TUWUY 3
3
Ɓi ngi njaha hiri migisiŋ a wuzla bonoy
1Yi mbur misina bonoy,
asi Buymisemuŋ miji mevel, makiɗiy ti ganday.
2Yi mbur naŋ makiy ɓaˀ a mbuŋ,
aru ti ya ar luvuŋ, ar li minjahha ta.
3Ar hiipas gar na,
a mo ti haŋ ng'ar ya sar mbeˀ mbeˀe.
4Mefecek ngi vu ɗu ati kuturkuy ɗu,
a huro taŋ le hor hor,
a wuhiy tesleye le.
5Muwuŋ ati girey wal wala,
a kuso taŋ le zit zit gun hirnga ɗu.
6A piy hay ɗu ar luvuŋ,
kaɓa mizli mumuca misi zlezlehey.
7A guno hirnga ɗu ti mohol vur ya mabi,
a juwiy ti celelu madiɗaŋ.
8I widi i widi, yo i zil vu, gawla kilawa, gar ngataraŋ,
a disla slimiɗe, ɓa a cine diradibiɗ ɗu ta.
9A disla jiviɗ ɗu ti ɗugur madiɗahay,
a ngizli ti ya tir jiviɗ mikasl ta.
10Buymisemuŋ naŋ avu yakaɓa#3.10 urse i gwat misãmi ngi ruwuy nasarahay mazilaka ti mi taŋ ours, a bam vu ati luˀuf urs, magirdiˀ ngi ji gwat,
kaɓa mobor miwi vu le a dubakalaf ngi kutuko gwat.
11A ngizli ti ya avu jiviɗe,
a buˀiy baˀ murvay, a puliy ɗoɗok.
12A ngirɗa leke cǝǝt waɗ a ciciy deŋ,
kaɓa gwat ngi wi haŋ ava ti luvutu.
13Mbak a puliy mul ar giluwo
ti luvut ngir gulum naŋ cek ceke.
14Ani yi tiri le, ɓa mizli ɗuwoy gar
a singiram ar ya,
ɓa a zlikiy dimis vur hin gar.
15A mbiy le ndus ti gwat ngi ji mevele,
a wiy le duwlak ti gwat mitrəh kaɓa muwuŋ.
16A tikiy ˀay ngi humbuɗa ɗugur,
a ciy roh roh ng'asi fucu.
17A hizigiy le kileŋ avu ɓi ngi cifi zuyo,
cifi ar wuya, a puyukiy hirnga le.
18Joˀ yi ɓi: ɓi ɗu nga mbuŋ anta mata,
njaha hiri ɗu asi Bumbulvuŋ a kiɗ mi le.
19Wulka ɓi ngi hina hirnga ɗu ati liˀi ɗu lambaˀ na,
kay, i ɓi mitrəh, yo i muwuŋ avu ya.
20I wulka i wulka na,
joˀ vu ɗu a kiɗ tay tay a hur ɗu.
21Gwat ya mawuɗ a ndir keŋŋe ar wuluk ɗu, ani,
i gwat ya masa njih hiri aseˀe:
22Gi mezle mihaɗa ngi Bumbulvuŋ na, a kiɗ mi ta!
Wuɗa vu naŋ mihaɗa na, a kiɗ mi ta!
23Gi mezle naŋ, naŋ nawaya nawaya,
vur miprik gar.
Kay, gi teŋteŋ ɗike naŋ haɗa Buymisemuŋ ɗu!
24Yi ɓi ti kwacay ɗu: zlili ɗu i Bumbulvuŋ,
ya manjih hiri aseˀe na vurˀe.
25Bumbulvuŋ i mezle
avu mbur manjih hiri aseˀe,
avu mbur mihirdam hirdam aseˀe.
26Laha vu ngi Bumbulvuŋ na,
naŋ kuy ɓa mbur a njih hiri aseˀe ti mi teˀteˀe.
27Mburo, angi naŋ misi i zuŋ zuŋ aruŋ na,
a tiɓaŋ le ɓa a ɓusa bonoyo.
28Da Buymisemuŋ mitika ˀay le
da mburo, ɓa a ɓusa bonoy mulumaŋ le na,
anja a cifi baˀ murvay, a ndir lek leke.
29Anja a guɓ, mi durus da ruwuy,
asinta, njaha hiri ada aruŋ kwani.
30Anja a puka kwala da mbur macaŋ babarva,
anja zi a mbaŋ ndusu.
31Asi Bumbulvuŋ
naŋ anta pula mburo fuk ngi wãˀ ta.
32Ko da a ga le ɓa mbur a sin bonoy tekeɗe kwana,
naŋ da ti wuɗa vu haɗa na si,
asi gi mezle naŋ mihaɗa na.
