Efesios 4
4
Xa jun ka'anom chwach ri Cristo tob junwi tak ri kachac
1Ri'in in c'o pa cárcel xa ruma ruchac ri Cristo; lic cantz'onoj c'u che alak bina alak jusuc' jela' pacha' ri takal che alak ma alak siq'uim ruma ri Dios. 2Ma'an c'u nim che ib alak; e chu'ana ri lic utz c'u'x alak chiwach alak. Cuyu c'u ib alak chiwach alak ruc' unimal c'u'xaj ruma ri c'ax cana' ib alak. 3Ri Ruxlabixel ri Dios xu'an xa jun che alak y xucoj utzil chomal chiwach alak; maya c'u alak luwar cajach pa alak. 4Chwach ri Dios xa oj jun ma oj ucuerpo ri Cristo, xa jun ri Ruxlabixel ri Dios kac'ulum y xa jun oj u'anom che roy'exic ri utz xubi'tisij ri Dios chike echiri' xojusiq'uij. 5Xa jun ri Kanimajawal, na jinta jun chic; xa jun ri Utzilaj Tzij kacojom y xa jun ri bautismo kac'ulum. 6Xa jun ri Dios c'olic; Rire e Kakaw ri c'o pakawi' konoje ri'oj, cu'an ruchac kuma konoje ri'oj y c'o pa kanima' konoje ri'oj. 7Yey chikajujunal c'o ri usipam ri Cristo chike e chirij ri relej uc'u'x Rire. 8E pacha' ri tz'ibital can chupa Ruch'a'tem ri Dios pa cubi'ij wi:
Echiri' xe'ec chila' chicaj,
xebuc'am bi ri xec'oji' puk'ab
yey xuya chomilaj tak sipanic
chique ri ticawex. Sal. 68:18
9Echiri' cubi'ij «xe'ec chila' chicaj», wa' que'elawi xtzelej chila' chicaj, ma nabe xpe chila' y xc'un wara che ruwachulew. 10Ec'u ri Cristo, ri xc'unic, e Rire mismo ri xtzelej chila' chicaj cha' jela' catakan paquiwi conoje y jela' ronoje tak ri c'olic cac'oji' puk'ab Rire.
11Yey e ri Cristo ri cojoyom tak que raj chaquib chiquiwach rutinamit. E c'o jujun xu'an chique e utako'n; jujun chic xu'an chique ek'alajisay runa'oj ri Dios. Jujun chic xu'an chique e aj tzijol re ri Utzilaj Tzij. Jujun chic xu'an chique e aj chajal rutinamit ri Dios y chique jujun chic xu'an chique e c'utunel re Rutzij ri Dios. 12E tak wa e aj chac ecojom re quequitijoj rutinamit ri Dios cha' caqui'an ruchac Rire y jec'ula' ri quicojom rubi' ri Cristo queq'uiy chi utz. 13Ma ri caraj ri Kakaw chike e coju'an xa jun ruma ri cubulibal kac'u'x ruc' Ruc'ajol y ruma ri caketa'maj uwach chi utz. Ec'u ri kabinic chwach ri Dios lic cacowiric, cu'ana jela' pacha' ri chomilaj ubinic ri Cristo. 14Jec'ula' na caka'an ta chi ke'oj cuc' ri na jinta quiq'uiyibal chwach ri Dios, ri xa caquetz'abej quina'oj puwi ri quicojom yey quetzak paquik'ab ri e aj socoso'nel, ri caquic'ut tak ri na e taj y ruc' itzel tak na'oj quequic'am bi pa sachibal ri na e tiquil ta chi utz. 15Pero ri chirajawaxic wi chike e cojtiqui' chi utz chupa ri K'ijsak y cakatzijoj c'u wa' ruc' rutzil kac'u'x. Jec'ula' cojq'uiy pa sakil wi cha' ruc' ronoje ri caka'ano coju'ana pacha' ri Jun Aj C'amal Kawach, wa' e ri Cristo.
16Ec'u ri Cristo caya'w ri kaq'uiyibal echiri' chikajujunal caka'an ri chac uya'om Rire pakak'ab y cakato' kib ruc' rutzil kac'u'x. Ma oj u'anom xa jun ruc' Rire; e pacha' ri kacuerpo, lic q'ui tak ri chapayom re, pero wa' xa jun u'anom.
Kaya'a can ri kabinic kasilabic re ojer
17Campixabaj c'u alak chupa rubi' ri Kanimajawal: Ma'an chi e alak pacha' ri caqui'an ri na queta'am ta uwach ri Dios, ma ri quina'oj rique c'o puwi ri xa na jinta uchac. 18Rique e c'o pa k'eku'm ma na cacaj ta caquimaj usuc' ri K'ijsak. Ruma c'u lic qui'anom co che ri canima', na jinta c'o queta'am puwi ri Dios y lic naj e c'o wi che ri chomilaj c'aslemal cuya Rire. 19Wa' wa winak kabi que che caqui'an ri q'uixbal uwach; xquiya c'u quib che tak ri rayibal re ri quiti'jil y jela' quiya'om quib che u'anic tak ri ch'ulilaj mac.
20No'j ralak na je ta la' ri c'utunic xmaj alak puwi ri Cristo, 21we pakatzij wi e xta alak rutzij y xmaj alak usuc' ri K'ijsak xuc'ut Rire. 22Ma'an chi alak pacha' ri x'an alak echiri' c'amaja' caya ib alak puk'ab ri Cristo. Ya'a c'u can ri ojer binic silabic alak pa xsocotaj wi alak ruma tak ri rayinic xa re sachibal e alak. 23Chirajawaxic c'ut c'o jun jalc'atajibal che ri na'oj alak. 24Ya'a c'u ib alak chupa ri c'ac' c'aslemal uya'om ri Dios che alak cha' jela' cabin alak chupa ri K'ijsak ruc' jun binic lic jusuc' y lic chom.
25Ma'an chi alak rak'ubal, xew ch'a'tibej alak ri lic katzij chiwach alak, ma konoje ri oj re ri Cristo, xa jun ka'anom.
26We cape oyowal alak, mamacun alak ruc' wa'; ri 'ana alak e chesaj chic'u'x alak ri oyowal xalok' c'amaja' ne catzak bi ri k'ij. 27Maya c'u alak luwar che ritzel winak cusoc alak.
28We c'o junok chixo'libal alak cu'an elek', mu'an chic. Ri chu'ana' e chacunok cha' jela' cuch'ac ri cajawax che y quebuto' ne tak ri e c'o pa c'axc'obic.
29Mabi'ij ne alak juna itzel ch'a'tem; e ch'a'tibej alak ri chomilaj tak ch'a'tem, to'bal re ri quibinic quisilabic ri quetaw re.
30Ruc' c'u ri' ri ca'an alak, maya alak pa bis ri Santowilaj Ruxlabixel ri Dios. Ma ri Ruxlabixel pa anima' alak e c'utubal re, alak chi re ri Dios y e jiquibal uwach ri colobetajic cac'ul alak chupa ruk'ijol ruc'unibal ri Cristo.
31Chesaj alak ronoje ri oyowal c'o pa anima' alak. Ma'an alak ri alak c'a'n. Masiq'uin alak ruc' oyowal. Mach'a't alak chirij junok. Chesaj c'u ib alak che ronoje ri na utz taj. 32Ri 'ana alak e c'utu alak ri rutzil c'u'xaj chiwach alak, c'ax na'a ib alak. Cuyu mac alak chiwach alak jela' pacha' xu'an ri Dios echiri' xucuy mac alak ruma ri Cristo.
Currently Selected:
Efesios 4: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.