Efesios 5
5
Chojbina jusuc' jela' pacha' ri takal chike ri oj ralc'o'al ri Dios
1Ruma c'u alak ralc'o'al ri Dios y Rire c'ax cuna' alak, lic chirajawaxic 'ana alak jela' pacha' cu'an Rire. 2Ronoje c'u ri ca'an alak, 'ana alak ruc' rutzil c'u'xaj, jela' pacha' ri rutzil uc'u'x ri Cristo uc'utum chikawach. Ma Rire lic c'ax xojuna'o y xuya rib pa camic pakac'axel re tojbal ri kamac. Ri xu'ano e pacha' jun kasa'n lic qui' ruxlab chwach ri Dios.
3Ralak ri alak chi re ri Dios, lic na ube ta q'uenok we chixo'libal alak c'a c'o ri caretz'abej uwa uk'ij ruc' junok na uc'ulel taj o cu'an tak ch'ulilaj mac o na caqui'cot ta ruc' tak ri c'o ruc' ma xaki curayij más. 4Mach'a'tibej ne alak ch'a'tem q'uixbal uwach, ch'a'tem na jinta cutikoj, ch'a'tem na chom ta q'uenok tob ne tze'bal uwach. Ma ronoje wa' lic na takal ta che ralak. Ri 'ana alak e tioxin alak chwach ri Dios ruc' ri ch'a'tem alak. 5Ma lic eta'am chi alak wa': Ri caretz'abej uwa uk'ij ruc' junok na uc'ulel taj, ri cu'an tak ch'ulilal mac, ri na caqui'cot ta ruc' tak ri c'o ruc' ma xaki curayij más, ri ca'anaw wa' e pacha' juna aj tiox ma e cu'an “udios” che janipa ri curayij; conoje c'u ri caqui'an tak wa', na caquic'ul ta ri bi'tisim lo chique ri quiya'om quib puk'ab ri Cristo y e c'o chupa rutakanic ri Dios. 6Masocotaj alak cuma ri caquimin alak chupa ri mac ruc' ch'a'tem lic chacojo' katzij pero xa rak'ubal. Ma ri k'atbal tzij re ri Dios cape paquiwi ri e aj palajiy tzij, wa' e ri caqui'an tak wa' wa mac.
7Ma'an c'u e alak cuc' tak wa winak caqui'an ri na utz taj. 8Ma ralak ojertan sachinak alak chupa ri k'eku'm, no'j wo'ora c'o chi alak pa ri K'ijsak ruma ri Cristo. Bina c'u alak pa ri K'ijsak jela' pacha' ri takal che alak. 9Ma e junok c'o pa ri K'ijsak, ri' che rubinic usilabic quilitaj wi ri relej uc'u'x, lic jusuc' ri cu'ano y lic katzij ronoje ri cubi'ij. 10E lic ch'obo alak sa' ri cuc'ul uc'u'x ri Kakaw y e 'ana c'u alak ri'. 11Ma'an e alak pacha' ri caqui'an ri e c'o pa k'eku'm, ma ri caqui'an rique na jinta c'ana uchac. Ri 'ana alak e k'alajisaj alak chique ri na utz taj caqui'ano cha' na caqui'an ta chic, 12tob ne lic q'uixbal ubi'xiquil ri caqui'an rique xa xe'lak'ay. 13Yey echiri' quel chi sak ri ca'anic, cak'alajin c'u ri' we utz o na utz taj, ma ronoje quilitaj chi utz ruma ri K'ijsak. 14E pacha' ri cabi'xic:
E ri'at ri catwaric, ¡c'una c'u sak chawach!
