Mark 15
15
Jeju aar no̰ Pilatə’g
Mat 27.1-2,11-14, Lug 23.1-5, Ja̰ 18.28-38
1Teḛ gə ndɔ rad, mbai dɔ njékinjanéməsje-je d’wa dɔ na̰ gə njé gə́ tɔgje ləm, gə njéndaji-maktubje ləma, gə njégaŋ-rəwtaje lə Jibje ləm tɔ mba kwɔji loo né gə́ d’a gə ra. Yen ŋga deḛ d’uba Jeju gə kúla njim-njim ndɔree d’aw d’ulá ji Pilatə’g. 2Pilatə dəji Jeju pana: See i lé to gə́ mbai lə Jibje lé wa.
Jeju ila dee keneŋ pana: Yee nja i pa tai gən mba̰.
3Mbai dɔ njékinjanéməsje-je d’ɔm taje bula dəa’g səgee ne. 4Ndá Pilatə tel dəjee tɔɓəi pana: See i a teḛ tai kila dee ta’g el nja saar wa. See boo-taje gə́ d’ɔm dɔi’g səgi ne neelé see i oo el wa.
5Jeju teḛ təa ja̰ ila ta kára kara keneŋ el ar kaar Pilatə lé wá paḭ.
Deḛ gaŋgta yoo dɔ Jeju’g njaŋg
Mat 27.15-26, Lug 23.13-25, Ja̰ 18.39–19.16
6Gə ndɔ Pag-Pag lé daŋgai gə́ boo-dəwje dəjee ndá Pilatə ilá tar ar dee ar dee. 7Da̰gai kára ria lə Barabas si gə njéboakaiya mareeje na̰’d kəi-daŋgai’g mbata tɔl gə́ deḛ tɔl dəw loo gə́ d’ḭ gə mba tuji njéko̰ɓeeje. 8Boo-dəwje d’ḭ d’uba jugugu-jugugu gə keneŋ gə mba dəjee né gə́ yeḛ aw ra ta-ta ar dee lé. 9Pilatə dəji dee pana: See seḭ ndigije karmje m’ɔr mbai lə Jibje lé m’ilá tar m’ar sí wa.
10Mbata yeḛ gər gao, kəmkəḭ ɓa mbai dɔ njékinjanéməsje-je d’wa ne Jeju d’ulá ne jia’g. 11Nɛ Mbai dɔ njékinjanéməsje-je lé d’ula njuma̰ mee boo-dəwje’g neelé mba kar dee d’ula Pilatə d’aree ɔr Barabas ɓa ilá tar ar dee. 12Pilatə un ta dəji dee tɔɓəi pana: Ŋga see ɗi ɓa seḭ ndigije karmje m’ra gə yeḛ gə́ seḭ ɓareeje mbai lə Jibje lé ɓəi wa.
13Deḛ ra né u-u-u pana: Ɗaree gə́ ɗar ya.
14Pilatə tel dəji dee pana: Né majel gə́ yeḛ ra lé see to gə́ ɗi wa.
Nɛ deḛ ra né u-u-u unda nje gə́ kédé pana: Ɗaree gə́ ɗar ya.
15Pilatə ndigi kar rɔ boo-dəwje lé lel dee dəa’g ndá yeḛ ila Barabas tar ar dee, tɔɓəi yeḛ ar dee kunda Jeju gə ndəi-kɔb ɓa yeḛ wá ulá ji dee’g gə mba kar dee d’aw ɗaree.
Njérɔje d’ula sul dɔ Jeju’g
Mat 27.27-31, Ja̰ 19.2-3
16Njérɔje ndɔree d’aw səa gadloo gə́ mee ndògo’g lə mbai gə́ njeguburuɓee ndá d’ar njérɔje lai mbo̰ dɔ na̰ keneŋ. 17Deḛ d’ula kubu gə́ boi yul gə́ ndul piro-piro rəa’g ləm, deḛ pḛdé kun gə́ dɔgugu d’ulá dəa’g ləm tɔ. 18Tɔɓəi deḛ d’un kudu rəa lapia pa ne pana: Lapia ɓòo, mbai lə Jibje!
19Deḛ kunda dəa gə kag-kɔbə ləm, deḛ tibi yiro kəmee’g ləma, deḛ rəm gə kəji dee yəm-yəm dəb ne kəm dee naŋg nea̰’g ləm tɔ. 20Loo gə́ deḛ d’ula sul dəa’g togə́bè mba̰ ndá deḛ d’ɔr kubu gə́ boi yul gə́ ndul piro-piro lé rəa’g, rəm d’ula darɔ kubu ləa-yeḛ nja rəa’g gogo, ɓa d’ɔd ndɔree d’aw səa gə mba ɗaree ɓəi tɔ.
Deḛ ɗar Jeju
Mat 27.32-44, Lug 23.26-43, Ja̰ 19.17-27
21Dəw kára gə́ ɓee ləa Sirèn, ria lə Simo̰, bɔ Aleja̰drə gə Rupusje lé ḭ ndɔ si dəs ndá d’wá d’ɔsee ɓɔḭ-ɓɔḭ d’aree un kag-dəs lə Jeju . 22Deḛ ndɔr Jeju d’aw səa dəb loo gə́ kára bèe gə́ ria lə Gɔlgota, tel ta koji sí ndá pana: Loo-ka-dɔ-dəw. 23Deḛ d’un mán-nduú podé gə ubu timbá d’aree gə mba karee ai nɛ yeḛ mbad saar. 24Deḛ ɗaree mba̰ ndá deḛ kai na̰ kubuje ləa d’ɔs ne mbarè gə mba koo see na̰ ɓa a kwa maree wa . 25Loo gə́ deḛ ɗaree lé to kàr jinaikara gə́ gə ndɔ ŋga. 26Deḛ ndaŋg maktub loo gə́ dəa’g tar pa ne ta gə́ d’ila dəa’g lé pana: Mbai lə Jibje! 27Deḛ ɗar gayim-ɓogoje joo na̰’d səa tɔ, kára dɔ jikɔlee’g ləm, kára dɔ jigelee’g ləm tɔ. 28Togə́bè ɓa ta gə́ to mee maktub gə́ to gə kəmee lé aw ne lée’g béréré ya mbata yee pana: Deḛ d’orè na̰’d més gə njéramajelje .
