Isa 2
2
Wichi letamsek tä laj lepesa
(Miq 4.1-3)
1Häp tähesna Dios lhämtes tä ifwenho p'ante Amoz lhäs tä lhey Isaías tä yämyenejlhi m'ak tä ihiyeja Judá lhäy'e Jerusalén. Wet yok:
2Häp ifwalas tä ilepese,
häp chenaj tä Lhawuk Lew'et i'pe
häpkhila chenaj tä inu'pe
nilhokej chenhas tä atoschephä,
wet õyenla häpeya chenhas laka niyat.
Wet nilhokhiyeja wichi tä i'pe honhat nämhiyela.
3Wujla'pe wichi tä yohlak,
“Mäh n'ekhen,
n'ahoye Lhawuk laka chenaj,
häp Jacob laka Dios Lew'et,
häpkhilek lham tä ichufwenla n'amejen lhämtes
yämthilek y'awoye t'at.”
Tsi Lhawuk lechufwenyaj tälhiyela Sión,
wet lhämtes tälhihola Jerusalén.
4Lhawuk itetshanhila m'ak tä iyej
wichi tä i'pe honhat,
wet isyenla alhoho.
Wet lhamel lefwajnhates yenla häpeya
lechumetcha tä isajeji lakäsw'et,
wet lehunis yenla häpeya
lechumetcha tä yistejen hup.
Nemla iche wichi chik
tachumhiyela laka'tshayajchal
yämthilek ilänejen iyhäj,
wet nemla lhaichufwenejen n'oka'tshayaj lakey.
5¡Israel lhayis, mäh n'ekhen
tä y'ehi Lhawuk laka isi!
Lhawuk itihiyeja letasnhayaj laka wichi tä lhaichäjwethä
6Iwuk, leleyej aka wichi Israel tä Jacob leles,
häp tä lhamel ihumin wet iten t'at
wichi tä tälhche tä ifwala tälhche
lakeyis tä lhamel iwoye,
wet lhayen han'ältshantsesa,
mälhyej iwoye Filisteo lhayis,
wet lhamel lhaip'ajtej t'at
wichi tä w'enha lhamej.
7Häp oro lhäy'e plata tapoyejej honhat
wet lepes ihichet'a lakäywet.
Wujpe yel'atas lhäy'e kaletas
tä n'oka'tshayajchal tä ihi honhat.
8Häte n'ocheyälis tapoyejej honhat,
wichi n'okwiyej dios lhayis tä takwey lhenhay.
9Wet mälhyejtso tä lhamel t'ayhchä
wet nemhit laha ihi.
¡Yej täyhtej letes!
10Chik wichi hiw'enlä Lhawuk chik nämla,
y'uyhihomchela chenhas tä lhamel nowayhen,
wet y'uyhihola honhat tä lhaiskatlä
Lhawuk lewujyaj tä isi.#Apoc 6.15; 2~Tes 1.9
11Wichi tä lhaiwujyen
lhäy'e iyhäj tä fwetaj lajit letumfwaya,
n'äfwelhihena.
Ts'ilakhila Lhawuk chik wichi iwujyen häp ifwalatso,
12häp ifwalahilak Lhawuk tä lajit letumfwaya
tatayhlä wichi tä lhaichäjwethä,
wet y'ayhthilahchä hin'o tä lhaiwujyen.
13Matche, Lhawuk tatayhlahlä
wichi tä fwetaj laha ihi,
tet iwoye pänhichetek tä tälhe Líbano,
häp hal'äy tä atoschephä,
wok hal'ätaj tä is tä tälhe Basán.
14Wet tatayhlahlä wichi tä fwetaj
tet iwoye chenhas tä atoschephä,
15lhäy'e lhamel tä fwetaj
tet iwoye hupuy tä atoschephä,
wok n'olafwey tä tach'opwayhen,
16lhäy'e wichi tä fwetaj
tet iwoye barcos tä wus lhäy'e tä isis.
17Wet häp lhamel tä lhaiwujyen,
lhäy'e häp wichi tä fwetaj lajit letumfwaya,
Lhawuk y'ayhthichelahchä.
Tajlhamhiyelat Lhawuk chik õ'wujyen häp ifwalatso,
18wet ihämthiyeja nilhokej dios
tä n'otkwey lhenhay wet nemla ichehen.
19Chik wichi hiw'enlä Lhawuk chik nämla
wet yäm tapoyejej honhat häp n'onowayhyaj,
lhamel y'uyhichehena chowhay tä ihiche chenhas
tä lhamel nowayhen,
wet y'uyhichehena chowhay tä ihi honhat
tä lhaiskatlä Lhawuk lewujyaj tä isi.
20Häp ifwalatso hin'ol tafwomhiyeja
dios lhayis tä oro lhäy'e plata
tä yenlhi lhamhohen yämthilek n'okwiyej,
wet ithathiyela ama lhayis lhäy'e asus lhayis.
21Chik lhamel hiw'enlä Lhawuk chik nämla
wet yäm tapoyejej honhat häp n'onowayhyaj,
lhamel y'uyhichehena chowhay tä ihiche chenhas
tä lhamel nowayhen,
wet y'uyhichehena chowhay tä ihi honhat
tä lhaiskatlä Lhawuk lewujyaj tä isi.
22Tä mälhyejtso,
leyej tä lefwetajay aisej hin'ol,
tsi iwet t'at tä iläyhi.
Niwohit m'ak chik tamenej
chik lefwetaj lewujyen.
Currently Selected:
Isa 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.