓa a gi mikuli ngi ngiɓiˀay ti tumuŋ malla ti ˀaw na, sey a jo da ya Bumbulvuŋ i mizile malla mongoso, manja hereweɗ ava. 7Da mbur a so di i tumuŋ ngi vulo na, a so di nga mbuŋ ɗu. 8Mbur a buca haŋ bac a hirnga ginew naŋ muso di tuwa, a slaka ˀay naŋ a mbuŋ guɗuk ngi zlir ti ya Bumbulvuŋ, dar ziri ngi Aroŋhoy a kucaka pumbus naŋ da ciki li gi mikuli gun gun zlar. 9Mikuli ngi ngiɓiˀay tuwa na, a vulam kaɓa gwat ngi zum mizlam zlam wãˀ da ya Bumbulvuŋ i li misi malay: dangwala paɗ wãˀ, buk avu ngbalalaŋ, mungul misirit a hirnga gwat ngi kwacayaya wãˀ. 10Yo ɗugur dubahaya cuw taŋ ti mungul naŋhaya, jom ti meficek naŋhay milaw lawa, waɗ guzluzluk ngi mevele torro, bac ng'avu ɗugur dubahaya. 11Akẽh na, masay a zluma taŋ ar li gi mikuli. Hana i gwat ngi zum mizlam zlam wãˀ da ya Bumbulvuŋ. 12Da mbur a so di ngi vulo i ˀaw na, a so di nga mbuŋ ɗu. 13Mbur muso di vuna, a buca haŋ bac a hirnga ˀawa, a sla ˀay naŋ daˀ a mbuŋ guɗuk ngi zlir ti ya Bumbulvuŋ. Dar ziri ngi Aroŋhoy a kucaka pumbus naŋ da ciki li gi mikuli, gun gun zlar. 14A vulam kaɓa gwat ngi zum mizlam zlam wãˀ da ya Bumbulvuŋ na, i mungul misirit a hirnga gwat ngi kwacayaya wãˀ, 15yo ɗugur dubahaya cuw taŋ jom ti mungul naŋhaya waɗ meficek naŋhay milaw lawa, guzluzluk ngi mevele torro, bac ng'avu ɗugur dubahaya. 16Dar masay a wura taŋ ar li gi mikuli. Hana i gwat ngi zum mizlam zlam, misi zĩˀĩ naŋ a tisliy mevel da ya Bumbulvuŋ. «Li misi mungul mungul gar na, inga ya Bumbulvuŋ. 17Mungul ati pumbus gar na, kum anta sa zumaka ta. Hana i ɓimujuwa avu kum, ar li wanaka gar kum masa cifam anga na, anta mbiɗi ta, a ndir avu dideˀ avu dideˀ kumoy hã ngi caˀa kine.»
Currently Selected:
LEVIHEY 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.