Nahúm 2
2
1¡Nínive lheley, näm amehen
elh tä itay ahilähen!
¡Tihiche lew'etes aka sip'älis
yämlek t'uye aka honhat!
¡Yej leyej tä leyahinche
n'äyij tä atayhfwas nekche!
¡Äyit amejen akatnhates!
¡Akhajyenhen!
2Judá lhäy'e Israel hätet iwoye hal'äy
tä letayhfwas ikänchi, inäksen lhachal.
Mat olhamel Owuk Dios yachajiyela
lhamel len'ohyaj lhäy'e lewujyaj.
3Häp Nínive letayhfwas laka'tshayajwos,
lhamel let'okwep'otes hätet iwoye m'ak tä chät,
wet lhamel hiw'uyhiche lakhäy tä chäthen.
Wak'alhen lhamel chik iwo laka'tshayaja.
Häp lakaletas tä laka'tshayajhis
hätet iwoye itäj tä lak'ehen,
wet lew'utey yel'atas tek iwot lhamehen.
4Lakaletas ifwitsenejen tä inukwe alhoho
tä tiyäjchehen hupuy kawayhil.
Ilhokej lhipey tä ischephä tä lhamel tiyäjche.
Hätet iwoye itäj tä lak'ehen,
iläfwenhen hätet iwoye fwitsek kalep tä nekche honhat.
5Niyat t'änehen laka'tshayajwos tä khajayhen,
wet lhamel lhatajen tä inukwe alhoho
tä tiyäje õfwamhat tä ilafwlhi häp Nínive,
wet lhamel lhaiwaklhathen tä hip'oyej letapehen
laka'tshayajp'ot tä wuj.
6Häp tewok n'äyij lhaifwoyenchehen
yämlek waschä rey lew'et.
7Õ'chäj laka niyat tsinha tä õyen kweneka,
wet lakawos tsinhay tä iwo t'unfwaya.
Hich'olähen hätet iwoye hoknatas tä ifwok'onhen,
wet lhamel ipäjpe let'okwe tä tafwchehchä.
8Nínive lheley ikeltshi tä yikhen,
hätet iwoye waj tä tiyäjche len'äyij
tä tälho lhip tä toy.
Wet õt'änpe lhamel tä õyok:
“¡Yej lhekhen! ¡Yej lhekhen!
¡Äpilche han'äyij!”
Mat newache elh tä yäpilche len'äyij.
9¡Tsoklhi plata lhäy'e oro wet chäj,
tsi Nínive wuj leniyatyaj
lhäy'e m'ayhay tä isis tä laha ihi!
10¡Täy Nínive, noj m'ayhay tä ihi,
nech'e õyen ts'anisa!
Wichi tä ihi nowayhen
wet lehusey y'ilejen,
k'efwichehen lakamchetey.
Ilhokej tä naj lakhajyhayaja,
wet lete'pelis w'enha lhamejen.
11-12Nínive hätet iwoye p'ante hay'äj lew'et
lhäy'e hay'äj les lhäkw'et.
Tä hay'äj ihi lew'et, letamsek ihi
wet newache elh chik istunhen leles.
Nayapej m'ak tä hay'äj ilänhen,
wet hiw'enhomchepej lhäk
leles lhäy'e lakolis,
wet yäm poyej let'etantes häp lew'et.
Mat athana nemhit mälhyejtso,
täy t'at Nínive, noj lakhajyhayaj.
Nínive lewit'äy tä wuj
13Häp olhamel Owuk Dios
tä naj letumfwaya tä yok:
“Olham tä otay ahilä.
Owunhihomchela akaletas tä aka'tshayajhis
yämlek ts'ilak tutsaj.
Olänhenla aka sip'älis,
onojthiyeja hat'etantes tä ihi aka honhat,
wet nemla yachajo tä tsaje asilätwos lhämtes.”
Currently Selected:
Nahúm 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.