Gálatas 5
5
Nóteru katsijkunhatini jarhani
1Krístujtsïni euajpentasti ka nóteruchi jántspiriskia, anhatsekorhe je ka ásteru jurajkutakorhe je eskajtsï jántspekuani uanajchantaaka.
2Ji Pábluksïnisï ísï arhini jaka, ekajtsï ts'iuekuarhu pasïri p'ikujtsïkumenhaska, Krístuksïni no marhoacheati. 3Ménderuni imani arhiaxaka engaksï pasïri p'ikujtsïkumenhajka, eska ima jatsiska juramukuani iámu ambe jimbo kurhajchani. 4Cha engajtsï juramukua jimbo kaxumbeni uéjka, Krístuntsï jarharentaska ka Diósïri kóntperakuantsï jurajkuska. 5Juchachi Espirituni jimbo mintsikasïnga eskajtsïni jakajkukua jimbo Diósï kaxumberantaaka. 6Jimboka Krístu Jesusini jakajkuparini, nómbe méska pasïri p'ikujtsïtani o no p'ikujtsïtani, jakajkukuasï arhijti engajtsïni xénhchpetarajka.
7Sésijtsï niraxapkia, ¿Néksïni tsîrhukutaraski engajtsï nóteru chúxapaka indeni enga ísïka? 8Inde no Diósïristi, ima engaksïni uandajpaka. 9¿Andi nójtsï míteski eska? “Sántku xarhiperakua iámu tsïrerini k'úrasïnga” 10Ji Táteni mintsikaxaka eskajtsï cha no ménderueni kurhanguaka, ka ima engaksïni xerejka ikimenhaati néuejkinini.
11Ji, erachicha, engani jíjtuni útasï uandantani japiringa eska uétarhisïnga tsiuekuani pasïri p'ikujtsïkuni, ¿Andi útasïjtsïni judiuecha atani uékapirinki? Ka nóteruksï ikiapirindi Krístueri cháparhatakuani kurharini. 12¡Ima engaksïni ójkutajka, méntkuksï kachujchupirindia!
13Erachicha, chájtsï uandajpanhaska eskajtsï nóteru katsijkunhatini janhaakia, ásï indeni jimbo néna uéjkinini jáma je, jinijtsïsï xénhchperaparini jarhojperaaka. 14Jimboka iámendu juramukua imantkusï arhikuekati: “Xénhpe ísï eskari t'u na xénhchakorhejka.” 15Ekajtsï chájku uénaska uarhiperani ka arhinhchperani, chájkujtsï k'amajperaaka.
Irekua ísï eska Diósïri Espiritu na uéjka
16Jíksïni arhixaka: Engajtsï ísï irekorheaka eska Espiritu na uéjka, nójtsï úaka imani nósesi jásï ambe engajtsï tsitinhchaaka. 17Jimboka anhanhatakua méntku máteru ambe tsitisïnga eska Espiritu; indeksï no pájperasïndi, ísï jimbo ásï u je ambe engajtsï cha únhchani jauaka.
18Ka engaksïni Espiritu urhechepaaka, jiájkantsï nóteru juramukuani jantspekuakia. 19Ambantku xarhatanhasïndi engaksï nósesi jásï ambe únhchajka: Ísku jánhchakua ambe, néna uéjkinini jámani, uíchueni jángua, 20eratakatechani diósïraani, sïkuajperakua ambe, arhirperakua, uarhiperakua, jáarhatsperakua, kurhunhperakua, uandandirakua, támisï jánhastperakua, 21epuperakua, kauikua, tsîchentani k'uíncheni; ka uánekua ísï járhati ambeteru. Kurhachkajtsïni je, arhispkaksïnia ima engaksï íni ambe újka, Diósïri irechekuanksï no p'iuati.
22Ka Espiritu jimini ménderuenisti, jimboka xénhchperakueska ka tsíperpentasïndi ka sési pájperpeni ka tekaatspentskua ka sési uandajperakua ka p'amojperakua ka jakajkutarpentasïndi, 23ka kétsekua uérani ka p'ínhpesïndi. Indeni ambe jimbo, nóma juramukua jarhasti. 24Ka ima engaksï Krístuerikiia, k'uiripueri nósesi jásï únhchakuani ka eratsekuanksï cháparhatatixatiia. 25Ekachi Espiritu jinguni irekaska, ísïchi jámaaka eska Espiritu.
26Ju je no k'éramakorheni, ju je no arhirhperani ka ni epurhperani.
Currently Selected:
Gálatas 5: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.