EZEKIYEL 47
47
Miviɗiviɗi ngi yam ar hay ngi Bumbulvuŋ
1Mbur tuwa aru ti ya tir li ci ng'ar hay ngi Bumbulvuŋ, keɗ na, yam ara bo vilvil tisi li ɗuva sar a miviŋ ngi haya, kini tisi pas ngi miprik naŋ, asi mbuŋ ngi haya, naŋ kini tisi pas ngi mipriki. Joˀ yam tuwa a pi sar ng'asi virzi ngi haya, tir vay hazum, vay ruwuy ngi li gi mikuli. 2A bi ti ya tir mizlingre vay muŋ. Akẽh a gun ti ya ti vra gun gun, hã avu mizlingre ngi mamay mupulaˀ hiri ng'asi pas ngi mipriki, keɗ ma na, yam ara ɓul tir vay hazumo. 3Ti mbur tuwa mibi kini ngir tisi pas ngi miprik, ti zeweɗ kaw a haŋ na, a wa weˀ weˀ na, metir skat skat zlum, a tuwuɗ ti ya yama, yama naŋ ti ya weˀ avu hiri sar. 4A wa weˀ weˀ, metir skat skat zlum ma, a tuwuɗ ti ya yama, yama naŋ ti ya weˀ a popurok. Akẽh na, a wa weˀ weˀ ava ma, metir skat skat zlum, a tuwuɗ ti ya yama, yama naŋ ti ya weˀ ti virzi. 5A wa weˀ weˀ ma na, metir skat skat zlum ma ni, yam tuwa i mizaw muduba, i tuwuɗa gu mata, asi yama naŋ jileŋ, sey ngi ki ti ki. I mizaw ngi tuwuɗ ta. 6A ɓiy na: «Ka mburu, ki pura le takwa?» Aru ti ya, a mo ti ya nga mi mizawa. 7Naŋ mumo ti ya na, keɗ na, widisey ngriɗ a ˀaydidikeye, ti ka ti ka cuw taŋ. 8A ɓiy na: «Yam misenna a ɓul kini ng'asi pas ngi mipriki, ara pi sar ng'ar sozo ngi mizaw Zurdeŋ, ɓa ara ci ng'ar mubuliye. Naŋ mici le ar mubuliy na, naɓa a tiri le i yam mezle. 9Dar akẽh na, li misi mizaw mici le ng'ara gar na, gwat misãmihey miwenewene ngi raˀa gar, a sa ndiram titiri. Kilifey a sa jam haɗa, asi yam nah a ndil sesẽŋ ar li ngi yam mezle. Ar li naŋ mapi ng'ara gar na, ara vula siifa da gwat ngi raˀahaya. 10Akẽh na, miji kilifey a sa cicam a mi mizawa, zle a En-Gedi, hã a En-Eg layim ɓa ngi sufa zuva taŋhay. Sukwi ngi kilif a sa ji haɗi kaɓa ar mubuliy. 11Amma yam madiɗahay, muyuŋ misla taŋ le ati yam mijileŋ jileŋ tahaya, a sa ndiram i yam mezlehey ta, a sa pulaka taŋ ngi mandaŋ. 12Sukwi ngi widis ngi zumoy a sa gilam a mi mizawa, a ˀaydidikeye, ti ka ti ka cuw taŋ. Kalaf taŋhay anta sa ɓutom ɓut le ta, yo yi taŋhay kwana anta sa kiɗam mi pas le ta. Vur kiya gar na, a sa yam, asi yam ngi mizawa, a bo tir hay ngi Bumbulvuŋ. Yi taŋhay a sa ndiram ar deɗe ngi ɗafa, yo kalaf taŋhaya kwana ar deɗe ngi slalaka.»
Bumbulvuŋ ɓi micica maakway ngi Israyeley
13Ya Bumbulvuŋ Buymisemuŋ i ɓi na: «Kum masa wuɗkaka hirwuy da sukwi mukuruˀ nga cuw ngi Israyel na, maakway nah ani: Zozefe, a sa lum nga naŋ, li taˀ taˀ cuw. 14Ki sa wuɗkaka li rak rak, mbur gar ti nga naŋ ti nga naŋ, asi i hudum le haŋ paɗ a muŋ ngi vula da cine kumoyo. Hirwuy hana a sa ndir i mi ngi kum. 15Tir vay muŋ, maakway ngi ruwuyo, a sa bi ani: a zli a mubuliy Mediterane, sipeˀe buwal macuh nga Hetloŋ, aru nga Lebohamat, hã nga Sedat. 16Yo a bi tir walahay Berota ati Sebrayim misi ar hirwuy Damas ati hirwuy Hamat, yo tir walahay Hasertikoŋ, migweˀ avu hirwuy Horaŋ. 17Waɗ ma na, maakway a bi baɗ a mubuliye, hã nga Hasarenaŋ, a tika hirwuy Damasa tak ti muŋ naŋ waɗ hirwuy Hamata. Hana i maakway vay muŋ. 18Tisi pas ngi miprike, kisa waka maakwaya a bi tir wala ngi walahay Damas ati Horaŋ, tir wala ngi hirwuy Galaˀat ati hirwuy Israyel. Mizaw Zurdeŋ a sa ndir i maakway ɓaˀa ar wala, hã a mubuliy mumuca. Hana i maakway vay si pas ngi mipriki. 19Tir vay ˀayzaw ti ruwuyo, maakway a sa zli zle a Tamar, hã a miyam Meriba, a Kades, bal ti mizaw Ezipte, kini ngir ti vu mubuliy Mediterane. Hana i maakway vay ˀayzaw kini ti ruwuy. 20Maakway tir vay si pas ngi pastaˀa, a zli ti mubuliy Mediterane, zle ar maakway vay ruwuyo hã taˀ hiri ar Lebohamat tir vay muŋ. Hana i maakway vay si pas ngi Pastaˀa.
21Ki sa wuɗkaka hirwuyo ar wala kum sukwi Israyel mukuruˀ nga cuwo. 22Ki sa wuɗkaka hirwuy ar wala kumo ti ceregezleŋ, kum ati mizli mulak mucufa ngi wuzla kumoy, miyam ziri mizilehey le a wuzla kumo. Ki sa puraka taŋ a wuzla kumo kaɓa zuŋ ngi hay a wuzla Israyeleye. A sa lumam hirwuyo jom ati kumo ti gi ceregezleŋ a wuzla sukwi Israyeleye. 23Mbur mulaka, kisa vulakaŋ li da naŋ angi sukwi naŋ misi anga na. I ya Bumbulvuŋ, Buymisemuŋ maɓi.»
Currently Selected:
EZEKIYEL 47: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.