1 Njé gə́ Kɔrḭtə 15
15
Teḛ dɔkumbwa’g lə Jeju Kristi lé
1Ŋgakɔmje, Tagə́maji gə́ ma m’ula sí gə́ seḭ taaje gə meḛ sí ləm, gə seḭ naije keneŋ njaŋg ləm tɔ lé yee ɓa ma m’teg meḛ sí dɔ’g ya. 2Ɓó lé seḭ undaje meḛ sí dɔ taree’g bururu to gə́ ma m’ndoo sí lé ndá mbɔl dəa ɓa seḭ a kajije ne ya. Ɓó lé bèe el ndá meekun lə sí a to né gə́ gə mḭdé ba ya.
3Aa ooje, ta gə́ ma m’ndoo sí lé m’aree ur dɔ taje’g lai, ma nja kara m’taa gə məəm tɔ. Taree ɓa to nee: Kristi lé wəi mbata kaiya lə sí gə goo ta gə́ mee maktub gə́ to gə kəmee pa ləm , 4deḛ dubee nɛ ndəa munda ndá yeḛ unda loo teḛ mbuna njé gə́ d’wəi’g gə goo ta gə́ mee maktub’g lé ləma , 5yeḛ teḛ kəm Képas kédé, ɓa teḛ kəm deḛ gə́ dɔg-gir-dee-joo’g lé kara ləm tɔ . 6Ndɔ gə́ raŋg yeḛ teḛ kəm njétaamee-Kristije gə́ d’as tɔl-mi gə́ d’wa dɔ na̰ loo kára tɔ, deḛ gə́ d’ée neelé kudu dee gə́ kára ɓa d’wəi nɛ ndər dee nai gə kəmə lə dee bura ɓəi. 7Ndɔ gə́ raŋg yeḛ teḛ kəm Jak ləm, yeḛ teḛ kəm njékaḭkulaje lai kara ləm tɔ.
8Ma gə́ m’to asəna gə ŋgon gə́ d’ɔree gə́ kɔr gə́ m’to gə́ rudu dee lé kara yeḛ teḛ kəm tɔ . 9Ma lé m’to rudu njékaḭkulaje gə́ ma m’as kar dee ɓarm njekaḭkula el mbata ma m’ula kəm Eglisə lə Ala ndòo boi . 10Nɛ noji lə Ala ɓa m’to ne dəw gə́ togə́bè, noji gə́ yeḛ wa səm lé tel to né gə́ gə mḭdé rɔm’g el. Ta gə́ kɔl ɓa nee: Ma m’ra kula m’unda deḛ lai ya, nɛ noji lə Ala gə́ to məəm’g ɓó to ma ɓa gə dɔrɔm el. 11Bèe ndá lé ma əsé deḛ kara taree ɓa jeḛ j’ila ne mberee ləm, taree lé seḭ nja kara seḭ ɔmje ne meḛ sí dɔ’g ya ləm tɔ.
Ta teḛ dɔkumbwa’g lə síjeḛje lé
12Ɓó lé deḛ d’ila mber pana: Kristi teḛ mbuna njé gə́ d’wəi’g ndá ŋga, see ban ɓa njé gə́ na̰je mbuna sí’g pana: Njé gə́ d’wəi lé d’a teḛ dɔkumbwa’g nda̰ el wa. 13Ɓó lé dəwje gə́ d’wəi lé d’a teḛ dɔkumbwa’g el ndá Kristi kara teḛ dɔkumbwa’g el tɔ. 14Ɓó lé Kristi teḛ dɔkumbwa’g el ndá mber kila lə sí lé to né gə́ gə mḭdé ba ləm, meekun lə sí kara to ne né gə́ gə mḭdé ba ləm tɔ. 15Ɓó lé to tɔgərɔ to gə́ nje gə́ d’wəi lé d’a kunda loo teḛ el ndá jeḛ n’toje gə́ njétədta kunda ta Ala’gje, mbata jeḛ m’pana: Ala lé ar Kristi teḛ dan njé gə́ d’wəi’g. 16Mbata ɓó lé njé gə́ d’wəi lé teḛ el ndá Kristi kara unda loo teḛ el tɔ. 17Ɓó lé Kristi teḛ el ndá meekun lə sí to gə́ mḭdé ba ləm, seḭje naije dan kaiya’g lə sí ɓəi ləm tɔ. 18Tɔɓəi deḛ gə́ d’wəi gin Kristi’g lé kara deḛ d’udu guduru mba̰ tɔ. 19Ɓó lé loo gə́ j’isi gə kəmə dɔ naŋg nee goo kára ba ɓa jeḛ j’unda meḛ sí yel dɔ Kristi’g ndá kəm sí wa kor kor-kor unda dəwje gə́ raŋg lai.
