EZEKIYEL 3
3
1A ɓiy na: «Ka mburu, zuma ɗerewol mufuɗa hana. A dirba nah, kisa ra ɓa ɓi da Israyeleye.» 2I wuna mi wun, a vuliy ɗerewol tuwa, i zumaŋ.
3A ɓiy ma: «Ka mburu, ɗerewol mufuɗa ya mavuluw di hana, zuma nga kwacaya, mbi di. «Ti ya mazuma na, a tir a balama deɗek ka mam.
4Joˀ a ɓiy: «Ka mburu, aru ng'avi Israyeley, ɓa taŋ mingiɓi ɗu. 5Mizli misi mi taŋ sin ta, yo misi irneˀ taŋ dudok ngi ɓi ɓi na, i slinuw ng'avi taŋ ta. I slinuw ng'avi Israyeley. 6Mizli mihaɗa, misi mi taŋ a sin tuwaˀ, yo misi irneˀ taŋ dudok ngi ɓi ɓi na, i slinuw ng'avi taŋ ta. Ko da i slinuw ng'avi taŋ vuna kwana, taŋ a sa cinukuw mingiɓi ɗike ɓula. 7Amma mizli Israyeleye, taŋ, t'anta sa cinukuw mingiɓi ɗike ta, asi t'anta ngumam cinikiy mingiɓi ɗu ta. Asi mike na, mizli Israyeley gar na, hirnga taŋ gidaŋ, yo ɓi anta ci a mevel taŋ ta. 8Amma na, i sa tiri ti ka micin takaɓa nga taŋ, yo hirnga gidaŋ kaɓa taŋ vuna ya. 9Hirnga ɗike, i sa tira gidaŋ kaɓa ɗugur mupuɗaw gingiliw gingiliw, gidaŋ fineˀ ɗugur. K'anta sa zluwun taŋ ta, k'anta sa jijik a mbuŋ taŋ ta, asi taŋ, i sukwi ngi mizli mislikiɗa ɓihey.» 10A ɓiy ava ma: «Ka mburu, ɓi ya maɓuw di hana gar na, tiɓa a mevel ɗike, cine ti slimiɗ ɗike. 11Aru ng'avi mizli mijaka taŋ baɗ aka nga ruwuy mulak, ng'avi ziri ngi mizli ɗikey. Ki sa ɓa taŋ ɓi, ko da ara cinukuw di malla anta cinukuw di ta gar kwana, kisa ɓa taŋ na: ‹Maɓi kahana i ya Bumbulvuŋ, Buymisemuŋ.›»
12Akẽh na, ˀUf ngi Buymisemuŋ a zuɓiy faw nga muŋ, i cin widi ngirzliŋŋe ti dirba ɗu, a ɓam: «Sise da Bumbulvuŋ angi li misi dudok naŋ anga na!» 13I cin hurum ngi kirpasl ngi gwat misi titirihey, mazliram ar wala taŋ, waɗ hirak ti nah ma na, hurum ngi sar ngi motahay ati widi ngirzliŋŋe. 14Akẽh na, ˀUf muzuɓiy faw nga muŋ tuwa. Ya maru na, ti mevel fõh fõh a hur ɗu. Gidaŋ ngi Bumbulvuŋ naŋ da angi ya kuy kuy. 15I ndil a Tel-Abip, a hay mizli mijahay nga diga, a hay mizli micifam a mi mizaw Kebar tuwa. Asi taŋ ti hay taŋhay a diga, i cifi a diga hin tarnaˀa, ngirkikke a wuzla taŋ.
Buymisemuŋ a cifa Ezekiyel i mijigina li vur mesene ngi Israyeley
(Pura 33.1-9)
16Angi kiɗa mi ngi hin mitarnaˀhay tuwa na, Bumbulvuŋ a ɓiy mingiɓi naŋ ani: 17«Ka mburu, i cufuw ki mijigina li vur Israyeley. Daka misa cine ɓi mubo tivi ya le na, kisa ɓa taŋ ɓi ɗu ngi ki mumuyuŋ zay sla a slimiɗe. 18Mbur mukuwa, da ya miɓaŋ le: ‹Ki sa mucu›, da ki kaŋ mumuyuŋ zay sla a slimiɗe ta, da ki ɓa mbur mukuwa, ɓa a mbiɗa gwat ngi gi naŋ malambaˀ naŋ, ɓa a ndir ti siifa ta na, a sa muc ti gi mungra naŋ. Amma i sa cufuɗa pumbus naŋ a haŋ ɗiki. 19Amma da ki ka mumuyuŋ zay sla le da mbur mukuwa, a pula gi kuw naŋ ati gi malambaˀ naŋ na ta na, naŋ a sa muc ti mungra naŋ na, amma ka, ki laha hirnga ɗike le. 20Da mbur mijeŋŋe a pula gi jeŋŋe naŋ le, a gi gwat malambaˀ na, i sa ga ɓa gwat a baŋ sar, a sa mucu. Da ki kaŋ mumuyuŋ zay sla a slimiɗe ta na, a sa muc ti mungra naŋ na. Slra mijeŋŋe naŋ miga zleˀe na, ko anta sa wulkaka keŋ mata. Amma i sa cufuɗa pumbus naŋ a haŋ ɗiki. 21Amma mbur mijeŋŋe, da ki kaŋ mumuyuŋ zay sla le a slimiɗ ɓa a gi mungra ta na, naŋ anta gi mungra ta gisiŋ, a ndir ti siifa, asi ki kaŋ mumuyuŋ zay sla le a slimiɗe, yo ka kwana, ki laha hirnga ɗike le.»
Buymisemuŋ muɗuva hin ngi cifi teˀ teˀ da Ezekiyel
22Gidaŋ ngi Bumbulvuŋ naŋ da angi ya a diga ma, a ɓiy: «Slikiɗ, bi ng'ar sozo, ɓa i sa ɓuw ɓi a diga.» 23I slikiɗ, i bi ng'ar sozo tuwa. Keɗ na, dudok ngi Bumbulvuŋ a diga. A pur kaɓa ya mupura zleˀe a mi mizaw Kebar tuwa. Dar i huruk huruk a ruwuy. 24ˀUf ngi Buymisemuŋ a ci angi ya, a slikiɗiy pirtaˀ deŋ. A ɓiy na: «A ra gica miviŋ ɗike giceˀ a hirnga ɗike. 25Ka mburu, cin, mizli a sa pukuw zeweɗ, a sa juwukuw ti naŋ, k'anta sa bi ti wuzla taŋ mata. 26I sa ngbuˀuw irne ngbaˀ a balama, kisa tiri mididih, k'anta sa mbiɗa hirnga da mizli tayna gu mata, asi taŋ i sukwi ngi mizli mislikiɗa ɓihey. 27Amma da ya misa ɓuw le na, i sa wunuw mi, dar kisa ɓa taŋ: ‹Maɓi kahana i ya Bumbulvuŋ, Buymisemuŋ. Mbur muwuɗ cin naŋ le na, anja a cin, mbur muwuɗ cin naŋ ta kwana, anja a cin ta›, asi taŋ i sukwi ngi mizli mislikiɗa ɓihey.
Currently Selected:
EZEKIYEL 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.