Nahúm 3
3
1¡Äytajichela m'ak tä itay ame,
hupuy tä wichi lew'oyis kot,
m'ak tä kamatache tä lew'et
wet poyej m'ayhay tä leskathen!
¡Hat'etanyajay lepes ihihit'a!
2¡Tsajlä letasnhat
lhäy'e häp kaletas käläy tä iwo lechosa!
¡Häp inukwe alhoho yel'atas
lhäy'e häp kaletas tä tiyäjchephä!
3¡Itay alhoho hin'ol tä iche'pe yel'atas!
¡Lakatnhates leleplehyaj ihi,
lhäy'e lehunis tä lepiyhiche!
¡Wuj tä iwo leläneka,
wet wujpe wichi tä y'inhen, iche letapehen!
¡Letseyhey iche ilhokej lhipey,
wet iyhäj inhäphänejthä lhamel!
4Ilhokej tähistso häp Nínive lheley
lakeyis tä iwoye tä tumenej.
Tsi hätet iwoye atsinha tä isilataj
tä õkain'oyajwo tä isakanejen wichi,
wet ithatlä tä yen chumyaja hayawu chumyaj
tä ikanejen wichi wet yen lhäytshaya.
5Häp olhamel Owuk Dios tä naj letumfwaya yok:
“Olham tä otay ahilä.
Ofwoynhiphäla haw'uy
yämlek ilhokej wichi tä i'pe honhat
aiw'en tä ats'ilakche wet hiw'en han'äfwlhi.
6Otsäyhla atape m'ak tä hich'oy
yämlek w'et am'ayek t'at
wet ilhokej wichi iyahnhila awit'äy.
7Ilhokhiyeja lhamel tä aiw'en ay'ulhanhila.
Lhamel yikhila hach'oye wet yohlak,
¡Nínive lewit'äy ihi!
¿Atsihila tä hip'altsenla?
Ihichet'ala elh chik häpe,
tsi naj lech'otfwaya.
8“Nínive, ¿hät lefwitaj lenu'pe Tebas,
häp Egipto lheley kahupuy tä lhamya
tä iwhäye tektaj tä lhey Nilo?
Häp wuj waj tä ilunejlhi,
tektaj ichehen lhipey,
häp yen lelafweka waj.
9Lham niyatej p'ante Etiopía lhäy'e Egipto,
wet lepes ihihit'a p'ante lakhajyhayaj.
Häp Fut lheley lhäy'e Libia lheley
häpe p'ante tä lhamel hich'otejlhi.
10Mat tä paj p'ante
wet õ'chäjen Tebas lheley
tä õyen kwenkaya.
Õ'thatlä nä'tshas tä lemsas,
õ'fwomejthä tä ihiche hupuy kawayhil yäk y'inhen.
Wet õyäythen ilhokej hin'ol tä len'ohyajay ihi,
õyen t'akaya chinhas wet õ'chäj,
wet letayhfwas hiw'en lhamhomche.”
11Nínive, Dios ilänla amej lewäk,
hätehlat iwoyek iyäyenla amej hat'es yämlek aw'oknaj.
Wet aleskatlalhi tä let'ukwe aletnhawet
yämlek letafwayej atayhfwas.
Tek tafwayhlame Nínive
12Nínive lheley, iche amel aka hupuy
tä lhenay lep'otesa lefwamtes tä ch'opwayhen.
Mat lhamel hätehlat iwoye
higos lhiley tä choyhatej lhay.
Chik iche elh tä isichätej,
wet lhay ichätchehchä
wet ichätho lhayhi elh tä tufwila.
Wet häp tä mälhnhiyejatso,
aka hupuy lefwamtes ichäthichela katsi
wet atayhfwas kasip'älis isiyeja tä tiyäjihomchela.
13Häp aka sip'älis hätet iwoye atsinhay.
Fwochehenla lepelis tä ihi aka honhat
yämlek len'äyij ihi atayhfwas,
wet itäj iwunhihomchela ilhokej lepelis tä õhp'ohiche.
14¡Waklhatay aka waj
yämlek lew'en chik lewatlä
chik atayhfwas inu amehen!
¡Khajyenhen afwamtes!
¡Äsche iyhät,
waklhat tä lethathomche häp lehis
yämlek lhenlhi ladrillos!
15Häp ley'ohihena tä lhehihla itäj,
wet õ'länla amejen õkatnhates yämlek anofwej,
mälhnhiyejat chol tä tuj yachuyaj yäk noj.
¡Alhayäm wujpe yämlek ahätet iwoye chol!
¡Alhayäm wujpe yämlek ahätet iwoye pänä tä tiyäjchephä!
16Häp lhayäm wujpe p'ante
akawos tä ifwenthä m'ayhay,
inu'pe häp katetsel tä ipuleye.
¡Mat tiyämehen, yikhen,
hätet iwoye chol tä fwiy'ähen!
17Aka sip'älis lhäy'e laka niyatey
hätet iwoye chol tä wujtaj'atpe.
Häp tä ichäte lewhäy tä fwotchä,
hip'akej õlafwek tä tunte.
Mat tä chayokwe tä inuphä ifwala, wet yikhen,
wet ihichet'a elh chik ihanej honhat tä ihoye.
18“Am tä ahäpe Asiria laka niyat,
y'inhen aniyatfwas.
Aka sip'älis tä khajayhen
lhamel iwo let'elakw'eta yämlek tiyäj'attsiy,
tek n'omhihena.
Wet aka wichi lhamel lha'pe häp chenhas,
wet ihichet'a elh chik ihutwek lhamel.
19¡Newache lakacha häp alätsek!
¡Ihanhiyejt'ala chik iches!
Ilhokej wichi tä iläte tä awit'äy ihi,
lhamel ischeylhi amej,
lhamel ipäjomche lakwech'ol tä käjlhi amej.
Tsi lhäy'enaj lhip m'ak tä ni'isa tä lewoyeje wichi,
wet ihichet'a elh chik naj lewit'äya ahilä.”
Currently Selected:
Nahúm 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.