Rudu 3
3
Rudu aw iŋga Boaj loo-kunda-kó’g
1Naomi gə́ to məəm Ruduje lé dəjee pana: Ŋgonəm, see m’a saŋg loo kari wa rɔi keneŋ ləm, kari si ne dan maji’g ləm tɔ el wa. 2Ɓasinè lé Boaj, yeḛ gə́ i aw gə kuraje ləa gə́ dené na̰’d loo kinja kó’g lé see yeḛ to njenoji lə sí gə́ pər el wa. Aa oo, loondul gə́ nee lé yeḛ a gə k’aw tó kó-ɔrj gə́ to loo-kunda-kó’g ləa lé. 3Bèe ndá maji kari ndogo mán ləm, ndəm ubu gə́ ə̰də sululu ɓa ula kubu gə́ maji rɔi’g ndá ḭ aw loo-kunda-kó’g lé. Nɛ ar kəm dəw neelé oso dɔi’g el saar njen loo gə́ yeḛ sɔ né ləm gə ai né mba̰ ləm ɓa. 4Loo gə́ yeḛ a kaw gə mba kaw toɓi ndá tən loo gə́ yeḛ a gə to keneŋ lé maji. Tɔɓəi aw gée’g ndá, un kubu dɔ gɔlee’g ya̰ to keneŋ ɓa yeḛ nja a kulai né gə́ kəm kari ra ɓəi. 5Rudu tel ilá keneŋ pana: Néje lai gə́ i ulam lé m’a ra ya.
6Yeḛ ḭ aw loo-kunda-kó’g lé ndá yeḛ ra néje lai gə́ məmeeje ulá mba karee ra lé ya tɔ. 7Boaj lé loo gə́ sɔ né ləm gə ai né ləm tɔ ndá rəa kara lelee ya tɔ. Yeḛ ɔd aw to naŋg ŋgaŋ koje’g ləa gə́ dɔm dɔ na̰’d lé tɔ. Yen ŋga Rudu ree yo̰roŋ bèe ree un kubu dɔ gɔlee’g ndá rəm to naŋg gə́ gɔlee’g gogo lé ləm tɔ. 8Dan loo bab ndá diŋgam neelé ndilee uree bal, tɔɓəi yeḛ tel rəa was ndá yeḛ oo to gə́ dəw gə́ dené to naŋg gə́ gɔlee’g. 9Boaj un ta dəjee pana: See i to nawa.
Yeḛ ilá keneŋ pana: To ma Rudu, kura ləi gə́ dené lé ya, maji kari un ta kubu ləi ila dɔ kura ləi gə́ dené’g lé mbata i ya to njenoji lə sí gə́ pər gə́ njekaa dɔ sí lé ya tɔ.
10Boaj ilá keneŋ pana: Némbaaje, maji kar Njesigənea̰ tɔr ndia dɔi’g ya. Gelgodo ləi gə́ gogo neelé ɔr gin néraije gə́ kédé lé njai ya, mbata i aḭ goo ŋgan basaje’d gə́ to gə́ njéndooje əsé gə goo dee-deḛ gə́ njénékiŋgaje’g el. 11Ɓasinè lé, ŋgonəm, maji kari ɓəl el, m’a ra səi néje lai to gə́ i pa lé mbata dəwje ləm gə́ d’isi tarəwkɔgje’g lé deḛ lai gəri gə́ dené gə́ njemeemaji ya. 12Tɔgərɔ ya, ma lé m’to gə́ njenoji ləi gə́ pər gə́ njekaa dɔi ya nɛ yeḛ gə́ raŋg gə́ kojikəi kɔl undam-ma si gən ɓəi . 13Loo dum yaa̰ ɓa nee ndá i to nee ya ɓoŋ. Bèlè ɓa ɓó lé yeḛ neelé ndigi ra səi gə goo noji gə́ wɔji dɔ njekaa dɔi lé ndá maji karee ra ya. Nɛ ɓó lé yeḛ ndigi ra səi bèe el ndá ma nja m’a ra səi né gə́ kəm ra lé ya, Njesigənea̰ to Njesikəmba ya! Maji kari to nee ya saar kar loo àr ɓa.
14Yeḛ to naŋg gɔl Boaj’g saar ar loo àr ndá yeḛ ḭta gə loo gə́ to gḭdo-gḭdo gə́ dəw askəm gər maree el ɓəi. Boaj pana: Maji kar dəw kára kara gər to gə́ dené ree loo-kunda-kó’g neelé el. 15Tɔɓəi yeḛ ila ta gə́ raŋg keneŋ ɓəi pana: Am kubu gə́ boi yul gə́ ila dɔi’g lé gə́ nee ndá wa təa ŋgəji.
Yeḛ wa ta kubu neelé ŋgəji ndá yeḛ wɔji kandə kó as nékwɔji kwɔi-lə-né dɔg-giree-mi ɔm keneŋ aree, tɔɓəi yeḛ wa səa unda dəa’g aree tel aw ne mee ɓee’g tɔ. 16Rudu tee rɔ məmeeje’g ndá Naomi dəjee pana: Ŋgonəm, see to i ya wa.
Rudu ɔr goo néje lai gə́ diŋgam neelé ra mbata ləa lé ya. 17Yeḛ pana: Yeḛ lé wɔji kandə kó as nékwɔji kwɔi-lə-né dɔg-giree-mi am mbata yeḛ pana: M’a tel gə jim kari ba kaw rɔ meemje’g el
18Tɔɓəi Naomi pana: Ŋgonəm, si lɔm saar ndá a gər gin né gə́ a gə teḛ lé ɓəi mbata dəw neelé a kwa rəa el saar a ra né neelé tɔlee bém ɓogənè ya.
Currently Selected:
Rudu 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.