Ester 4
4
Judío lhayis wuj tä yen lelhakliya häp rey lhämet
1Tä Mardoqueo ihanej m'ak tä mälhyejtso, hich'esajche lew'uy tä yen tetneka tä wuj tä äytaj letichunhayaj. Wet taw'uyhi lew'uy tä yelaj, wet itsäype lhetek häp mok'otaj, wet ilunche hupuy wet t'änlhi tä wuj tä lefwitajayaj ihi. 2Tä nichäte rey lewukwe lepe, wet takasit, tsi tek õ'wahnej hin'o chik lew'uyis mälhyejtso yämthilek tiyäjo rey lew'et. 3Häte honhatpej tä rey lhämet nichäte, wichi tä ihi tä häpe Judío lhayis wuj tä lelhakli ihi. Wet lhaichuyhathen wet tafwchehchä, wet imähiche mok'otaj, wet taw'uyhiche lew'uyis tä yelaj.
Mardoqueo lhaip'altsene Ester chik tach'ote lepuhfwas Judío lhayis
4Wet häp reina Ester lakawos tsinhay lhäy'e hin'ol tä t'uye, lhamel ifwenho m'ak tä Mardoqueo iwoye. Tä Ester ihanej, wuj tä lelhakli ihi, wet ichene lew'uy häp Mardoqueo yämthilek ilanche lew'uyis tä yelaj tä taw'uyhi. Mat Mardoqueo tek tachumlä lew'uy tä Ester ichene. 5Tä mälhyejtso, Ester t'äne Hatac tä häpe hin'o tä rey lech'otfwa tä y'uhyene Ester. Wet ichene Mardoqueo yämthilek tay'ätshaneje m'ak tä lewit'äyhyaj lhäy'e m'ak tä tamenej tä lhaiwoynejetso. 6Wet Hatac ihoye Mardoqueo tä ihi plaza tä tatayhlä rey lewukwe lepe. 7Wet Mardoqueo ifwenho m'ak wit'äyhyaj tä iche, wet yäme häp chinaj t'äj tä Amán t'uhläk hiw'enho rey yämthilek laha tä õ'täyhat häp Judío lhayis. 8Häte hiw'enho copia tä häpe rey lhämet tä õ'wo silätayej häp wichi tä ihi Susa. Wet yok:
–W'enhola täja häp Ester yämthilek lham ihanej nilhokej m'ayhayna.
Häte ne'tek Ester lham tach'ote laka wichi Judío lhayis wet ihoye rey yämthilek lhaip'altsene, is chik ileche m'ak tä t'uhläk iwoye.
9Wet Hatac tapile Ester wet ifwenho m'ak tä Mardoqueo yäme. 10Tä Ester iläte, yachajo tä ichene Hatac häp Mardoqueo wet ithate lhämetna tä yok:
11–Nilhokej wichi tä tach'ote rey, lhäy'e nilhokej wichi tä ihiche honhates tä ihi leniyatyaj, lhamel ihanej tä elh chik häpe, hin'o wok atsinha, chik tiyäjo rey lewukwe ka'alho tä ilech'oye yämthilek ihoye rey tä nit'änaye, iche ley tä ne'tek õ'län. Tajlhamat elh chik häpek rey ipiyne chinaj tä oro tä ihi takwey, häp tä õkniläna. Oyäme täjtso, tsi athana treinta ifwalas tä rey nit'äna n'oye.
12Tä Mardoqueo iläte Ester lhämet tä Hatac ifwenho, 13lham äp yachaje lhämet tä yok:
–Tä ahäpe Judía, yej fwetaj aisiyeja tä lhehi rey lewukwe wet õ'akniläna. 14Chik katahuya wet lhok tam, mat ihichela Judío lhayis lefwayhyaj, tälhiyela lhip elh, wet am lhäy'e ajcha lepuhfwas õ'länhihena. Mat oyenek häp tä tamenej tä ahäpe reina, häpkhilek letach'ot n'oyehen tä owit'äyhyaj nek n'oyehen.
15Wet Hatac ifwenho Ester häp Mardoqueo lhämettso. Wet Ester äp yachaje lhämet tä yok:
16–Tä mälhyejtso, mäh hutwek nilhokej Judío lhayis tä ihi Susa, wet is chik lhaichuyhathen wet tach'ot n'oye. Isit'ak t'ekhen wok iyä pajla'tha tres ifwalas wet tres honatsis. Wet olham lhäy'e okawos tsinhay häte olhaichuyhathihena. Wet chik oleyej, nech'ehilak ohoye rey, tej tä onäk'äs ley tä owoye täjtso. Chik õ'länn'o, is t'at.
17Tä Mardoqueo iläte, yik wet iwoye nilhokej m'ak tä Ester ne'tek iwoye.
Currently Selected:
Ester 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.