Rudu 2
2
Rudu wa ɓuru mee ndɔ’g lə Boaj
1Ŋgoko̰ ŋgaw Naomije kára si gən. Yeḛ to dəw gə́ boo gə́ to bao tɔ, dəw neelé to njenoji lə Elimelek gə́ ria lə Boaj. 2Rudu gə́ dené gə́ Moab lé dəji Naomi pana: See a k’ya̰ loo kam m’aw m’wa ɓuru mee ndɔ’g lə yeḛ gə́ a kila kəm toro’g el wa.
Ndá Naomi ilá keneŋ pana: Aw ya, ŋgonəm .
3Togə́bè ɓa yeḛ ɔd aw wa ne ɓuru mee ndɔ’g goo njékinjakoje’g lé tɔ. Tɔɓəi né unda maji ar ndɔ neelé to ka̰ Boaj, yeḛ gə́ to njenoji lə Elimelek lé.
4Aa oo, Boaj lé ḭ Betlehem ree tɔ ndá yeḛ ula njékinjakoje lé pana: Maji kar Njesigənea̰ nai sə sí.
Deḛ tel d’ilá keneŋ pana: Maji kar Njesigənea̰ tɔr ndia dɔi’g tɔ.
5Tɔɓəi Boaj dəji kura ləa gə́ njekaa dɔ njékinjakoje lé pana: See ŋgoma̰də neelé to ŋgolə nawa.
6Kura gə́ njekaa dɔ njékinjakoje lé ilá keneŋ pana: To ŋgoma̰də gə́ Moab, yeḛ gə́ ḭ gə Naomi mee ɓee gə́ Moab ɓa ree səa na̰’d lé ya. 7Yeḛ lé dəji sí pana: Neḛ n’ra ndòo rɔ sí’g mba kar sí j’ya̰ loo j’ar neḛ gə mba kar neḛ n’wa ɓuru ləm, gə n’wa dɔ-siŋga koje mbɔr koje gə́ d’ɔm dɔ na̰’d goo njékinjakoje’g ləm tɔ. Loo gə́ yeḛ ree lé k’aaree gə aar tar gə ndɔ ba ya saar ɓasinè ndá k’wa ya kara yeḛ wa rəa naŋg gəd el ləm tɔ.
8Yen ŋga Boaj ula Rudu pana: Ŋgonəm gə́ dené, tuga mbii oo ne ta ləm: maji kari aw mee ndɔ gə́ raŋg’d mba kwa ɓuru keneŋ el ŋga ləm, gə́ ya̰ mee ndɔ nee gə goo ŋgalee el ləm tɔ, nɛ i a nai gə kuraje ləm gə́ dené nee ya. 9Maji kari ɔree kəmi sḭ dɔ loo gə́ d’inja kó keneŋ ndá aw goo dee’g. Mbata ma m’un ndum mba kar kuraje ləm gə́ diŋgam jɔgi el. Loo gə́ kṵdaman a tɔli ndá i a kaw loo gə́ duraje to keneŋ mba kai mán gə́ kuraje ləm tɔ d’ɔm keneŋ lé ya.
10Togə́bè Rudu oso naŋg bəbərə unda barmba nea̰’g ulá pana: See mbata ɗi ɓa ma gə́ m’to dəw gə́ dɔ ɓee’g nee ya i ila kəm toro’g ləm, i ə̰ji dɔm’g ləm tɔ bèe wa.
11Boaj tel ilá keneŋ pana: D’ulam goo néje lai gə́ i ra gə məmije goo kwəi’g lə ŋgabije ləm, gə ta lə bɔbije gə kɔinje gə ɓee-kojii gə́ i uba dee ya̰ dee gə mba kaw rɔ dəwje’d gə́ i gər dee kédé’g el lé ləm tɔ. 12Maji kar Njesigənea̰ wa səi noji godə maree’g ləm, maji kar nédɔji ləi bura ḭ rɔ Njesigənea̰’g, Yeḛ gə́ to Ala lə Israɛlje ləm, Yeḛ gə́ i ree mba kula dɔi gel bagee’g lé ləm tɔ.
