Efesios 3
3
Ruchac ri Pablo cuc' tak ri na e ta aj judi'ab
1Ri'in in Pablo, in c'o pa cárcel ruma xintzijoj rubi' ri Kanimajawal Jesucristo che ralak ri na alak ta aj judi'ab. 2Lic tom chi c'u alak ri chac uya'om ri Dios chwe: Wa' e ri cantzijoj che alak ri unimal rutzil uc'u'x ri Dios. 3Ma ri Dios xuc'ut chinuwach ri na eta'matal ta ojertan, yey puwi wa' nutz'ibam chi pan jubik' che alak. 4We xajilaj alak wa nutz'ibam, camaj alak usuc' sa' ri xk'alajisax chwe puwi ri Cristo. 5Ojertan wa' na k'alajisam ta chiquiwach ri ticawex; no'j wo'ora ruma ri Ruxlabixel ri Dios xk'alajisax chiquiwach ri e tako'n y ri k'alajisanelab echa'tal ruma ri Dios. 6Ruc'u'xibal ri k'alajisam chic e wa': Ri bi'tisim lo ruma ri Dios na xew ta que raj judi'ab, ma que ne ri na e ta aj judi'ab; u'anom c'u xa jun chique y junam coye'em janipa rubi'tisim lo ri Dios chique ri caquicoj ri Utzilaj Tzij re ri Kanimajawal Jesucristo. 7Ruma c'u ri unimal rutzil uc'u'x ri Dios wuc' ri'in, xya'taj chwe xinu'an raj chac ri Cristo re cantzijoj ri Utzilaj Tzij. Y xew c'u ruma ruchuk'ab ri Dios, quel pan chi utz ri chac chwi nuk'ab.
8Ri'in tob lic na jinta co nuwach chiquiwa conoje ri echa'tal ruma ri Dios; na ruc' ta c'u ri', xya'taj chwe rutzijoxic ri Utzilaj Tzij chique ri na e ta aj judi'ab. Cantzijoj c'u chique sa' tak ri chomilaj beyomalil re ri Cristo, ri na jinta ne junok cach'ijow uch'obic ruchomalil tak wa'. 9Y ya'om chwe cank'alajisaj chiquiwach conoje ri ticawex sa' ri uch'obom lo ri Dios, ri x'anaw re ronoje ri c'olic. Cank'alajisaj c'u ri na eta'matal ta lo rojertan, ri c'a e wo'ora quel lo chi sak. 10Ma ri caraj ri Dios wo'ora e cha' ruma riglesia quilitaj chi utz ruq'uiyal tak uwach una'oj Rire chiquiwach tak ri c'o quiwach y ri c'o quichuk'ab, wa' e ri quetakan xa pa tew. 11E janipa c'u ri uch'obom lo ri Dios echiri' c'amaja' ne cu'an ruwachulew, e u'anom ri' ruma ri Jesucristo, ri Kanimajawal. 12Ruma c'u ri Cristo xya'taj chike cojopon chwach ri Dios; lic c'u jiquil uwach, ri Dios cojuc'ul chi utz ruma ri cubulibal kac'u'x ruc' ri Cristo. 13E uwari'che cambi'ij che alak, mapax c'u'x alak ruma wa c'axc'obic in c'o wi, e ne qui'cota alak ma uma ralak na jinta cubi'ij nuc'u'x quinic'ow chupa wa'.
Chojtiquila chi utz chupa ri unimal rutzil uc'u'x ri Dios
14Ruma tak c'u wa', canxuc wib chwach Rukaw ri Kanimajawal Jesucristo, 15ma che ri Kakaw e petinak wi conoje tak ri familia e c'o chila' chicaj cuc' ri e c'o che ruwachulew. 16Cantz'onoj che ri Kakaw cha' e chirij tak ri chomilaj ubeyomalil, cuya lo unimal chuk'ab pa ri anima' alak y jec'ula' cachuk'ubej ib alak ruma ri Ruxlabixel Rire. 17Cantz'onoj che ri Dios cha' cajeki' ri Cristo pa anima' alak ruma ri cubulibal c'u'x alak y catiqui' c'u alak chi utz chupa ri rutzil uc'u'x pacha' juna che' lic naj benak wi ri ratz'ayak. 18Chuya'a c'u che alak junam cuc' conoje ri e re Rire, ri queta'maj alak chi utz ri rutzil uc'u'x ri Cristo cha' jela' camaj alak usuc' janipa runimal uwach, runajtijil rakan, ruchoyil upa y runajtijil uwi' ri rutzil uc'u'x. 19Cheta'maj c'u alak ri unimal rutzil uc'u'x ri Cristo, tob na jinta junok lic cumaj usuc' ronoje wa'. 'Ana c'u e alak che janipa ri utz c'o ruc' Rire cha' cak'alajin tak wa' che ri binic silabic alak. 20Ruma ruchuk'ab ri Dios kuc', Rire cuya más uwi' ronoje ri cakatz'onoj che o ri cakach'obo cu'ano. 21¡Cheta'maxok nim uk'ij ri Dios ruma ri cu'an ruc' ru iglesia ruma ri Kanimajawal Jesucristo! Calok'nimax c'u uk'ij wak'ij ora y chikawach apanok na jinta chi utakexic. Amén.
Currently Selected:
Efesios 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.