Gálatas 6
6
Nénajtsïsï jámaa mándani arhini
1Erachicha eka nema k'amanharhintaaka, cha engajtsï espiritu jimbo uinhapetini jaka, espiritu jimbo jarhuata je kaxumbekua jinguni, míakorheparini jimbokari úaka t'újtu terunguni. 2Jarhoatpera je engajtsï nósesi nitamakorheni jauaka, ísïjtsï Krístueri juramukuani marhoakuni jauaka.
3Ekachka nema nómbemeparini k'éramakorheaka, tandosï úkorhexati. 4Jiájkani mándani arhini xékorhe je násï jámki ka jandiojku k'érku exekorhe no máteruechani japarini; 5jimboka táchani ísï jatsiska míakorheni ambe enga úaka.
6Ne enga ambakiti aiangperakuani p'ikaia, jatsikorhekuani imeri jurhentpiri jinguni marhuate.
7Ásï tandonhaskorhe je, Diósïni nónema úsïndi únharhitani jarhani. Ambe enga júkskanhajka, imani ambe p'ikunhantasïndi. 8Eka nema nósesi jásï eratsekua júkskaaka, uarhikua ambejkusï akuntaati. Ka ne enga Espiritu Sántuni mintsikaparini júkskaaka, Espirituni jimbo méntkisï anapu tsípekuani andaati. 9Ju je no kuatantani sési ambe úni; jimbokachi ma jurhiani sési ambe p'ikuntaaka engaksï méntkisï sési ambe úaka. 10Jiájkani na engachi xáni úaka ju je iáminduechani sési káani, ka sánderia erachi jakajkutichani.
Uandanuntskua
11¡Exe je! Na engaksïni xáni k'érati jimbo karacheni jaka jucheti jájki jimbo. 12Ima engaksï uéjka eskajtsï pasïrini p'ikujtsïtaaka, jiniksïsï uéjti sési pakaratspeni, jimbokaksï Krístueri cháparhatakua jimbo, nóteru uéksïnga eskaksï atanhani kánhaaka. 13Níksï ima enga pasïri p'ikujtsïtaka jamberi újki juramukuani kurhandirakuni enga jima arhijka. Jiniksïsï uéjti eskajtsï cha p'ikujtsïtaaka, ka indeni jimboksï k'éramakorheni engaksïni uinhapetarhu mínda jatsikuka. 14Ji k'óruni nómbe ma jimbo k'éramakorhesïnga, juchari Acha Jesukristueri cháparhatakua jimbojkusïni k'éramakorhejka. Jimboka Krístueri chaparhatakua jimbo, jucheti jimbo parhakpeni anapu ambe uarhistia ka jíjtuni uarhirixaka parhakpeni anapu ambe jimbo. 15Nómbe ma jimbo marhoasïndi mínda jukani o no jukani, imasï marhuajti enga ma jimbanhetaaka. 16Ne engaksï ísï sési úparini irekaka, sési pájperaakuaksï p'iue ka kóndenheksï iámendu Diósïrichani jinguni.
17Iásï uératini ásterurini néma ájchatani jaue; jimbokani Jesusini kámaxaka, ka inde xarharsïndi eskani Krístu jinguniska.
18Erachicha, eska juchari Acha Jesukristu cha jinguni jauaka. Ka ísïue.
Currently Selected:
Gálatas 6: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.