Ester 3
3
Mardoqueo nowayhiyet'a Amán
1Tä tajyäme p'ante ifwalastso, rey Asuero hiw'enho len'ohyaj häp hin'o tä lhey Amán, häp Hamedata lhäs tä tälhe letes p'ante Agag. Wet len'ohyaj inu'pe iyhäj niyatey tä iyej. 2Wet nilhokej rey lakawos tä tach'ote lechumet, chik lhamel hiw'enlä Amán lhamel itihiche honhat lakamchetey wet t'upechehchä tä n'okwiyej, tsi häp täjtso tä rey ne'tek wichi iwoyeje. Mat häp Mardoqueo tek itihiche honhat lakamchetey wet n'okwihiyejt'a.
3Tä mälhyejtso, rey lakawos tay'ätshane Mardoqueo wet yok:
–¿Chipte tä kawoyaye rey lhämet?
4Wet nilhokej ifwalas tä lhamel tay'ätshanepej, mat lham iwohiyet'a. Tä mälhyejtso, lhamel ifwenho Amán yämthilek hiw'en chik Mardoqueo kamaj tujlhache t'at tä niwoyaye rey lhämet, tsi pajche lhaikalelhät tä häpe Judío. 5Wet tä Amán hiw'en tä Mardoqueo nitiyahi honhat lakamchetey wet nit'upeyahchä yämthilek n'okwiyej tä hiw'enlä, wuj tä lewäk ihi. 6Wet tä pajche õ'fwenho tä Mardoqueo häpe Judío, häp tä Amán yen tichunhayajak yen tesayej nilhokej Judío lhayis. Tek hits'ilkat häp Mardoqueo tä yen tesayej. Tä mälhyejtso, t'ukwe m'ak chik iwoye yämthilek ihämtej tä ilänhen Judío lhayis tä ihi Asuero niyatyaj.
Rey yenlhi lhämet tä ne'tek õ'hämtej Judío lhayis
7Tä nichäte p'ante doce nekchämis tä rey Asuero ihi leniyatyaj, häp iwel'a tä ichun, wok oyok, iwel'a tä lhey Nisán, Amán ne'tek õ'koyej suerte yämthilek õ'tshupyene ifwala lhäy'e iwel'a tä häpe yämthilek yäm wak'alh m'ak tä t'uhläk iwoye. Wet häpe ifwala trece, häp iwel'a doce, tä häpe iwel'a tä lhey Adar. 8Wet Amán tahuyej rey Asuero wet yok:
–Nilhokej wichi tä ihiche honhates tä ihi aniyatyaj, iche wichi tä lhaip'ajthiyejt'a iyhäj. Lhamel lakeyis w'enha lhamej, tek häte iwoye wichi iyhäj lakeyis, wet lhamel iwohiyet'a ämtes. Ika niyat, t'uhawethiyejt'ak iche wichina tä ihi aniyatyaj. 9Chik lehuminche, enlhi ämet tä is chik õ'täyhat nilhokej. Wet olham ow'enhihola hin'ol tä lechumet chinaj t'äj trescientos treinta mil (330.000) kilos plata yämthilek alewuk t'at.
10Wet tä rey iläte, ilanhi lefwujhi wet hiw'enho Amán, häp hin'o tä tatayhlä Judío lhayis. 11Wet tahuyej wet yok:
–Alewuk t'at häp chinaj t'äj. Woyeje wichitso m'ak tä let'uhläk lewoyeje.
12Wet ifwala trece, häp iwel'a tä ichun, rey t'äne lelesaynekwos, ne'tek ilesayen Amán lhämtes tä ichene nilhokej niyatey tä ihi rey niyatyaj, lhäy'e gobernadores tä ihiche honhates. Wet lhamel ilesayen Amán lhämtes wet ichene honhates, itihi wichi lhämtes tä w'enhache lhamej lhäy'e lelesaynhay tä w'enhache lhamej, wet õ'tihi rey Asuero lhey lhäy'e lefwujhi laka sello. 13Wet lakachenhay ihäne nilhokej honhates tä ihi rey niyatyaj. Wet õne'tek fwala tefwajni wet noj t'at Judío lhayis tä õ'täyhat nilhokej, mamses, thänhäy, nä'tshas, atsinhay, wet õtchuma nilhokej m'ak tä lewuk lhamel. Wet ifwala tä õ'tshupyene häpe t'at ifwala trece, iwel'a doce, wok oyok, iwel'a tä lhey Adar. 14Wet niyat lhämettso õyen häpeya ley, wet õ'chene nilhokej honhates yämthilek wichi lhaiwaklhatejen ifwalatso.
15Wet rey ne'tek yofwajkwet õyikchufwi, häte õ'hantej nilhok wichi tä ihi Susa, häp hupuy tä lhamya. Wet rey lhäy'e Amán lhamel tatachephä wet iyä tä yen kafwtsenyaja. Mat wichi tä ihi Susa wuj tä lelhakli ihi.
Currently Selected:
Ester 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.