EZEKIYEL 2
2
Buymisemuŋ mislina Ezekiyel ng'avi Israyeley
1ˀAy ngi mbur, ya macina tuwa, a ɓiy anihĩ: «Ka mburu, cici deŋ ti deŋ, asi i wuɗ i ɓuw ɓi.» 2A dirba naŋ miɓiy tuwa na, ˀUf ngi Buymisemuŋ a ci angi ya, a ciciy deŋ ti deŋ. Dar i cine mingiɓi ngi mbur maɓiy tuwa so. 3A ɓiy na: «Ka mburu, i slinuw ng'avi Israyeley, ng'avi mizli mislikiɗa ɓihey, i mizli mislikiɗam ɓi avu ya, taŋ vuna ati dideˀ taŋhay, hã dana. 4Ya Bumbulvuŋ Buymisemuŋ i ɓi na: Ya maslinuw na, ng'avi mizli micin tahay, misi hirnga gidaŋhay, kisa ɓa taŋ na: ‹Ki sa ɓataŋ ɓi ng'aya Bumbulvuŋ, Buymisemuŋ.› 5Ko da ara cinukuw di malla anta cinukuw di ta gar, asi taŋ i sukwi ngi mizli mislikiɗa ɓihey na kwana, a sa sinaka mijiviɗ ada a wuzla taŋ. 6Ka mburu, cin, ki zluwun ti taŋ ta, ki zluwun ti mingiɓi ngi balam taŋ ta. Ka a wuzla mizli mangilam mi ta wãˀa, mizli misi ka hadaway, yo kaɓa mbur micifi le ar ˀurucoy. Gar ti nah kwana, ko ki zluwun ti mingiɓi ngi balam taŋ ta, yo ki zluwun ti mihiri taŋ ta, asi taŋ i sukwi ngi mizli mislikiɗa ɓihey. 7Taŋ i mizli mislikiɗa ɓihey, da ko ara cinukuw di malla anta cinukuw di ta kwana, kisa ɓa taŋ mingiɓi ɗu na si.
8Ka mburu, cine ɓi ya maɓuw di anihĩ: ki tiri mbur mislikiɗa ɓi, kaɓa sukwi ngi mizli mislikiɗa ɓi hanayna ta. Wuna mi ɓa ki zuma gwat ya mawuɗ i vuluw di na.» 9I ra pur hiri: keɗ na, haŋ a tilo til ng'avi ya, kaw ti ɗerewol mufuɗa faɗ faɗ. 10A wuna ɗerewol tuwa wun a mbuŋ ɗu, i mutoho le ti ka ti ka. Mutoho anga vuna, i ɓi ngi tuwuy, ngi niˀic ati ngi widi.
Currently Selected:
EZEKIYEL 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.