20Nɛ ɓasinè lé Kristi teḛ mbuna njé gə́ d’wəi’g ya, yeḛ to ne dəw gə́ doŋgɔr lə deḛ gə́ d’wəi. 21Mbata to gə́ néra dəw gə́ kára ba ya, yoo o̰ ne ɓee dɔ naŋg nee ndá togə́bè ɓa néra dəw gə́ kára ba ya dəwje d’a teḛ ne dɔkumbwa’g tɔ. 22To gə́ dəwje lai d’wəi gin Adam’g lé deḛ lai gə́ d’ɔm na̰’d gə Kristi lé d’a tel si gə kəmə lé tɔ. 23Kristi to gə́ doŋgɔr lə dee, nɛ deḛ gə́ to ka̰ Kristi mee ndəa gə́ yeḛ a gə ree lé d’a teḛ korè goo na̰ goo na̰ tɔ. 24Yen ɓa rudu ndəa a kun ɗiao loo gə́ yeḛ a tuji mo̰ɓeeje lai ləm, gə njédɔmoŋgje lai ləma, gə njésiŋgamoŋje gə́ rara kara ləm tɔ ndá yeḛ a rəm gə ɓeeko̰ lé kɔm ji Ala gə́ to Bɔ-dəwje’g. 25Mbata lé riri kara yeḛ a to mbai dɔ dəwje lai-lai saar yeḛ a dum ne dɔ njéba̰je’g ləa lai kuba dee ne gin gɔlee’g més ya . 26Njeba̰ gə́ yeḛ a tuji gə́ rudu dee lé ɓa to yoo. 27Tɔgərɔ ya, Ala ɔm néje lai gin gɔl Kristi’g. Nɛ loo gə́ yeḛ pana: Neḛ n’ɔm néje lai gin gɔlee’g ndá yeḛ gə́ njekɔm néje lai gin gɔlee’g lé ɓa nai, yee ɓa to ta gə́ to raga təsərə ya . 28Tɔɓəi loo gə́ yeḛ ɔm néje lai gin gɔlee’g ndá yen ŋga Ŋgon lé kara a koso kul no̰ yeḛ gə́ njekɔm néje lai gin gɔlee’g lé ɓó gə mba kar Ala a to ne dəw dɔ dee lai-lai ya.
29Ɓó lé to togə́bè el ndá see deḛ gə́ ra dee batɛm gə mba mar deeje gə́ d’wəi lé see gel né gə́ deḛ ra lé to to gə́ banwa. Ɓó lé njé gə́ d’wəi lé d’a kunda loo teḛ el ndá see ban ɓəi ɓa deḛ ra dee batɛm gə mbata lə dee ɓəi wa. 30Jeḛ kara see ban ɓa j’isi ta yoo’g ta-ta ɓəi wa. 31Tɔgərɔ ya, ŋgakɔmje, gə ndɔje kára-kára lai m’isi ta yoo’g ya, yee ɓa m’ula sí ne taree m’ti ne rɔm dɔ sí’g gin Jeju Kristi Mbaidɔmbaije’g lə sí lé tɔ. 32Ɓó lé m’rɔ gə da-ŋgaŋkasje gə́ Epesə to gə́ dəwje gə́ dɔ naŋg nee rɔ lé ndá see ɗi ɓa m’a kiŋga keneŋ wa. Ɓó lé njé gə́ d’wəi lé d’a gə kunda loo teḛ el
Ndá ar sí j’usɔje gə j’aije
Mbata bèlè ndá j’a gə kwəije .