33Naŋ maga ɓa mizli a hinam hirnga,
yo naŋ masa taŋ bonoy na,
anta mumul di ta.
34Da ara guzuvuraka mizli dangay
ngi si ruwuyoyo gar,
35gi jeŋŋe ngi mburo, da ara ngilaka ɓi nah
a mihiri ngi Buymisemuŋ Mimadiɗa wãˀa,
36da ara zluɓaka kiita ngi mburo na,
Bumbulvuŋ anta pura ta kwa?
37Miɓi le ɗaˀ, ɓa gwat nah a gi na i waka?
Sey da i Bumbulvuŋ miɓi le ɗaˀ le takwa?
38Ɓi mezle ati malambaˀa, a boko ti balam ngi Buymisemuŋ Mimadiɗa wãˀ takwa?
39Mbur mideŋ ti siifa, a mbul mi vur mike?
Anja mbur gar na, a mbul mi asi malambaˀ nga naŋ.
40Sey i puraka jiviɗ ndraˀahaya, i ɗumburoko taŋ kuy kuy,
yo mukum ng'avu Bumbulvuŋ so.
41Tulukum haŋ ndraˀahaya jom ati mevel ndraˀahaya
ng'avu Buy misi ar li ngi muŋ.
42Ndra, ndr'i slikiɗam ɓi le, i cinam mi ta,
na ka Buymisemuŋ,
ki pula mungra ndra ta mbrike!
43Ki ɗum ɗum ti mevel, ki sipa ndra nder nder,
joˀ ki ngizla ndra kuɗup, manja ircece.
44Ki ɗum ɗum ar gazlavay,
ɓa ki cine diradibiɗ ndra ta.
45A wuzla sukwi ngi mizli,
ki tiri ti ndra kitikil le, li ngi tuk avra.
46Mesene ndraˀahaya gar,
mi zlah zlah ng'ar ndra.
47Misirta ndra i zluwun ati heleleŋ,
waɗ muc ati hiryi.
48Hiri ɗu ceɗ ceɗ ti tuwuy,
asi mizli ɗuwoy a cam le ar bonoy.
49Hiri ɗu ara ɓul tuwuy, a sli sleˀ le ta,
asi muska vu anta,
50hã Bumbulvuŋ a sa guɓo paɗ a muŋ,
ɓa ngi pura ndra.
51Hiri ara jiy vik vik wãˀ
ti pura gwat magi avu ziri mongoso ngir walahay ɗu.
52Mesene ɗuwoyo, manja ya miga taŋ gwata si na,
ara ɓulikiy, a gidiɗikiy kaɓa ɗiyuw.
53A dikikiy titiri kine si,
a kam ɗuguroy risl ng'ar ya.
54Yam a ndiy le yik,
joˀ yi ɓi: kay, yi miziza le so!
55Bumbulvuŋ ɗu, i ra zilo slimiɗ ɗike,
baɗ ar mijileŋ ngi vigiɗe.
56Ki cine ˀay ɗu, ya mawidi na le: «Ya mamusuwun for for, yo ya maziluw ɓa ki kilo widi ɗu na, anja ki disla slimiɗe ta.»
57Tapas ya mukuw zil na, ki kiroho le,
joˀ ki ɓiy na: «Ki zluwun ta!»
58Haˀaw Bumbulvuŋ ɗu, ki ɗiya ɓi ɗu le,
ki mbiɗiy hirnga ɗu le.
59Bumbulvuŋ ɗu, taŋ mapikiy zluɓ nga hirnga ɗu na, ki ra pura,
anja ki ɗiya ɓi ɗu takwa!
60Taŋ mapulaka cuwal taŋ ti ya, yo taŋ magam gidiɓi ar ya gar na,
ki ra pura.
61Zi taŋ mazikiy ati gidiɓi taŋ vur ya gar na,
ki ra cine.
62Mizli mazliram ti ya tahaya, mingiɓi taŋ ati sisikaˀay taŋ gar na,
vur ya si, hã hiipas wãˀa.
63Taŋ muroko joˀ joˀ malla deŋ deŋ gar na, pura taŋ,
a zlikiy dimisi.
64Bumbulvuŋ, kisa gi ti taŋ,
weˀe avu gwat taŋ migikiy di na ya.
65Ga taŋ mevele gidaŋ ka ɗugur,
yo pa nisa vu ɗik na nga hirnga taŋ.
66Bumbulvuŋ ɗu, kisa sipa taŋ nder nder ti mevel,
waɗ kisa ngizla taŋ gar asi gazlavaya kuɗgulum.
Currently Selected:
TUWUY 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.