1 Njé gə́ Kɔrḭtə 16
16
Rəw kun ta néje lə sí kunda gə kəmee lé
1Ta gə́ wɔji dɔ nénoji gə́ seḭ mbo̰je mbata njémeendaje lé maji kar sí-seḭ kara raje gə goo rəbee gə́ ma m’tɔji Eglisəje gə́ dəb ɓeeko̰ gə́ Galati tɔ . 2Ndɔ gə́ dɔtar mee ndɔje gə́ siri-siri lé maji kar nana kara un ta né ləa unda gə kəmee-kəmee gə goo nékiŋgaje gə́ yeḛ iŋga ya, ɓó ŋginaje ndɔ ree ləm ɓa gə mba mbo̰je nékiŋga sí ɓəi el. 3Loo gə́ m’a teḛ mba̰ ndá m’a kiŋga dəwje gə́ seḭ ɔr deeje lé m’a kula dee gə maktub ji dee’g mba kar dee d’odo nénojije lə sí lé d’aw ne Jerusalem. 4Ɓó lé to kəm karm-ma nja m’aw gə rɔm ndá deḛ nja kara d’a danm kaw səm na̰’d tɔ.
5Loo gə́ m’a kunda mee ɓee gə́ Masedoinə gaŋ mba̰ ɓa m’a kaw rɔ sí’g ɓəi, mbata m’a gə kunda loo dəs mee dəb ɓeeko̰ gə́ Masedoinə ya . 6Banelə m’a sí sə sí waga əsé m’a ra sə sí ɓee gə naḭ kul mba kar loo gə́ m’a gə kḭ kaw lé seḭ a danmje kawje səm na̰’d ɓəi. 7Ndəa neelé ma m’ndigi koo sí gə́ koo ɓa dəs kaw ɓəi lé el. Nɛ ɓó lé Mbaidɔmbaije ndigi ndá m’unda məəm yel gə mba si sə sí waga nja ɓəi ya.
8Lé riri kara m’a nai Epesə saar teḛ ndɔ Pa̰dekɔt ya , 9mbata rəw to tag bərəŋ mba karm m’aw m’ra kula keneŋ ya, njéba̰je kara taa loo keneŋ pəl-pəl.
10Ɓó lé Timote aw teḛ rɔ sí’g gə mba koo sí ndá wáje mbá bur-bur mba karee si sə sí gə kaar gəd el, mbata yeḛ nja kara ra kula lə Mbaidɔmbaije to gə́ ma bèe ya tɔ . 11Maji kar dəw kára kara ə̰jee bəḭ-bəḭ el, daneeje gə meekulɔm gə mba karee tel ree iŋgam mbata m’isi m’ŋginá ləm, ŋgako̰ síje gə́ raŋg kara d’isi ŋginá ya ləm tɔ.
12Ta gə́ wɔji dɔ ŋgoko̰ sí gə́ Apolɔs lé ma m’ɔsee ɓɔḭ-ɓɔḭ mba karee aw gə ŋgako̰ síjeḛ rɔ sí’g, nɛ yeḛ ndigi kaw ɓasinè el ɓəi. Ndɔ gə́ yeḛ iŋga loo kaw ndá a kaw gə mba koo sí ya.
13Sije kəmba arje kəm sí ɔs loo pal-pal ləm, aarje dɔ meekun’g lə sí njaŋg ləm, waje rɔ gə́ diŋgam ləma, aarje kɔgərɔ ləm tɔ. 14Né gə́ rara ɓa gə́ seḭ raje kara raje gə meenoji ya.
15Ŋgakɔmje, ma m’ndigi ndəji sí bər-bər dɔ ta gə́ raŋg’d ya tɔɓəi. Seḭ gərje gao kojikəije lə Stepanas lé deḛ nja to kó njétaamee-Kristije gə́ Akai gə́ d’ula goŋ dee kula’g mbata lə deḛ gə́ to gə kəmee lé . 16Dəwje gə́ ra togə́bè lé maji kila koji dɔ dee’g ləm, gə dɔ deḛ lai gə́ to njéboakulaje lə dee kara ləm tɔ.
17Ree lə Stepanas gə Pɔrtunatus gə Akaikus gə́ ree rɔm’g lé ar rɔm lelm yaa̰, deḛ nja nai tor sí’g loo gə́ seḭ reeje el lé, 18mbata deḛ nja d’ar ndiləm wa girm ləm, gə ka̰ sí-seḭ ləm tɔ. Maji koo dəwje gə́ togə́bè lé gə́ kankəm dəwje ya.
19Eglisəje gə́ Asi ra sí lapia ləm, Akilas gə Prisil gə Eglisə gə́ d’wa dɔ na̰ kəi lə dee lé ra sí lapia yaa̰ gə ri Mbaidɔmbaije ləm tɔ . 20Njétaamee-Kristije lai ra sí lapia.
Waje na̰ kaar na̰’g sud tɔnje ne ɓɔl na̰ gə meenda.
21Ma Pool m’ra sí lapia gə jim-ma ya tɔ.
22Nana ɓa gə́ ndigi Mbaidɔmbaije gə meekɔr jol-jol el ndá maji kar ndɔl nai dəa’g ya.
Mbaidɔmbaije si ree!
23Maji kar sí síje dan noji’g lə Mbaidɔmbaije Jeju Kristi!
24Seḭ lai gə́ ɔmje na̰’d gə Jeju Kristi lé m’unda sí dan kəm’g ya. Bèe ya!
Currently Selected:
1 Njé gə́ Kɔrḭtə 16: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.