13Ndá Rudu tel ilá keneŋ pana: Ǝi mbai ləm, maji kari ila kəm toro’g ya. Ma lé m’to Ŋgonjelookisi ləi gə́ dené el ya nɛ lé bèe kara i lé gɔl məəm ar tapai ur məəm’g njɔd ya.
14Loo gə́ kàr sɔ né as mba̰ ndá Boaj ɓar Rudu ulá pana: Gə́ ree gə́ rɔ sí’g nee ree sɔ sə sí né, ndá gaji muru ləi lé ula dan mán-nduú gə́ mas’d sɔ. Ndá Rudu rəm si naŋg mbɔr njékḭja koje’g,
Tɔɓəi Boaj ula dɔ kó gə́ yɔlé aree ndá yeḛ sɔ ar mée ndan tub ɓa yeḛ ŋgəm gesee gə́ nai tɔ. 15Yee ɓa loo gə́ yeḛ ḭta aw gə mba kwa ɓuru lé ɓəi ndá, Boaj lé un ndia ar kuraje ləa pa pana: Mbɔr kó gə́ d’ɔm dɔ na̰’d ya kara ya̰je loo areeje wa ɓuru keneŋ ɓó jɔgeeje el. 16Esé dɔ koje gə́ boi maji ya kara, loo gə́ na̰je lé ya̰je goo sí’g areeje wa ne ɓuru ɓó ndaŋgeeje dɔ’g el tɔ.
17Togə́bè ɓa Rudu wa ne ɓuru mee ndɔ’g lé saar kàrkemetag ndá yeḛ swa ɓuru gə́ yeḛ wa lé. Kandə kó-ɔrj gə́ yeḛ iŋga lé nai lam ba karee as nékwɔji kwɔi-lə-né rɔ-munda. 18Yeḛ un kó ləa lé aw ne ɓée ndá məmeeje oo ɓuru gə́ yeḛ wa lé ləm, Rudu teḛ gə ges nésɔ gə́ nai lé kara aree ləm tɔ. 19Memeeje dəjee pana: See loo gə́ ra ɓa i wa ɓuru keneŋ yaa̰ bèe wa. See loo gə́ ra ɓa i ra kula keneŋ wa. Maji kar ndutɔr nai gə yeḛ gə́ ə̰ji dɔi’g bèe lé ya.
Rudu lé ula məmeeje ri dəw gə́ yeḛ ra kula mee ndɔ’g ləa lé pana: Dəw gə́ m’ra kula mee ndɔ’g ləa lé ria lə Boaj. 20Naomi ula məmeeje lé pana: Maji kar Njesigənea̰, yeḛ gə́ oo kəmtondoo lə deḛ gə́ d’isi kəmba to gə́ yeḛ ra mbata lə deḛ gə́ d’wəi mba̰ lé tɔr ndia dəa’g ya.
Tɔɓəi yeḛ ulá pana: Dəw neelé to njenoji lə sí gə́ pər ya, yeḛ to dəw gə́ mbuna deḛ gə́ njekoo goo síje-je lé ya .
21Rudu ila ta’g lə məmeeje lé pana: Yeḛ kara ulam mba karm m’nai gə kuraje ləa saar kar dee tɔl kula kinja kó ləa lé bém ɓa.
22Naomi ula Rudu lé pana: To maji ya, ŋgonəm, maji kari teḛ aw gə kuraje ləa gə́ dené ya ɓó gə mba kar dee d’ooi mee ndɔ gə́ raŋg’d el.
23Togə́bè ɓa yeḛ nai ne gə́ rɔ kuraje’g lə Boaj gə́ dené wa ne ɓuru saar deḛ tɔl ne kula kinja kó-ɔrj lé ləm, gə kó lə dee gə́ ɓaree blé lé ləm tɔ. Nɛ Rudu lé si ne gə́ mee kəi’g lə məmeeje lé ya ɓəi.
Currently Selected:
Rudu 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.