33Ǝrje rɔ sí el: kɔr kura gə dəwje gə́ majel lé ɓa néra sí gə́ maji a tuji ne ya. 34Gə́ telje sije kəmba dɔ néra gə́ gə dɔ najee ɓó əwje kaiya lə sí, yee ɓa gə́ né gə́ kəm ra, mbata njé gə́ na̰je gər ndaa Ala el, yee ɓa m’pa m’ila ne rɔkul dɔ sí’g ya.
35Nɛ dəw kára a dəji pana: See njé gə́ d’wəi lé d’a kunda loo teḛ dɔkumbwa’g to gə́ banwa. See rɔ dee neelé a to né gə́ banwa. 36Mbə, né gə́ i dubu lé lé toree wəi el ndá kankəmrea a teḛ el tɔ. 37Guburu né gə́ i dubu lé to gə́ kandə kó əsé kandə né gə́ raŋg kara to gə́ ŋgerəŋ ba ɓó to gə́ kankəmee el. 38Ala ɓa gə́ njekaree kubururea to gə́ mée wɔji ya, kandə néje gə́ gə ria-ria lé yeḛ nja ɓa gə́ njekar dee kubururɔ dee gə́ wɔji dɔ dee dɔ dee tɔ.
39Darɔ néje asəna lai el, darɔ dəwje to gə kəmee ləm, ka̰ daje to gə kəmee ləm, ka̰ yelje to gə kəmee ləma, ka̰ ka̰jije kara to gə kəmee ləm tɔ.
40Dara kara mban rəa to gən ləm, ka̰ naŋg kara to gən ləm tɔ. Rɔndɔḭ lə néje gə́ dara to gə kəmee ləm, rɔndɔḭ lə néje gə́ naŋg nee kara to gə kəmee ləm tɔ. 41Rɔndɔḭ lə kàr to ɓəd ləm, rɔndɔḭ lə naḭ to ɓəd ləma, rɔndɔḭ lə kéréméje kara to ɓəd ləm tɔ. Kéréméje lé rɔndɔḭ lə dee to ɓəd-ɓəd ɓó d’asəna lai el tɔ.
42To kára ba asəna gə deḛ gə́ d’a gə teḛ dan njé gə́ d’wəi’g, darɔ dee gə́ dubu lé to né gə́ a gə kunda naŋg ndəs, nɛ teḛ gə́ d’a gə d’a kunda loo teḛ lé d’a teḛ gə rɔ dee gə́ a gə kunda naŋg ndəs el ŋga. 43Darɔ dəw gə́ dubu lé deḛ d’oo gə́ né gə́ to kḛji nɛ loo gə́ yeḛ teḛ ndá yeḛ a kunda loo teḛ gə rəa gə́ nduba raŋg-raŋg. Deḛ dubee gə́ né gə́ a gə ndusu bur-bur, nɛ yeḛ a kunda loo teḛ gə rəa gə́ a moŋg kaŋ-kaŋ. 44Dakasrɔ dəw ɓa deḛ dubu, nɛ yeḛ a kunda loo teḛ gə kankəmrea gə́ ka̰ ndil lé. Ɓó lé dakasrɔ dəw to keneŋ ndá kankəmrɔ dəw gə́ ka̰ ndil to keneŋ gən ya tɔ. 45Gelee gə́ nee ɓa deḛ ndaŋg mee maktub’g pana: Adam, dəw gə́ doŋgɔr lé tel to dəw gə́ si kəmba. Adam gə́ rudu lé tel to ndil gə́ njekula kəmə meḛ dəwje’g . 46Ka̰kəmrɔ dəw gə́ ka̰ ndil to gə́ dɔtar el nɛ dakasrɔ dəw to kédé ɓa ka̰ ndil orè gée ɓəi. 47Dəw gə́ dɔtar lé d’ɔree naŋg nee ya, yee ɓa yeḛ to ne dəw gə́ dɔ naŋg nee ya: nɛ dəw gə́ rudu lé ḭ dara ɓa. 48To gə́ dəw lé to gə́ naŋg ndá njé gə́ naŋg neelé kara to gə́ naŋg nee to gə́ yeḛ nja bèe tɔ. To gə́ yeḛ gə́ dara to gə́ dara lé ndá njé gə́ dara kara to gə́ dara to gə́ yeḛ nja bèe tɔ. 49To gə́ kédé lé jeḛ kara j’unda rɔ dəw gə́ naŋg neelé ndá j’a kunda rɔ dəw gə́ dara lé nja togə́bè ya tɔ.
