TAITO 2
2
Sa vakavulici Taito ko koya e nai vakavuvuli kei nai valavala e dodonu, 1-8. Sa qai tukuna nai valavala e kilikili kei ira kecega era sa tamata lotu, 9-15.
1Ia ko iko, mo tukuna tiko na veika sa kilikili kei nai vakavuvuli dina: 2me ra yalomamakutu ko ira na qase, me ra yaloqaseqase, me ra yalomatua, me vinaka na nodra vakabauta, me ra lomasoli, me ra dauvosota. 3O ira talega na yalewa qase, me ra dauia nai valavala sa kilikili kei ira era sa yalosavasava, me ra kakua ni dauveibeitaki vakailasu, me kakua ni daugunu waini, me ra dauvakatavulica na ka vinaka; 4me ra vakayalomatuataki ira na yalewa era tamata bula, me ra lomani ira na watidra, me ra lomani ira na luvedra, 5me ra lomavuku, me ra lomasavasava, me ra dautiko mai nodratou, me ra yalovinaka, me ra dautalairawarawa vei ira na watidra, me kakua kina ni vosavakacacataki na vosa ni Kalou. 6Vakarota vei ira talega na cauravou me ra yalomatua. 7Ia e na ka kecega mo sai vakarau e na cakacaka vinaka: me kakua ni cala na nomu i vakavuvuli, mo yaloqaseqase, mo yalosavasava; 8mo vosa vakadodonu tiko oqori ena sega ni lewai me ca; me madua kina ko koya sa to tani, ni sa sega na ka ca me da beitaki kina.
9Me ra talairawarawa vei ira na nodra turaga ko ira na tamata, me ra cakava na ka kecega sa vinaka vei ira; ka me ra kakua ni dauvosa tale: 10ka me ra kakua sara ni butako, me ra vakatakilai ira ni ra sa lomadina, ka vinaka; me ra vakarogovinakataka nai vakavuvuli ni Kalou na nodai Vakabula e na ka kecega.
11Ni sa rairai na loloma ni Kalou, o koya sa vu ni bula vei ira kecega na tamata; 12a sa vakavulici keda, me da biuta nai valavala sa sega ni vakalotu, kei na gagadre ca vakavuravura, me da ia nai valavala yalomatua, ka yalododonu, ka vakalotu, e vuravura oqo; 13ni da waraka na ka ni veivakalougatataki eda sa nuitaka, kei na nona rairai vakaiukuuku na Kalou levu na nodai Vakabula ko Jisu Karisito; 14o koya ka soli koya e na vukuda, me voli keda mai nai valavala ca kecega, me vakasavasavataki keda vua me da nona tamata talei, ka lomakatakata e na cakacaka vinaka. 15A veika oqo mo vosataka, ka vakarota, ka veivunauci vakabibi sara. Me kakua e dua me beci iko.
Currently Selected:
TAITO 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific