Isa 1
1
Wichi tä ihi Judá lech'isukyajay ihi
1Täjp'ante Uzías, Jotam, Acaz, lhäy'e Ezequías, häpehen niyatey tä tajyämetso tä ihi Judá, Dios ifwenho p'ante lhämtesna Amoz lhäs tä lhey Isaías, wet yäme m'ak tä ihiyeja Judá lhäy'e Jerusalén.
2Wet yok:
“Pule lhäy'e honhat,
is chik leläte olhämet, oyok,
Owo olesa wet oyäm thänhäy,
mat lhamel tatay n'ohlä.
3Weyis nitäfwelej t'at hin'o tä lewuk,
wet asno nitäfwelej t'at lhäkw'et
tä lewuk hin'o tä lewuk.
Mat häp Israel tä häpe oka wichi,
letäfwnhayaj ihihit'a
wet ihanhiyejt'a olhämtes
tä one'tek iwoye.”
4¡Awit'äyhyaj ihi, amel tä ach'isukwis,
häp wichi tä m'ak tä ni'isa tapoyej,
tä ahäpehen iyhäj tä lakeyis ihi
wet letsayhattshi m'ak tä lewoye!
Amel lhekch'oye Lhawuk
wet lhen w'et m'ayeka
Israel laka Dios tä T'amajchet,
wet lhäplej m'ak tä ni'isa.
5Amel lelehiyejt'a tä letatayhlä Lhawuk,
wet imälhewek asan tä Lhawuk itiyej letasnhayaj.
Alätsek ihi etek
wet imälhewek akhajyhayaj noj t'at.
6Tälhe apach'ol pajtha nichäte etek,
imälhewek asan tä ni'isa,
wet alätshay ihi tä õ'aipäjwethä.
Wet nehit katsik ilänej kacha
wok yäytejpe wesaj,
wok ilänej aceite yämthilek nem äytaj.
7Aka honhat nech'e häpe t'at ts'anis
wet hupuy y'uhomche,
wet lew'en t'at tä atayhfwas
lhamel tufw t'at akäs lhay
tä ihiche alafwey.
Matche, wichi tä w'enha lhamej
yen ts'anisa aka honhat.
8Tajlhama Jerusalén tä imälhehi,
hätet iwoye n'ohuplawet
tä ihi n'olafwek tä uvas ihi,
wet hätet iwoye n'owukwefwaj
tä ihi nelom lhiley,
wet hätet iwoye hupuy tä ihi lechowej
letayhfwas tä ilunej.
9Wet chik Lhawuk tä lajit letumfwaya
nimälhtahi iyhäjfwas n'amel,
n'ahätehin'et iwoye honhates p'ante
Sodoma lhäy'e Gomorra, noj t'at.#Gén 19.24-25
Wichi tä niwoyaye m'ak tä Dios ihuminche, len'okhayaj lajit lahaya
10-11Amel tä aniyatey,
¡ahätet iwoye Sodoma kaniyatey p'ante!
Amel tä awichi tä Jerusalén lheley,
¡ahätet iwoye Gomorra lheley p'ante!
Lhek ch'ahuyaye lhaka Dios lhämet
tä ichufwen amejen tä yok:
“¿Chipte tä wujpey itshätäy
tä lelänhen wet lechäj n'oye?
Oy'elej ch'unak lhayis tä lewunhomche
tä lefwetaj lhen otw'ayhata,
lhäy'e itshätäy tä yätajen t'alhä.
Ohuminhit'a w'asetas w'oyis,
lhäy'e tson'atas les w'oyis,
lhäy'e kayla les w'oyis.
12Amel lehoyay n'oye,
¿mat atsi tä ne'tek let'äsi lhip
honhat tä ot'amajchet?
13Leyej tä lechäjay n'oye
m'ak tä lajit lahaya
tä lefwetajay lhen otw'ayhata.
Wuj tä ilänn'o letutsaj tä tälho.
Amel let'änaye wichi
yämthilek iwo lakäjyaja
tä iwel'a nech'ayekpej,
lhäy'e ifwala tä n'ot'elakw'et,
mat wuj tä ilänn'o lakäjyaj
häp wichi tä ni'isahen.
14Ohuminhit'a tä wichi iwo lakäjyajayej
häp iwel'a tä nech'ayekpej,
lhäy'e tä lhaihutpejwek
tä fwetaj n'okwi n'oyej.