29Deḛ gə́ d’isi dəs gə rəw tar lé tajee ləm, gə tuga dɔ dee jəgm-jəgm ləm tɔ, deḛ pana: Wah! i ə nà a tuji kəi-Ala ndá ndɔ munda ba ya a tel karee to lée’g gogo wa lé 30wa rɔi kaar kag-dəs’g ɔr, aji rɔi ar sí j’oo səi nà.
31Mbai dɔ njékinjanéməsje-je gə njéndaji-maktubje kogo mbuna na̰’d d’ula ne sul dəa’g pana: Yeḛ aji njé gə́ raŋg ŋga see yeḛ askəm kaji darəa-yeḛ gə dɔrea el wa. 32Maji kar Kristi, mbai lə Israɛlje lé wa rəa kaar kag-dəs’g ɔr ti uru naŋg ɓasinè ɓa ɓó gə ar sí j’ɔm ne meḛ sí dəa’g ɓəi tɔ.
Deḛ gə́ ɗar dee səa na̰’d lé deḛ tajee tɔ.
Kwəi lə Jeju lé
Mat 27.45-56, Lug 23.44-49, Ja̰ 19.28-30
33Loo gə́ kàr aar daŋdɔ ya ɓəi ndá loondul dəb dɔ naŋg nee rigim saar ar kàr tel ra gə mbɔree. 34Kàr tel rəa gə́ mbɔree lé Jeju no̰ gə ndia gə́ boi wəl pana: Eloi, Eloi, lama sabaktani, tel ta koji sí pana: Ala ləm, Ala ləm, see ban ɓa i ubam ya̰’m wa .
35Njé gə́ na̰je gə́ d’aar keneŋ lé loo gə́ deḛ d’oo ndá deḛ pana: Aa ooje, yeḛ lé ɓar Eli.
36Dəw kára mbuna dee’g aḭ mbad aw un ɓo̰gɓar ən dan mán-nduú gə́ mas’g, ula ta kag-kɔbə’g, wa woree təa’g gə mba karee njibi, ɔd ula dee pana: Ya̰je ɓoŋ ar sí j’ooje, see Eli lé a ree kɔree kilá tar wa .
37Nɛ Jeju no̰ gə ndia gə́ boi wəl ndá təa udu na̰ rub.
38Yen ŋga kubu gə́ boi gə́ gaŋg ne mee kəi-Ala dana lé un tar til njal ur naŋg jig . 39Ɓé-njérɔje gə́ aar wɔji dɔ Jeju njoroŋ lé loo gə́ yeḛ oo to gə́ təa udu na̰ rub lé ndá yeḛ pana: Tɔgərɔ ya, dəw neelé to Ŋgon-Ala lé ya.
40Denéje gə́ na̰je kara d’aar ŋgərəŋ d’aar d’aa loo gə́ keneŋ sɔmɔmo̰ tɔ. Mari gə́ Magdala ləm, gə Mari, ko̰ Jak gə́ ndɔḭ gə Joses ləma, gə Salome ləm tɔ lé d’aar mbuna dené mar deeje’g neelé tɔ. 41Deḛje neelé to gə́ njékun gée ra né kareeje loo gə́ yeḛ nai ne Galile ləm, njé gə́ raŋg bula d’aw səa na̰’d Jerusalem ləm tɔ .
Deḛ dubu nin Jeju lé
Mat 27.57-61, Lug 23.50-56, Ja̰ 19.38-42
42Loo gə́ kàr uru naŋg jig mba̰ ndá a to ndɔ gɔl dɔ néra naḭ ndɔ-kwa-rɔ lé. 43Yen ŋga Jisəb gə́ Arimate, yeḛ to barkəm ŋgatɔgje lə deḛ gə́ ur dɔ mareeje’g ləm, yeḛ to gə́ njengina ɓeeko̰ lə Ala lé ya ləm tɔ. Jisəb lé ndəd rəa el nɛ yeḛ ḭ aw rɔ Pilatə’g aw dəjee nin Jeju. 44Kaar Pilatə wá paḭ loo gə́ yeḛ oo to gə́ Jeju wəi yal mba̰ ndá yeḛ ɓar ɓé-njérɔje dəjee mba koo see Jeju lé wəi kuree əw ya ŋga wa. 45Loo gə́ ɓé-njérɔje ulá to gə́ yeḛ wəi tɔgərɔ ndá yeḛ un ndia mba kar dee d’ar Jisəb nin lé tɔ. 46Jisəb lé ɔr nin Jeju kaar kag’d kəee gə kubu-dubu-yoo gə́ ndogo lé ɓa unee ulá mee bolè mbal gə́ deḛ sɔi kaar mbal’g lé. Tɔɓəi yeḛ nduburu biri mbal udu ne ta bwa lé tɔ. 47Mari gə́ Magdala ləm, gə Mari gə́ ko̰ Joses ləm tɔ lé deḛ d’aa loo d’oo loo gə́ deḛ dubee keneŋ lé gao tɔ.
Currently Selected:
Mark 15: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.