1~Tim 2
2
Dios leles lakey tä t'uhawetej chik iwoye tä iwo t'alhyaja
1Chunkat onityenej Dios leles chik iwopej t'alhyaja'pe nilhokej wichi, lhäy'e tä lhaip'altseneje Dios, lhäy'e tä iwo graciasayej. 2Wet lhäy'e lhip tä t'uhawetej chik y'alhyenepej Dios häp n'owustas lhäy'e nilhokej niyatey, häpkhilek newache m'ak at chik häpe, yämthilek lhatamsekis ihi, wet y'atiyejpej lhan'okhayaj Dios wet y'awoyepej m'ak tä is alhoho, häp m'ak tä t'uhawetej Dios leles. 3Tsi täjtso häp tä is, wet ikänitlhi Dios Lhafwayhthi 4tä t'uhläk nilhokej wichi tafwayhen wet nitäfwelej lham lhämet tä matche. 5Tsi weihalha Dios, wet weihalha Hin'o tä hip'ajtej wichi häp Dios. Hin'otso häpe t'at Cristo Jesús 6tä lhaiwom p'ante wet lhayen lahaya nilhokej wichi.#Mat 20.28; Mar 10.45; Gál 1.4; Tit 2.14 Tä nichäte p'ante lewhäy, Dios lhämetwos yen silätyaja täjtso. 7Wet olham häp tä Dios yenn'o häpeya laka silätwo wet apóstol, wet ne'tek ochufwenejen wichi tä kahäpeya Judío lhayis häpet n'ochayaj lhäy'e m'ak tä matche. Matche olhämet, tek w'et oyämlhi.#2~Tim 1.11
8Tä mälhyejtso, ot'uhläk hin'ol tä ihi lhip chik häpe iwo t'alhyajaye Dios wet ipiynejphä takweyey. Wet tä iwoye, ot'uhläk hits'ilkat lehusey wet newache lewäk wok lhämtes tä inokwajwethä lhamejen.
M'ak tä t'uhawetej chik atsinhay iwoye
9Häpet atsinhay, oyok, Is chik taw'uyhi lew'uyis tä t'uhawetej tä häpe atsinhay, yämthilek n'älej tä häpehen iyhäj tä lehusek ihi. Chik lhayenlhi, isit'ak yäm wuj tä isilatyen lew'ole, ithat lhamej m'ak tä oro, lhamsilis tä isis, lew'uyis tä wuj laha.#1~Ped 3.3 10Mat m'ak tä is tä tet iwoyek yen lew'uya, häpe t'at m'akpej tä is tä iwoye, tsi häp tä t'uhawetej atsinhay tä lhayen Dios t'amajchetesa.
11Chik wichi lhaihutwek, atsinhay t'uhawetej chik yok tam wet tach'ahuye m'ak tä õ'chufwenej. 12Owahnhiyejt'a chik atsinhay iwo lechufwenyaja wok tet iwoyek lhayen hin'ol kaniyateya. T'uhawetej chik yok tam. 13Tsi Dios ichunkat p'ante Adán tä yenlhi, wet tä tajyäme, nech'e yenlhi atsinha Eva.#Gén 2.7,21-22 14Wet häpkhit'a Adán tä ahättaj ikanej p'ante, mat häpe p'ante atsinha, wet äp nichätho lech'isukyaj.#Gén 3.1-6
15Mat atsinha lefwayhyaj ihiyeja chik t'amaj lhamej tä häpe atsinha tä leles ihi, wet nileyayej lechayaj lhäy'e lehumnhayaj lhäy'e le'isyaj.
Currently Selected:
1~Tim 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.