LEVIHEY 2
2
Mikuli ti gwat ngi migam
1Da mbur a wuɗ le ɓa a so ti gwat ngi gi sedege da ya Bumbulvuŋ, i gwat ngi migam na, sey a hil hapa, a pi mal sekke angaŋ, waɗ mukuturɓuy ngi zlum ti zlum sek angaŋ, 2ar di da masayay, ziri ngi Aroŋhoy. Hapa mipam mal ara tuwa na, masay a hil ngbal haŋ kuy kuy, waɗ mukuturɓuy ngi zlum ti zlumo paɗ wãˀa. Gwat ngi sedege nah na, a zilaka ‹wuluk keŋ›. Hana i sedege mizlam zlam wãˀ, misi zĩˀĩ naŋ a tisliy mevel da ya Bumbulvuŋ. 3Gwat migam di sedege tuwa, mindir is naŋ da Aroŋ ati ziri naŋhay. Hana i gwat mipal wãˀ. Asi a bo tivi gwat ngi zum mizlam zlam wãˀ da ya Bumbulvuŋ. 4Gwat ka maso di ngi vul da ya Buymisemuŋ, da i maɗaf manja is ara mida ar li di ɗaf na, sey i mufukuɗa ti mal waɗ tos tos ar vu malla i helelem mikefer kefer, waɗ pay pay mal ava. 5Da gwat ngi vul ngi gi sedege i mususulo ar ɓiri muputikay na, sey i hapa manja ˀis ara, mufukuɗa ti mal. 6A ngilaka le ɓuluˀ ɓuluˀ na, a pakaŋ mal, naɓa i sedege ngi gwat ngi migam. 7Da gwat ka mavula ngi gi sedege i mida ti magayak muputikay na, sey a lihiɗaka hapa nah ti mal. 8Gwat ngi sedege ka milihiɗa kanah ngi vul da ya Bumbulvuŋ tuwa na, ki ru di da masay, dar naŋ kwana a kirih di ng'ar li gi mikuli. 9Masay a wuɗ cah avu gwat ngi sedege mazilaka ‹wuluk keŋ› tuwa, a wura ar li gi mikuli. Hana i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ. 10Gwat ngi vulo, is naŋ a ndir da Aroŋ ati ziri naŋhay. Nah na, i gwat mipal wãˀ, asi a bo tivi gwat ngi zum mizlam zlam wãˀ da ya Bumbulvuŋ. 11Gwat muvula ngi gi sedege da ya Bumbulvuŋ gar na, anja i manja ˀis araŋ. Naŋ kine, gwat kum mavulaka ngi zlum da ya Bumbulvuŋ na, ki gam ˀis malla mam ara ta ndiɗaˀ si. 12Gwat micikiɗeffe ngi migam kumoyo, ki soko taŋ ngi vul da ya Bumbulvuŋ ɓula. Amma li zluma gwat ngi vul da ya Bumbulvuŋ, ɓa zĩˀĩ naŋ a tisliy mevel na, anta zlumaka micikiɗeffe ngi gwatay ara ta. 13Gwat ngi migam ngi vul da ya Bumbulvuŋ gar na, sey ki gam mandaŋ geˀ le angaŋ. Gi mandaŋ nah na, ki puraka kaɓa ɓi ngi sefel ta, asi mandaŋ a bigi jumoˀay nga ya Bumbulvuŋ ati kum. Gwat ka mavula da ya Bumbulvuŋ gar na, sey ti mandaŋ aseˀeŋ. 14«Gwat ngi vul kum, ngi sedege da ya Bumbulvuŋ, da i gwat micikiɗeffe ngi migam na, sey ki soko di i hirnga ngi daw mufuko naŋ fok fok waɗ yeˀ yeˀ le. 15Ki sa pakaŋ mal pulaˀa, waɗ mukuturɓuy ngi zlum ti zlum sek araŋ. Hana a tiri le i gwat ngi vul mubo tivi gwat ngi migam. 16Mineˀ muwuɗam avu daw mingirwa, avu mal waɗ mukuturɓuy paɗ wãˀ tuwa na, masay a wura ar mikuli mazilaka ‹wuluk keŋ›. Hana i gwat ngi zum mizlam zlam wãˀ da ya Bumbulvuŋ.»
Currently Selected:
LEVIHEY 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.