2 Pe 2
2
Eb' laj tzolonel aj b'alaq'
1Ke'wank ajwi' chaq propeet aj b'alaq' sa' xyanq li xtenamit li Yos. Jo'kan ajwi' sa' eeyanq laa'ex te'wanq aj tzolonel aj b'alaq' li te'roksi chaq chi muqmu li b'alaq'il na'leb' re xsachb'al li qapaab'aal; te'xtz'eqtaana ajwi' li Qaawa' li kikolok reheb', ab'anan chi junpaat te'xb'oq li sachk sa' xb'eeneb'. 2Naab'aleb' te'xk'am re rik'in li xmaa'usilaleb' ut, xmaakeb' a'an, taamajewaaq li xb'ehil li yaal. 3Xb'aan xraab'al ru li tumin te'yakoq cherix rik'in b'alaq'il aatin; a'ut chalen junxil yo'oon wank li raqb'a aatin sa' xb'eeneb', ut li roso'jikeb' moko warenaq ta.
4K'ehomaq reetal. Li Yos ink'a' kixkuy xmaakeb' li ánjel ke'maakob'k, kixkuteb' b'an sa' xb'alb'a ut kixq'axtesiheb' sa' xchamal li aak'ab' re naq k'aak'alenb'ilaqeb' toj sa' xkutankil li raqb'a aatin.#2,4 Cf. Jud 6. 5Jo'kan ajwi', us ta kixkol laj Noé, laj yehol resil li tiikilal, jo'wi' wuqub' chik rochb'eeneb', ab'an ink'a' kixkuy xmaak li ruuchich'och' kiwank najter; kixtaqla b'an li b'ut'iha' sa' xb'een li ruuchich'och' nujenaqeb' chi aj maak. 6Ut kixteneb' li kamk sa' xb'eeneb' li tenamit Sodoom ut Gomoor, naq kixkanab'eb' chi chahil, jo' jun eetalil chiruheb' li ink'a' te'xpaab' li Yos sa'eb' li kutan chalkeb' re. 7Ab'an kixkol laj Lot, li tiik ru xyu'am rahob'tesinb'il xch'ool xb'aan xmaa'usilaleb' laj maak, 8xb'aan naq li winq a'an tiik xch'ool naq kiwank sa' xyanqeb' a'an, ut rajlal kutan namayok xch'ool chi rilb'al ut rab'inkil li xyib' aj b'aanuhomeb'.
9Jo'kan utan, chixjunil a'in a'an reetalil naq li Yos naxnaw xkolb'aleb' laj paab'anel chiru li aaleek; a'ut eb' li ink'a' neke'paab'ank, naxk'uulaheb' cho'q re xkutankil li raqb'a aatin naq te'rahob'tesiiq: 10ut xb'een xb'een tixk'eheb' sa' tojb'amaak li neke'xik xch'ool chirix li tz'ejwalej, a'aneb' li neke'xrahi li tz'ajb'eetalil na'leb' ut neke'xtz'eqtaana li xwankil li Qaawa'. Eb' a'in eet xch'ooleb', q'etq'eteb', ink'a' neke'xiwak xmajewankil li wankeb' sa' xnimajwal loq'al;#2,10 A'aneb' li ánjel. Ka'ajwi' li Yos naru tixraq aatin sa' xb'eeneb' (cf. Ro 12,19; 1 P 2,23). 11a' wi' chik eb' li ánjel li neke'xq'ax ruheb' rik'ineb' xmetz'ew ut xwankil, ink'a' neke'raqok aatin sa' xb'eeneb' rik'in majewank chiru li Qaawa'.
12A'ut eb' a'in chanchaneb' li xul maak'a'eb' xna'leb', li yal reheb' chape'k ut kamsiik naq xe'yo'laak chaq: neke'xmajewa li k'aru ink'a' neke'xnaw, ut te'kamq jo' nakamsiik junaq xul. 13Te'xk'ul li rahilal jo' reeqaj li rahilal xe'xb'aanu. Neke'xk'oxla naq li tz'aqal sahil ch'oolej a'an xyalb'al li maa'usilal yal chiru jun kutan. Eb' li winq a'in ak xmuxumeb' rib' ut maak'a'eb' xxutaan: neke'xq'axtesi rib' sa' li nawulak chiruheb' naq yookeb' chi ninq'ehik eerochb'eeneb'.
14Ka'aj chik maa neke'xtiw eb' li ixq rik'in xsa' ruheb', tik ink'a' nak'ojlaak xch'ooleb' chi maakob'k; neke'xq'unb'esi li q'uneb' xch'ool, ak k'aynaqeb' chi xrahinkil ru li b'ihomal, maa'usilanb'ileb' chi junajwa! 15Naq xe'xkanab' li tiikil b'e, xe'sachk ut a' chik li xb'e laj Balaham, ralal laj Bosor,#2,15 Cf. Nm 22-24; Jud 11; Ap 2,14-15. xe'ok chi xtaaqenkil: a'an kixra ru xk'ulb'al li tumin rik'in xb'aanunkil li maa'usilal, 16ab'an kiq'use'k xb'aan naq kiq'etok aatin: jun li xul aj iiqom ut mem ki'aatinak rik'in xyaab' xkux winq, ut chi jo'kan kirame'k li xmemil li propeet a'an.
17A'aneb' chanchaneb' li roqha' chaqijenaqeb', chanchaneb' li choql k'amb'ileb' xb'aan li kaqsut-iq': oyb'eninb'ileb' sa' xchamal li aak'ab'. 18Neke'aatinak rik'in xninqal ru aatin sa' xmajelal xna'leb'eb'; ut rik'in li naxrahi li tz'ejwalej jo'wi' rik'in li wank chi jo'maajo', neke'xq'unb'esi eb' li toja' xe'elk chaq sa' xyanqeb' li wankeb' sa' li ink'a' usil na'leb'. 19Neke'xyeechi'i reheb' wank chi ach'ab'anb'il, a'ut eb' a'an wankeb' rub'el xwankil li maa'usilal, xb'aan naq relik chi yaal naq yalaq k'a' re ru nanumtaak sa' xb'een li winq, a'an eechaninb'il wi' li winq a'an.
20Eb' li ak xe'xkanab' li xmaa'usilal li ruuchich'och' sa' xk'ab'a' xnawb'al ru li Qaawa' ut aj Kolol qe Jesukriist, wi neke't'il wi' chik chisa' li k'a'aq re ru a'an ut nanumtaak li maak sa' xb'eeneb', q'axal yib'aq wi' chik ru li xyu'am chiru naq kiwank chaq junxil. 21Q'axal us raj cho'q reheb' naq ink'a' xe'xnaw xb'ehil li tiikilal chiru naq, ak xnawomeb' chik, chirix chik a'an xe'xkanab' xpaab'ankil li Santil Chaq'rab' q'axtesinb'il reheb'.
22Xe'xk'ul jo' naxye jun li aatin tz'aqal yaal: “Li tz'i' naxlow wi' chik sa' li xxa'aw”,#2,22 Pr 26,11. ut: “Li aaq x'atink, naxb'ak'le wi' chik rib' sa' sulul”.
Currently Selected:
2 Pe 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.