Efesios 6
6
Pixabanic chique alc'o'al y chique quichu-quikaw
1Ix alc'o'al, ruma ix c'o puk'ab ri Kakaw, lic chicojo quitzij richu-ikaw ma lic e usuc' ri'. 2Chupa Rutzij Upixab ri Dios ri nabe tzij cu'an bi'tisinic chique ri que'anaw re, e wa':
Chalok'oj quik'ij rachu-akaw,
3cha' jela' xaki catel pan chi utz che ronoje
y canajtir rac'aslem wara che ruwachulew. Éx. 20:12
4Ec'u ralak ri c'o alc'o'al alak, mapetisaj alak coyowal ri alc'o'al alak; ri 'ana alak e cheq'uiyisaj alak ruc' sakil k'ilonic y chepixabaj alak cha' quebin chupa ri K'ijsak re ri Kanimajawal.
Pixabanic chique ri e mocom y chique ri e patrón
5Yey ralak ri alak mocom, e lic cojo alak quitzij ri patrón alak wara che ruwachulew. Chacuna c'u alak chi utz ruc' jun sakil xi'in ib pa anima' alak y ruc' ronoje c'u'x alak pacha' e canimaj alak ri Cristo ruc' ri chac alak. 6Na utz ta c'u ri' we juna mocom xew cachacun chi utz echiri' catzutzu'x ruma rupatrón cha' jela' catac'abax uk'ij. Ri 'ana alak e c'utu alak pakatzij wi alak aj chac re ri Cristo. Chacuna c'u alak ri' ruc' ronoje c'u'x alak cha' jela' ca'an alak janipa ri caraj ri Dios. 7Ma ralak na xa ta alak umocom juna achi; e uwari'che, 'ana alak pacha' e ri Kanimajawal Jesucristo ri canimaj alak ruc' ri chac alak. Chacuna c'u alak ri' ruc' ronoje c'u'x alak. 8Eta'am c'u alak c'o rajil uc'axel ri utz caka'ano y wa' e ri Cristo caya'w chikajujunal, tob cachacun jun ruc' juna patrón o xa pa re jun cachacun wi.
9Ec'u ralak ri alak patrón, 'ana alak ri utz chique tak ri mocom alak ma e caraj ri' ri Dios che alak. Maxibij ne alak quipa ruc' c'ax. C'una chic'u'x alak, e ralak alak jela' pacha' rique, ma junam cuc' rique c'o alak puk'ab ri Kanimajawal c'o chila' chicaj. Yey chwach Rire xa jun kawach konoje.#Ro. 2:11
Kachapabej ri to'bal ke uya'om ri Dios
10Q'uisbal c'u re, cambi'ij che alak hermanos, chuk'ubej ib alak chwach ri Kanimajawal Jesucristo ruc' runimal uchuk'ab Rire. 11'Ana c'u e alak che ronoje tak ri to'bal cuya ri Dios#6:11 “Ri to'bal cuya ri Dios”: Pa caxtila wa' cabi'x “la Armadura de Dios” che. Wa' e jun c'ambal na'oj puwi ri to'bal cuya ri Dios chike. Wa' e pacha' tak ri chapabal re juna soldado. che alak cha' jela' cach'ij alak uchuk'ab tak ri socoso'nic re ritzel winak. 12Ma ri'oj oj c'o pa ch'a'oj. Pero wa ch'a'oj na e ta cuc' ticawex quekam culewal quipoklajil, e cuc' tak itzelilaj uxlabixel e c'o xa pa tew, ri lic c'o quichuk'ab re quetakan paquiwi tak ri e c'o pa k'eku'm wara che ruwachulew. Cuc' tak rique ri kach'a'oj. 13Ruma c'u wa', lic chirajawaxic che alak chuc'a'aj alak ronoje tak ri to'bal ke cuya ri Dios, cha' jela' cach'ij alak uchuk'ab tak ri na utz taj cape pawi' alak. Y jec'ula', we xq'uis wa' wa ch'a'oj chi'ij alak, c'a tiquil alak jusuc'.
14E uwari'che lic chuk'ubej ib alak chupa ri K'ijsak jela' pacha' juna aj chac cucoj rupas cha' cuxim rupa chi utz. C'ola alak jusuc' y lic chajij alak ri binic silabic alak jela' pacha' juna soldado ch'ukutal ruwa uc'u'x ruc' jun ch'ich'. 15Xaki yijba' ib alak che utzijoxic ri Utzilaj Tzij re ri utzil chomal jela' pacha' juna soldado xaki ucojom ruxajab re cuto'bej ri rakan che tak ri quic'ow wi. 16Y chwi ronoje tak wa', tiquila chi utz ri cubulibal c'u'x alak ruc' ri Dios, ma wa' che ralak e pacha' ri juperaj ch'ich' ruc'a'am juna soldado puk'ab re cuchup ri ak' c'o chutza'm ri flechas cac'ak lo che. Jec'ula' ri cubulibal c'u'x ralak e to'bal e alak cha' cach'ij alak uchuk'ab tak ri c'akanic cu'an lo ritzel winak che alak. 17Tiquila alak chi utz chupa ri colobetajic ya'tal che alak jela' pacha' juna soldado cucoj rucasco re ch'ukubal rujolom. Y chapabej alak chi utz Ruch'a'tem ri Dios, ma wa' e pacha' juna espada ya'tal che alak ruma ri Ruxlabixel ri Dios cha' cach'o'jin alak chirij ritzel winak. 18'Ana c'u alak orar chipak'ij chichak'ab. Lic tz'onoj alak che ri Dios e chirij janipa ri cubi'ij ri Ruxlabixel che alak. Macos ne alak che u'anic orar; e xaki 'ana alak orar paquiwi conoje rutinamit ri Dios. 19Cantz'onoj co che alak 'ana alak orar panuwi ri'in cha' ri Dios cuya nuch'a'tem y jec'ula' na canxi'ij ta c'ana wib cantzijoj ri Utzilaj Tzij uk'alajisam ri Dios chikawach. 20Ma intakom lo ruma ri Dios, in k'alajisay re ri Utzilaj Tzij y ruma ne wa' in c'o pa presoyil wo'ora. E uwari'che tz'onoj alak che ri Dios cha' na canxi'ij ta c'ana wib che uk'alajisaxic puwi Rire, ma e takal ri' chwe.
Ri Tíquico cuc'am bi urason ri Pablo
21Ronoje tak ri nuc'ulumam y ri quintajin che u'anic, cu'tzijoj pan ri Tíquico che alak. Rire e jun utzilaj aj chac re ri Kanimajawal Jesucristo y na lok' ta c'ax cana'w re. 22E uwari'che nutakom bi chila' uc' alak cha' queta'maj alak sa' ri ka'anom ri'oj y jec'ula' cu'nimarisaj pan c'u'x alak.
Ri Pablo cutz'onoj utzil chomal puwi riglesia c'o Éfeso
23C'ulu alak ri utzil chomal, ri rutzil c'u'xaj y ri cubulibal c'u'xaj, ri petinak ruc' ri Kakaw Dios y ruc' ri Kanimajawal Jesucristo. 24C'ulu c'u alak ri unimal rutzil uc'u'x ri Kanimajawal Jesucristo, onoje alak ri lic c'ax cana' alak Rire ruc' rutzil c'u'xaj na jinta uq'uisic. Amén.
Currently Selected:
Efesios 6: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.