Chatwa'lij lo chiquixo'l ri ecaminak pa mac,
y ri Cristo catuya pa ri K'ijsak.#Is. 60:1-2
15Lic chajij c'u ib alak che ri binic silabic alak. Ma'an e alak pacha' ri caqui'an ri na jinta quina'oj; e lic ch'obo alak ruc' sakil na'oj sa' tak ri ca'an alak. 16Lic ya'a ib alak che u'anic tak ri utz, ma wak'ij ora lic catajin uq'uiyaric ri mac che ruwachulew. 17Ma'an c'u alak ri na cach'ob ta alak chi utz ri ca'an alak; e lic c'ola na'oj alak puwi sa' ri caraj ri Kanimajawal che alak. 18Maya ib alak che k'abaric, ma wa' xa cuyojij rubinic junok. E ya'a ib alak puk'ab ri Ruxlabixel ri Dios cha' e Rire catakan pa anima' alak. 19Ma we c'o ri Ruxlabixel ri Dios kuc', jewa' caka'ano: Cakanimarisaj kac'u'x chikawach ruc' tak salmos, ruc' tak bix tz'ibital canok y ruc' c'ac' bixobal ya'om chike ruma ri Ruxlabixel ri Dios. Cakayac c'u uk'ij ri Kakaw ruc' bix calax lo pa kanima'. 20Yey xaki cojtioxin chwach ri Kakaw Dios ruma ronoje, y caka'an c'u wa' chupa rubi' ri Kanimajawal Jesucristo.
Pixabanic chique ri e c'ulanic
21Nimaj ib alak chiwach alak ruc' xi'in ib chwa ri Cristo, ma e caraj ri' Rire chike. 22E uwari'che, rixok c'ulanic takal che cutakej ri rachijil jela' pacha' ri lic takal che cutakej ri Cristo. 23Ma rachi e c'amal uwach ri rixokil jela' pacha' ri Cristo e c'amal uwach riglesia y na xew tane c'amal uwach ma e Colobenel re. Jec'ula' ri Cristo e ujolom riglesia yey riglesia e ucuerpo Rire. 24Jec'ula' pacha' riglesia c'o puk'ab ri Cristo, jela' chu'ana rixok ruc' ri rachijil; che ronoje tak ri cu'ano, e lic chutakej ri rachijil.
25Ec'u rachi c'ulanic takal che c'ax cuna' ri rixokil jela' pacha' ri Cristo lic c'ax xojuna' ri oj u iglesia y xuya rib pa camic pakac'axel. 26Xu'an c'u wa' cha' e cu'an chom y jusuc' che ri kabinic. Xresaj c'u ri kamac ruma Ruch'a'tem; ri xu'ano e pacha' ca'an che ri ch'ul echiri' cach'aj ruc' ya'. 27Xu'an c'u wa' cha' echiri' ri'oj oj u iglesia cojopon chwach, oj jun chomilaj iglesia lic jusuc' y na jinta c'ana mac carikitaj che. 28Jec'ula' lic chirajawaxic che rachi e cuc'ut ri rutzil uc'u'x che ri rixokil. Jela' pacha' junok lic cuchajij rucuerpo, jec'uri'la' takal che rachi cuchajij ri rixokil. Ma we juna achi c'ax cuna' ri rixokil, e que'elawi c'ax cuna' rib, ma rachi ruc' rixok, xa jun qui'anom. 29Na jinta junok tzel caril rucuerpo; ri cu'ano e cawa' chi utz y lic cuchajij chi utz. Jela' ri cu'an ri Cristo che riglesia, lic cuchajij chi utz. 30Cu'an wa' chike ma ri'oj oj ucuerpo.#Gn. 2:23 31Jec'uwa' ri cubi'ij Ruch'a'tem ri Dios:
Ruma c'u ri', rachi echiri' cac'uli'ic,
caresaj rib chiquij ruchu-ukaw
cha' cajeki' ruc' ri rixokil
y quicabichal c'u ri' quebu'ana xa e jun chwach ri Dios Gn. 2:24
cacha'. 32Lic naj cumaj wa' wa c'utubal k'alajisam chike; pero cambi'ij c'u ri'in, wa' e jun c'ambal na'oj puwi ri Cristo ruc' riglesia. 33Yey e ne jun pixabanic che onoje alak ri alak c'ulanic. Rachi lic c'ax chuna'a ri rixokil jela' pacha' c'ax cuna' rib rire, yey ec'u rixok e lic chutakej ri rachijil.
Currently Selected:
Efesios 5: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.