1~Tim 1
1
Pablo ichene len'okhayaj häp Timoteo
1-2Amtena ipuhfwa Timoteo,#Ap.Lh 16.1 olham Pablo ochen ame olhämetna tä ohäpe Cristo Jesús laka apóstol, wok oyok, lakachenhay tä lhamenya elh, tä Dios Lhafwayhthi yen n'oye, lhäy'e Cristo Jesús tä häpe lhaniwhayaj. Wet am tä ahätet iwoyek olhäs tä ohumnekej lhachayaj,#1~Cor 4.17; Fil 2.19-22 is chik Dios Lhajcha lhäy'e Cristo Jesús Lhawuk iti amej lakäpfwayaj tä is, lhäy'e lep'altsenyaj, lhäy'e atamsek.
Yej tekm'ahatlä n'ochufwenyajay tä kamatachehen
3Tä ohoyehte Macedonia, wet onityente amej chik lemälhehi Éfeso, tsi iche hin'ol tä yen chufwenyaja m'ayhay tä ni'isa alhoho, wet ot'uhläk lefwenho yämlek ileyej. Athana kamaj häpe t'at tä one'tek lewoye täjtso. 4Yej ch'anlhaye chik lhamel lhainahhatejwethä p'alhalis, wok najit lepesa tä w'et t'at tä lhaichufwenej lhachätilis p'ante. Tähestso tamenej wichi tä iwoyepej lhämtes tä najit lahaya. Tek tach'ote yämlek ichaye wet iwoye m'ak tä Dios lenech'ethayaj.
5Häp m'ak tä tamenej tä onityen amej täjtso, ot'uhläk Dios leles itipej lhamejen lehumnhayaj tä tälho lehusey tä isen lhäy'e lechayaj tä ts'ilak, wet tä tälho letichunhayaj tä newache m'ak tä yen n'äfwlhiya lhamejen. 6Iche iyhäj tä nistakej tähestso, lhaiwetahathi lhämtes tä najit lahaya tä hiw'en lhamhomche. 7Fwetaj lhayen lewosayej Ley p'ante tälhe Moisés, mat ihanhiyejt'a m'ak tä lhamel yämejlhi lhäy'e m'ak tä yen chufwenyaja tä fwetaj häpe m'ak tä kalelhäj.
8N'amel y'ahanej tä Ley p'ante tälhe Moisés häpe m'ak tä is, chik õ'chumyenlhi mälhyej m'ak tä häpe. 9Tsi oyok, häpkhit'a wichi tä isen tä tamenej tä õyenlhi leyes, mat häpe t'at lhamel tä iwoyepej m'ak tä ni'isa tä tamenej, lhäy'e iyhäj tä fwitses, lhäy'e wichi tä kachuhantses, lhäy'e n'och'isukyaj kwenkay, lhäy'e lhamel tä iläkwlhi Dios wok iläkwlhi m'ayhay tä n'ot'amajchetes, lhäy'e wichi tä ilän lajcha wok lako, lhäy'e n'olhikoy chik häpe, 10lhäy'e lhamel tä iwo lakain'oyaja, lhäy'e hin'ol tä lhayen ch'efwasa, lhäy'e lhamel tä t'etane wichi wet yen kwenkaya wet iwom wet ikalhi kolhki, lhäy'e lhamel tä w'et yämwethä, lhäy'e wichi tä hit'unhatche lhämet tä lefweynhayaj, lhäy'e elh at chik häpe tä iwoye m'ak tä tatayhlä n'ochufwenyaj tä is tä tälhe Dios. 11Häp n'ochufwenyaj tä isna ihi t'at n'osilätyaj tä isilataj tä Dios tä lewujyaj ihi ne'tek olham oyen lhämeta.
Dios yäm wuj lep'altsenyaj tä itiyej Pablo
12Owo graciasayej Cristo Jesús Lhawuk, häp lham tä hiw'en n'oho okhajyhayaj, wet yen n'oye elh tä afwtintsaj, wet iti n'ohi lechumet, 13tej tä ofwitsajehte wet oyetejepej olhämtes tä lhäy'e lhip tä ni'isachehen, wet owopej ka'tshayajayej.#Ap.Lh 8.3; 9.4-5 Tsi tä ohäpehte kachuhantsaj wet n'am hanejte m'ak tä owoye, Dios hip'altsenn'o, 14yäm wuj lep'altsenyaj tä iti n'oyej. Itiyej kanhi okachuhanyaj wet hiw'en n'oho ochayaj lhäy'e ohumnhayaj, mälhyej tä in'amejen tä y'ap'akej Cristo Jesús.
15T'uhawetej chik nilhokej wichi t'ekhache n'olhämet tä matchena tä yok, Cristo Jesús nek p'ante honhatena yämlek ifwayhthen wichi tä lesukyaj ihi. Wet olham ohäpe elh tä hich'atej tä lesukyaj ihi. 16Mat Dios iti n'oyej lep'altsenyaj, häpkhilek wichi hiw'en tä Cristo Jesús wuj tä iteläyit n'oyej, wet mälhhiyejattso iyhäj chik ichaye wet ikatej lew'atshancheyaj tä t'un. 17¡N'an'okwiyej wet n'awujyen yämlek tiyäj'attsiy häp Dios weihalha, häp lham tä nin'äla, wet häpe Niyat tä najit lepesa, wet n'ilataj! Amén.
18Yäs Timoteo, ow'en amho olhämetna tä yiwethi Dios lhämtes tä yäm ame tä lham ifwenhomche naji laka silätwos. Yej leyej tä lhenpej atichunhayaja lhämtestso, yämlek ais alhoho tä lewo aka'tshayaja tä letatayhlä m'ak tä ni'isa. 19Ti amej achayaj lhäy'e atichunhayaj tä is tä newache m'ak tä lhen han'äfwlhiya amej. Iche iyhäj tä itiyej kanhi letichunhayaj tä is, lhamel hätet iwoye chik hich'ahat lechayaj. 20Häp tä mälhyejtso Himeneo lhäy'e Alejandro lewit'äyhyaj. Lhamelna pajche oyachaje Satanás,#1~Cor 5.5 häpkhilek lhamel ihanej wet nemhit iyeteje lhämtes tä ni'isachehen häp Dios.
Currently Selected:
1~Tim 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.