Gal 3
3
Li Chaq'rab' ut li paab'aal
1Ex aj Galacia maak'a' eena'leb'! Ani xtuulank eere? Chi xnaq' eeru xch'olob'amank xyaalal li Jesukriist k'eeb'il chiru krus! 2Ka'ajwi' a'in nawaj xnawb'al eerik'in: ma xek'ul li Musiq'ej sa' xk'ab'a' xk'anjelankil li Chaq'rab' malaj rik'in xpaab'ankil li Aatin eerab'ihom wik'in? 3Ma q'axal maak'a' eena'leb'? Xetikib' paab'ank rik'in li Musiq'ej ut anaqwan nokoxeeraq jo' naraj li tz'ejwalej? 4Maak'a' aj e naq xek'ul chixjunil a'an! Ab'anan moko yaal ta naq maak'a' aj e. 5Naq li Yos naxk'e eere li Musiq'ej ut naxb'aanu li xninqal ru eetalil sa' eeyanq, ma naxb'aanu a'in xb'aan naq nekek'anjela li Chaq'rab'? Ma ink'a' tab'i' xb'aan naq nekepaab' li Aatin eerab'ihom wik'in?
6Laj Abrahán “kixpaab' li Yos ut a'an kik'ehe'k sa' ajl cho'q xtiikilal xch'ool”.#3,6 Gn 15,6. 7Chenawaq b'i' naq eb' laj paab'anel a'aneb' li tz'aqal ralal xk'ajol laj Abrahán. 8Najter q'e kutan li Santil Hu ak naxnaw naq li Yos tixtiikob'resi xch'ooleb' li maawa'eb' aj Judiiy sa' xk'ab'a' li paab'aal. Jo'kan naq junxilaj kixye li chaab'il esil a'in re laj Abrahán: “Sa' aak'ab'a' osob'tesinb'ilaqeb' chixjunil li tenamit”.#3,8 Gn 12,3. 9Chi jo'kan osob'tesinb'ileb' laj paab'anel, rochb'een laj Abrahán, laj paab'anel.
10Chek'e reetal: chixjunileb' li k'ojk'ookeb' xch'ool rik'in xk'anjelankil li Chaq'rab' teneb'anb'il li tojb'amaak sa' xb'eeneb', xb'aan naq naxye li Santil Hu: “Maa'usinb'ilaqeb' chixjunileb' li ink'a' neke'xk'e xch'ool chirix chixjunil li tz'iib'anb'il sa' xhuhil li Chaq'rab' chi moko neke'xb'aanu”.#3,10 Dt 27,26. 11Ch'olch'o naq li Chaq'rab' maa'ani naxtiikob'resi xch'ool chiru li Yos, xb'aan naq naxye li Santil Hu: “Li tiik xch'ool taawanq xyu'am xb'aan li xpaab'aal”.#3,11 Hab 2,4. 12A'ut li Chaq'rab' ink'a' nachalk sa' xk'ab'a' li paab'aal, naxye b'an: “Li taab'aanunq re chixjunil a'in, yo'yooq sa' xk'ab'a' a'an”.#3,12 Lv 18,5.
13Li Kriist koorach'ab' chiru xmaa'usilahom li Chaq'rab' xb'aan naq kixk'e rib' chi maa'usilaak sa' qak'ab'a' laa'o, jo' naxye li Santil Hu: “Maa'usilanb'ilaq chixjunil li t'uyt'u chiru che'”.#3,13 Dt 21,23. 14Chi jo'kan li maawa'eb' aj Judiiy te'xk'ul ajwi' li rosob'tesihom li Yos yeeb'il chaq re laj Abrahán, sa' xk'ab'a' li Kristo Jesus, ut laa'o sa' xk'ab'a' li paab'aal tqak'ul li Musiq'ej li yeechi'inb'il chaq.