50Ŋgakɔmje, ta gə́ m’pa lé ɓa to nee: Dakasrɔ gə məs lé d’askəm kisi ɓeeko̰’g lə Ala el ləm, né gə́ a gə yɔlé gə né gə́ a gə yɔlé el lé d’a korè na̰ el ləm tɔ.
51Aa ooje, ma m’ria sə sí dɔ né gə́ to loo-kiya’g gə́ raga: j’a kwəi lai el, nɛ j’a kun rɔ sí gə́ ləw mbél ne yeḛ gə́ sigi 52léegəneeya to gə́ kəm gə́ tuga jib bèe ndɔ gə́ to̰to̰ gə́ rudu a ɓar lé. Mbata to̰to̰ a ɓar ya ndá njé gə́ d’wəi lé d’a kunda loo teḛ gə rɔ dee gə́ a gə yɔlé el ŋga ndá jeḛ kara j’a kun rɔ sí gə́ ləw mbél ne nje gə́ sigi tɔ. 53Mbata lé riri kara rɔ sí gə́ yɔlé lé a kun yeḛ gə́ a gə yɔlé el kula rəa’g yul ləm, rɔ sí gə́ ka̰ naŋg neelé a kun yeḛ gə́ a gə kwəi el kula rəa’g yul ləm tɔ. 54Loo gə́ rɔ sí gə́ yɔlé a kun yeḛ gə́ a gə yɔlé el kula rəa’g ləm, rɔ sí gə́ ka̰ naŋg nee a kun yeḛ gə́ a kwəi el kula rəa’g ləm tɔ ndá ta gə́ to mee maktub gə́ to gə kəmee neelé a kaw lée’g béréré ya:
Siŋgamoŋ tur dɔ yoo pubug mba̰ .
55Wah! yoo, see loo kun baŋga ləi to ra wa.
Wah! yoo, see nékadje ləi to ra wa .
56Nékad lə yoo lé yee ɓa to kaiya, siŋgamoŋ lə kaiya lé yee ɓa to gə́ godndu tɔ. 57Nɛ Ala lé gə́ njekar sí j’un baŋga gə ri Mbaidɔmbaije lə sí Jeju Kristi lé maji kar dɔ ria ai səgərə ya.
58Togə́bè ɓa, ŋgakɔmje gə́ m’unda sí dan kəm’g lé aarje kenḛg njaŋg ɓó ləŋje el. Raje kula lə Mbaidɔmbaije gə ŋgaŋgee béréré-béréré mbata seḭ gərje gao, kula gə́ seḭ raje ulaje rɔ sí ndubu keneŋ arje Mbaidɔmbaije lé a tel to né gə́ gə mḭdé el.
Currently Selected:
1 Njé gə́ Kɔrḭtə 15: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.