Gal 2
2
Eb' li apóstol ke'xk'ul laj Pablo
1Kaalaju chihab' chik chirix a'an, kintaqe'k wi' chik Jerusalén wochb'een laj Bernabé; kink'am ajwi' laj Tito chiwix.#2,1 Cf. Hch 15. 2Kohin aran xb'aan naq li Qaawa' kixk'ut rib' chiwu. Ut kinseeraq'i re li komonil li Chaab'il Esilal li ninpuktesi reheb' li maawa'eb' aj Judiiy. Kinch'olob' xyaalal reheb' laj jolominel ch'utch'uukeb' xjuneseb', re xnawb'al ma xin'aanilak malaj ut yookin chi aanilak chi maak'a' rajb'al. 3Ab'an chi moko laj Tito, li wochb'een, kimine'k ru chi xk'ulb'al li sirkunsisyon, us ta a'an aj griego. 4Wankeb' ke'xch'ik rib'eb' sa' qayanq ut neke'xye rib' naq qas qiitz'ineb', a'aneb' li ke'ok chi muqmu re xk'eeb'al reetal li xnimal usilal wanko wi' sa' xk'ab'a' li Kristo Jesus, re raj qak'eeb'al rub'el xwankil li Chaq'rab'. 5A'ut laa'o ink'a' xqaq'axtesi qib' chi xb'aanunkil li neke'xye, yal ta jun ch'ina k'amok, re naq junelik xaqxooq sa' eeyanq li xyaalalil li Chaab'il Esilal.
6Eb' li oxloq'inb'ileb' cho'q aj jolominel maak'a' chik ke'xteneb' sa' inb'een. Ut wi eb' a'an ke'wank junxil cho'q aj jolominel, maak'a' nawaj re laa'in, xb'aan naq li Yos juntaq'eet narileb' chixjunil. 7Maak'a' ke'xye eb' laj jolominel. Ke'xk'e b'an reetal naq q'axtesinb'il we li k'anjel chirix li Chaab'il Esilal sa' xyanqeb' li ink'a' xk'ulumeb' li sirkunsisyon, jo' naq q'axtesinb'il re laj Pedro sa' xyanqeb' li ak xk'ulumeb'. 8Xb'aan naq li Yos li kixxaqab' xwankil laj Pedro re k'anjelak cho'q apóstol sa' xyanqeb' li xk'ulumeb' li sirkunsisyon, kinxxaqab' ajwi' laa'in re k'anjelak chiruheb' li maawa'eb' aj Judiiy. 9Naq laj Santiago, laj Sefas ut laj Jwan, eb' li oxloq'inb'ileb' cho'q roqechal li Iklees, ke'xk'e reetal li simaatan k'eeb'il we, ke'xk'e li ruq'eb' we jo'wi' re laj Bernabé, reetalil naq wanko sa' sum'aatin; ut xqak'uub' naq eb' a'an te'xik rik'ineb' li xk'ulumeb' li sirkunsisyon ut laa'in wochb'een laj Bernabé tooxik rik'ineb' li junch'ol chik. 10Ka'ajwi' ke'xtz'aama chiqu naq che'jultijo'q qe eb' li neb'a',#2,10 A'eb' li neb'a' aj Jerusalén (cf. 1 Ko 16,1; 2 Ko 8-9; Hch 24,17; Ro 15,26-28). ut a'in tz'aqal xink'e inch'ool chi xb'aanunkil.
Laj Pedro ut laj Pablo aran Antiokía
11A'ut naq laj Pedro kik'ulunk arin Antiokía, kinxaqliik chiru re xq'usb'al, xb'aan naq wank k'aru xmajelo'k wi'. 12Toj maji'aq neke'wulak li xtaql laj Santiago, nawa'ak rik'ineb' li maawa'eb' aj Judiiy; ab'an naq ke'wulak eb' a'an, kirisi rib' ut ki'elk rik'ineb' li maawa'eb' aj Judiiy, xb'aan xxiw chiruheb' li xk'ulumeb' li sirkunsisyon. 13Ut eb' laj paab'anel Judiiy ke'ok chi xb'aanunkil li ka'pak'alil na'leb' li kixb'aanu laj Pedro: a' ajwi' laj Bernabé kik'ame'k xb'aan li ka'pak'alil na'leb' a'in. 14Naq kink'e reetal naq ink'a' tiik yookeb' chi k'anjelak jo' chanru naraj xyaalal li Evangelio, kinye re laj Sefas chiruheb' chixjunil: “Wi laa'at aj Judiiy nakataaqe xna'leb'eb' li junch'ol chik ut ink'a' li xna'leb'eb' laj Judiiy, k'a'ut naq nakamineb' ru li maawa'eb' aj Judiiy chi xtaaqenkil xna'leb'eb' laj Judiiy?”.
Li xChaab'il Esil laj Pablo
15Laa'o aj Judiiy chalen chaq sa' qayo'lajik, ut maawa'o xkomoneb' li tenamit aj maak, jo' chanru nayeemank chirixeb'. 16Ab'an naqanaw naq maa'ani natiikob'resiik xch'ool rik'in xb'aanunkil li naxye li xChaq'rab' laj Moisés, ka'aj b'an wi' rik'in xpaab'ankil li Jesukriist. Jo'kan naq laa'o ajwi' xqapaab' li Kristo Jesus re taatiikob'resiiq qach'ool chiru li Yos rik'in xpaab'ankil li Kriist ut maawa' rik'in xb'aanunkil li naxye li Chaq'rab', xb'aan naq maa'ani taatiikob'resiiq xch'ool#2,16 Sal 143,2. rik'in xb'aanunkil li naxye li Chaq'rab'.
17Jo'kan utan, wi laa'o yooko xsik'b'al xtiikob'resinkil qach'ool sa' xk'ab'a' li Kriist ut laa'o ajwi' toj wank qamaak, ma a'an naraj naxye naq li Kriist a'an aj k'anjel chirix li maak? Maajoq'e b'i'an! 18Xb'aan naq wi laa'in tin'ok wi' chik chi xkab'lankil li k'aru injuk'um junxil, a'an naraj naxye naq nink'e wib' cho'q aj q'etol aatin. 19Xb'aan li Chaq'rab' xinkamk chiru li Chaq'rab' re naq yo'yooqin cho'q re li Yos.
Wochb'een li Kriist naq wankin chiru krus. 20Moko laa'in ta chik yo'yookin, a' b'an li Kriist yo'yo wik'in.#2,20 Gal 5,24; 6,14. Cf. Ro 6,1-14; 8,10-11; Fil 1,21; Kol 3,3-4. Linyu'am li wank sa' ruuchich'och' anaqwan, wank chik rik'in naq ninpaab' li Ralal li Yos li kirahok we ut kixq'axtesi rib' sa' ink'ab'a'. 21Ink'a' nintz'eqtaana xwankil li rusilal li Yos, xb'aan naq, wi ta sa' xk'ab'a' li Chaq'rab' natawmank li tiikil ch'oolej, maak'a' raj rajb'al naq kikamk li Kriist.
Currently Selected:
Gal 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.