Mark 16
16
Teḛ loo-yoo lə Jeju lé
Mat 28.1-8, Lug 24.1-12, Ja̰ 20.1-10
1Loo gə́ ndɔ-kwa-rɔ lé dəs mba̰ ndá Mari gə́ Magdala ləm, gə Mari gə́ ko̰ Jak ləma, gə Salome ləm tɔ lé ndogo ubu gə́ ə̰də sululu d’aw mba kɔm dɔ Jeju’g. 2Ndɔ gə́ doŋgɔr gə́ njekorè goo ndɔ-kwa-rɔ lé deḛ teḛ gə́ ndɔ rad d’aw dɔɓar’g, teḛ keneŋ loo gə́ kàr si uba gə́ kuba ɓəi. 3Deḛ d’ula na̰ ta pana: See na̰ ɓa a nduburu biri mbal gə́ to ta dɔɓar’g lé kilá raŋg kya̰ loo kar sí wa.
4D’ɔr dɔ dee gə́ tar ɓad ndá d’aa loo d’oo biri mbal gə́ boi lé nduburu oso raŋg. 5Deḛ d’andə mee bwa-dɔɓar’g lé ndá deḛ d’oo basa gə́ ula kubu gə́ nda rəa’g sí gə kel dɔ jikɔlee’g bèe ndá ɓəl unda dee badə gaŋg dee. 6Yeḛ ula dee pana: Ɓəlje el ɓòo, seḭ saŋgje Jeju gə́ Najaret gə́ deḛ ɗaree lé, nɛ yeḛ unda loo teḛ mba̰ ɓó yeḛ to loo gə́ nee’g el ŋga: aaje loo ooje loo gə́ d’ilá keneŋ lé tɔ. 7Nɛ ɔd aw ulaje njékwakiláje ləm, gə Piɛrə ləm tɔ to gə́ Jeju lé ɔd no̰ sí’g sí aw gə́ Galile mba̰, lé neelé ɓa seḭ a kéeje keneŋ nu to gə́ yeḛ ula sí lé ya tɔ .
8Deḛ d’ḭ dɔɓar’g d’ɔd d’aḭ. Ɓəl unda dee badə gaŋg dee ar dee d’unda bala tigi-tigi. Deḛ d’ula dəw kára kara taree el mbata deḛ ɓəl rɔ dee tɔ.
Jeju teḛ wai kəm Mari gə́ Magdala’g lé
Mat 28.9-10, Ja̰ 20.11-18
9Jeju unda loo teḛ gə ndɔ gə́ doŋgɔr gə́ orè goo ndɔ-kwa-rɔ lé ndá yeḛ teḛ dɔ Mari gə́ Magdala gə́ yeḛ tuba ndilje gə́ yèr mée’g siri kédé lé. 10Yeḛ un taree aw pa ar deḛ gə́ d’isi səa kédé lé gə́ d’isi no̰ d’wa ne ndòo rɔ dee lé. 11Loo gə́ deḛ d’oo to gə́ yeḛ si kəmba ləm, d’oo to gə́ Mari lé ée ləm tɔ ndá deḛ d’ɔm meḛ dee dɔ’g el.
Jeju teḛ dɔ njékwakiláje gə́ joo’g lé
Lug 24.13-35
12Gée’g gogo ndá yeḛ teḛ gə rəw gə́ raŋg kəm njé’g ləa gə́ joo gə́ d’isi d’aw gə́ kɔrɔ lé. 13Deḛje neelé tel d’aw d’ula mar deeje gə́ raŋg, nɛ deḛ mbad kɔm meḛ dee dɔ ta’g lə dee lé saar nja tɔɓəi.
Jeju teḛ dɔ njékwakiláje gə́ dɔg-gir-dee-kára’g lé
Mat 28.16-20, Lug 24.36-49, Ja̰ 20.19-23, NNk 1.6-8
14Waga tɔɓəi ndá Jeju teḛ kəm deḛ gə́ dɔg-gir-dee-kára gə́ d’isi ta ka-nésɔ’g lé, yeḛ ndaŋg dee dɔ meendər’g lə dee ləm, gə dɔ kɔstarəw’g lə dee ləm tɔ, mbata d’ɔm meḛ dee dɔ ta’g lə deḛ gə́ d’ée loo gə́ yeḛ unda loo teḛ dan njé gə́ d’wəi’g lé el. 15Tɔɓəi yeḛ ula dee pana, awje gə loo-loo dɔ naŋg nee ilaje mber tagə́maji lé arje dəw-kundaje lə Ala lé lai . 16Yeḛ gə́ a kɔm mée dɔ’g kar dee rəa batɛm lé a kaji ne ya, nɛ yeḛ gə́ a kɔm mée dɔ’g el ndá taree a kwa dəa ya tɔ. 17Aa ooje, némɔrije gə́ a korè rəw gə deḛ gə́ d’a kɔm meḛ dee dɔ’g lé ɓa nee: Mbɔl dɔ rim ɓa d’a tuba ne ndilje gə́ yèr ləm, d’a pa ne tapa dəwje gə́ ɓəd-ɓəd ləma, 18d’a kwa ne lije gə ji dee peb-peb ləm, lé d’ai kuma̰ yoo lé a ra dee majel el ləma, d’a kila ji dee dɔ njérɔko̰je’g ndá njérɔko̰je lé d’a kaji kəbərə-kəbərə ya ləm tɔ.
Jeju tel aw rɔ Ala’g
Lug 24.50-53, NNk 1.9-11
19Mbaidɔmbaije lé loo gə́ yeḛ ɔr ta neelé ula dee togə́bè mba̰ ndá né unee mbuna dee’g igi səa dara kag aree si dɔ jikɔl Ala’g tɔ . 20Deḛ d’ḭ d’aw gə loo lai d’ila mber tagə́maji lé ya. Mbaidɔmbaije orè dee més loo kula ra dee’g ya ndá yeḛ ar dee ra némɔrije d’orè ne kaar ta ləa gə́ deḛ d’ɔr lé aree to gə́ kankəmta ya.
Currently Selected:
Mark 16: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.