¡Matche tä ilhaklitn'o, nemhit oteläytej!#Amós 5.21-22
15Tä amel letichephä akweyey
tä lewoyay alhyaja, oyahinchettso.
Tej tä lhäm wujpey alhyajay,
otch'ahuhiyet'a, tsi ates ihi,
hätet iwoyek w'oyis t'at
tä ichehen akweyey.
16¡Lej, alejchehen!
Tiyayej kanhi hach'isukyajay
häpkhilek nemhit ow'en.
Leyayej m'ak tä ni'isachehen tä lewoyaye
17wet achufwenayej tä lewoyaye m'ak tä is.
Akhajyen tä lewoye m'ak tä is alhoho.
Ch'ote aelh tä lelhakli ihi,
woye m'ak tä chipenaj isej,
wet yej täyhat m'ak tä tesa isej.”
18Lhawuk yokwe:
“Lhuyay wet n'ämawethä n'amhohen.
Tej tä hach'isukyajay wuj tä n'äl,
mat olejla, hätehlat iwoye
fwiy'et tä wuj tä ipelaj.
Tej tä hätet iwoye wesaj tä ichät,
olejla wet hätehlat iwoye
tson'ataj w'ole tä ipelaj.
19Chik lehumin wet alhen häpeya
wichi tä iwoye olhämet,
letufwayhla lhay tä wuj tä is tä tälhe honhat.
20Mat chik kawoyaye wet letatay n'ohlä,
let'inhihena chik õ'ailänhen
chik lhehi n'oka'tshayaj.”
Lhawuk lham t'at tä iwoyetso.
Lhawuk ilejla m'ak tä ni'isa tä ihi Jerusalén
21Ahäpehte honhat tä it n'oyej,
mat athana nemhit lhe n'oyej,
ahätet iwoye atsinha tä kain'oyaj länek.
Ifwalas tä pajche aka wichi
iwoye m'ak tä is alhoho,
mat athana ts'ilak t'at aläntses tä i'amej.
22Ahäpehte m'ak tä laha ihi,
mat athana ahätet iwoye m'ak tä hup mok t'at.
Pajche ahätet iwoye hat'es tä wuj tä is,
mat athana ahätet iwoye inät t'at.
23Aka niyatey lhayen Dios tayhfwasa,
etantses kalay'is t'at.
Lhaiwom'atpe chinaj t'äj,
wet iwatläk wichi iwo t'awayhtesa.
Tek tach'ote chipenhas,
wet yenhit'a tichunhayajak hip'altsen tesalis.
24Häp tä tamenej tä
Lhawuk tä lajit letumfwaya,
häp Israel laka Dios tä takhajay, yok:
“¡Naya! M'ak tä otayhfwas iwoyej n'oye,
owohla ohayahlä lhamel.
25Imälhehilawek häp okhajyhayaj
tä onuhiyeja amehen.
Owunhihola nilhok m'ak tä ni'isa tä i'amejen,
wet olejla nilhok akokhayaj.
26Oyachajihola wet äp ihla amejen n'okalelhthayajwos,
hätehlat iwoye täjte pajche,
wet hin'ol tä ichufwenwethä iyhäj
äp hätehlat iwoye täjte nech'e.
Wet chik wak'alh chik oyenlhi,
äp yachajiholak õyen eya
Honhat tä n'o'isyaj lew'et,
wet Honhat tä iyej Lhawuk.
27Wet m'ak tä is alhoho tä owoye,
ofwayhthihena wichi tä ihi Jerusalén,
häp lhamel tä iwo lehusey iyhäja.
28Mat otäyhthila wichi
tä lech'isukyajay ihiche
tä lhayen otayhfwasa,
wet lhamel tä ile n'oyej y'inhihena.
29Lehuminay tä lehoyayepej
hal'ätaj lhayis lhäy'e n'olafwey
tä lhen lew'etesa tä len'okwiyej
dios lhayis tä kamatachehen.
Mat han'äfwlhi ihla amejen
tä lewoyaye täjtso.
30Tsi ahätehlat iwoye
hal'ätaj tä lew'ole tamchäy,
wet ahätehlat iwoye
n'olafwey tä lhele tamchäy.
31Wet häp hin'o tä takhajay
hätehlat iwoye hup tä tamchäy,
wet lechumtes lak'ehen wet y'uhihomchela,
wet nehit katsik y'omatla.”
Currently Selected:
Isa 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.