2 Pe 3
3
Li xkutankil li Qaawa' ut li roso'jik li ruuchich'och'
1Ex was wiitz'in raarookex inb'aan, a'in li xkab' inhu nintz'iib'a eerik'in. Sa' li wiib' yookin chi rajsinkil eech'ool xb'aan li tiikil k'a'uxl, rik'in li k'aru ninjultika cheru. 2Chijultiko'q eere li aatin ke'xye chi junxilaj eb' li santil propeet, jo' ajwi' chijultiko'q eere li xchaq'rab' li Qaawa' ut laj Kolonel, q'axtesinb'il eere xb'aaneb' lee'apóstol.
3Chenawaq xyaalal a'in xb'enwa: naq sa' roso'jikeb' li kutan te'chalje'q winq tz'aqal aj eetz'uneleb', li te'xb'aanu li naxrahi li tz'ejwalej: 4“K'aru xkanaak wi' li xk'ulunik li Qaawa' yeechi'inb'il chaq eere? Chalen chaq xkamikeb' li qana' qayuwa' xna'ajkil ajwi' chixjunil, kama' chaq sa' xtiklajik li ruuchich'och'”, cha'qeb'.
5Ink'a' neke'raj xtawb'al ru naq ak junxil chaq kiwank li choxa jo'wi' li ch'och' li ki'elk chaq sa' ha', a' li k'ojob'anb'il sa' xyanqeb' li ha' xb'aan Raatin li Yos. 6Xb'aan a'in kib'ut'in ut ki'oso'k li ruuchich'och' kiwank najter. 7A'ut li choxach'och' li wankeb' anaqwan k'uulanb'ileb' cho'q re li xam xb'aan ajwi' Raatin li Yos, ut xokxookeb' cho'q re xkutankil li raqb'a aatin naq te'sache'q li ink'a' neke'paab'ank.
8Ex was wiitz'in raarookex inb'aan, jun li na'leb' tento xnawb'al: naq chiru li Yos jun kutan a'an jo' jun mil chihab', ut jun mil chihab' a'an jo' jun kutan.#3,8 Sal 90,4; Hab 2,2-3; Eklo 18,8. 9Li Qaawa' ink'a' nab'ayk chi xk'eeb'al li b'arwan kixyeechi'i. Wankeb' neke'k'oxlank re naq yo chi b'ayk, ab'an moko yaal ta. Nim xkuyum li Yos eerik'in; ink'a' naraj naq taasachq junaq, naraj b'an naq chixjunileb' te'yot'e'q xch'ool ut te'xjal xk'a'uxl.
10Li xkutankil li Qaawa' tol'elq jo' junaq aj elq'. Sa' li kutan a'an tenloq xyaab' li choxa naq taa'oso'q. Li k'a'aq re ru nak'uub'ank re li ruuchich'och' te'oso'q sa' xam; li ch'och' ut chixjunil li wank chisa' taak'atq.#3,10 Mt 24,29.43; 1 Ts 5,2; Ap 3,3; 20,11.
Wanqex sa' santilal
11Rik'in naq chixjunil li k'a'aq re ru a'in te'oso'q chi jo'kan, tento naq wanqex sa' santilal ut rik'in paab'ank; 12tento naq teeroyb'eni ut teeseeb'a xchalik li xkutankil li Yos naq taa'oso'q li choxa sa' xam, ut chixjunil li wank chisa' taak'atq ut taaha'lesiiq. 13Ab'anan laa'o yooko chi royb'eninkil ak' choxa ut ak' ch'och', b'arwi' taawanq li tiikilal, jo' chanru kixyeechi'i li Yos.
14Jo'kan utan, ex was wiitz'in raarookex inb'aan, naq yookex chi royb'eninkil chixjunil a'in, yalomaq eeq'e re naq tolexxtaw li Qaawa' sa' tuqtuukil usilal rik'in, chi maak'a'aq eemuxul ut eeq'usb'al. 15Chek'oxla naq li xnimal xkuyum li Qaawa' a'an leekolb'al. A'an ajwi' kixtz'iib'a eerik'in laj Pablo, li qech aj paab'anelil raaro qab'aan, jo' chanru li na'leb' k'eeb'il chaq re xb'aan li Yos. 16Jo'kan ajwi' natz'iib'ak sa' chixjunileb' li xhu naq na'aatinak chirix a'in. Sa'eb' li xhu wank ajwi' junjunq li aatin ch'a'aj xtawb'al ru, ut eb' li maak'a'eb' xna'leb' ut q'uneb' xch'ool neke'xpo' li xyaalal (jo' neke'xb'aanu rik'in chixjunil li Santil Hu). Ab'an naq neke'xb'aanu a'in, neke'sachk.
Xraqik li hu
17Chi jo'kan, ex was wiitz'in raarookex inb'aan, aj'ajaq ru leek'a'uxl xb'aan naq ak xyeemank xyaalalil eere. Mare anchal teepo' eena'leb' xb'aan li k'aru neke'sachk wi' eb' li winq eet xna'leb'eb'; mare anchal tex'isiiq sa' leepaab'ahom li kaw xaqxookex wi'. 18Chexk'iiq sa' rusilal li Qaawa' rik'in xnawb'al ru li Jesukriist, laj Kolol qe. Rehaq taxaq li loq'al, anaqwan toj sa' li kutan ink'a' nalajk na'oso'k. Jo'kan taxaq.
Currently Selected:
2 Pe 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.