15Ex was wiitz'in, tinch'olob' xyaalal a'in rik'in li k'aru nak'ulmank sa' ruuchich'och': junaq testameent k'uub'k'u chi chaab'il, us ta tz'iib'anb'il xb'aan winq, ab'an maa'ani chik naru nasachok re chi moko tixtiq ru. 16Jo'kan utan, a' laj Abrahán kiyehe'k wi' li yeechi'om a'in ut re ajwi' li riyajil. Ink'a' naxye: “ut reheb' laawalal aak'ajol” chanchan tawi' li naab'aleb', yo b'an chi aatinak chirix jun ajwi': “ut re laawiyajil”,#3,16 Gn 12,7. naraj naxye, a' li Kriist.
17A'in laa'in ninye: li testameent k'uub'k'u chi chaab'il xb'aan li Yos ink'a' naru taasache'q xwankil xb'aan li Chaq'rab' k'eeb'il lajeeb' xka'k'aal xkab' o'q'ob' (430) chihab' moqon; ut ink'a' naru taakanaaq chi maak'a' rajb'al li xyeechi'om li Yos. 18Wi ta sa' xk'ab'a' li Chaq'rab' nachalk li qamaatan, ink'a' raj chik taachalq sa' xk'ab'a' li xyeechi'om li Yos. A'ut li Yos rik'in xyeechi'om kixsi li rusilal re laj Abrahán.
Li xk'anjel li Chaq'rab'
19K'a' put aj e li Chaq'rab' chi jo'kanan? Xb'aan li q'etok aatin naq kik'eemank, toj reetal taak'ulunq li ralal laj Abrahán li kiyehe'k wi' li yeechi'om a'in. Li Chaq'rab' kixaqab'aak xwankil xb'aaneb' li ánjel ut xb'aan jun aj oksinel aatin. 20Ab'an, naq wank junaq aj oksinel aatin, naraj naxye naq wankeb' ka' jachal, a'ut li Yos jun ajwi' chirib'il. 21Ma naraj tab'i' naxye naq li Chaq'rab' naxsach xwankil li xyeechi'om li Yos? Maamin b'i'an! Wi ta k'eeb'il qe jun li Chaq'rab' wank xwankil chi yoob'tesink, relik chi yaal naq li tiikil ch'oolej nachalk raj rik'in li Chaq'rab'. 22Ab'an li Santil Hu kixch'utub' chixjunil rub'el xwankil li maak re naq li xyeechi'om li Yos taak'eemanq reheb' laj paab'anel sa' xk'ab'a' xpaab'ankil li Jesukriist.
23Naq toj maji' nak'ulunk li paab'aal, tz'aptz'ooko naq koowank rub'el xwankil li Chaq'rab', yooko chi royb'eninkil naq tolxk'utb'esi rib' li paab'aal. 24Jo'kan naq li Chaq'rab' aj ch'ilom qe naq kiwank, re qak'amb'al rik'in li Kriist, re naq tiikob'resinb'ilaq li qach'ool xb'aan li paab'aal. 25Ut naq ak xk'ulunk li paab'aal, moko wanko ta chik rub'el xwankil laj ch'ilonel. 26Xb'aan naq chejunilex ralal xk'ajolex li Yos sa' xk'ab'a' xpaab'ankil li Kristo Jesus.
27Relik chi yaal naq jo'k'ihalex li ak kub'enaq eeha' re li Kriist, xetiqib' eerib' rik'in li Kriist. 28Maak'a' chik aj judiiy chi moko aj griego; maak'a' chik aj loq'b'il k'anjel chi moko aj ach'ab'anb'il k'anjel; maak'a' chik winq chi moko ixq, xb'aan naq chejunilex laa'ex junex aj chik rik'in li Kristo Jesus. 29Ut wi rehex li Kriist, laa'ex riyajilex laj Abrahán chi jo'kanan, aj eechaninelaqex jo' chanru yeechi'inb'il chaq xb'aan li Yos.
Currently Selected:
Gal 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.