TANIELA 4
4
Sa tukuna ko Nepukanesa na lewa ni Kalou, 1-3, kei na nona tadra era dredreta ko ira na tamata vuku, 4-8. Sa rogoca na tadra ko Taniela, 9-18, ka sa vakamacalataka, 19-27. Sa yaco sara na tadra, 28-37.
1O Nepukanesa na tui, vei ira na tamata, na lewe ni veivanua, kei ira na dui vosavosa, era tiko e vuravura taucoko; Me vakalevutaki vei kemudou na vakacegu. 2Au sa vaka e vinaka me'u tukuna nai vakatakilakila kei na ka mana sa cakava vei au ko koya na Kalou cecere sara. 3Na kena levu ni nonai vakatakilakila! na kena kaukauwa ni nona ka mana! a nona matanitu na matanitu e sega ni mudu, kei na nona lewa mai nai tabatamata ka yaco ki nai tabatamata.
4Oi au ko Nepukanesa ka'u a tiko vakacegu e na noqu vale, ka'u sa kalougata e na noqu i tikotiko vakatui: 5ka'u a tadrataka e dua na tadra sa vakarerei au, ia na nanuma ni lomaqu e na noqu i mocemoce kei na raivotu ka'u sa raica sa vakidroataki au. 6O koya oqo sa dua kina na noqu lewa ka'u sa vakatura, me ra kau mai kivei au na tamata vuku kecega e Papiloni, ia me ra vakatakila vei au nai balebale ni tadra. 7Sa ra qai curu mai na daucaka mana, kei ira na kai Kalitia, kei ira na dauparofisai vakailasu: ka'u a tukuna vei ira na tadra; ia era sa sega ni vakatakila vei au na kenai balebale. 8A sa curu mai emuri sara kivei au ko Taniela, a yacana ko Pelitisasari, me vaka na yaca ni noqu kalou, ia na yalodra na kalou tabu sa tiko vua: ka'u a tukuna talega vua na tadra, ka kaya,
9I Pelitisasari, na nodra turaga na daucaka mana, ni'u sa kila sa tiko vei iko na yalodra na kalou tabu ka sa sega e dua na ka vuni me dredre vei iko, me tukuna mai vei au na raivotu ni noqu tadra ka'u a raica, kei na kenai balebale. 10Sa vakaoqo na raivotu ka'u a raica e na noqu i mocemoce; au a vakaraica, ka raica, sa dua na kau ka tu e loma i vuravura, ia na kena cecere sa ka vakaidina. 11Sa tubu na kau oqori me kaukauwa, ia na kena cecere sa yala ki lomalagi, ka sa raici mai nai yalayala kei vuravura: 12a drauna sa matavinaka, kei na vuana sa ka levu, a sa tu kina na kakana e rauta kecega: sa vakaruru e rukuna na manumanu ni vanua, sa ro talega e na tabana na manumanu vuka, a sa kana kina na ka kecega sa bula. 13Au a raica e na raivotu, e na noqu i mocemoce, ka raica, sa dua nai vakatawa ka yalosavasava sa lako sobu mai lomalagi; 14sa kaci vakadomoilevu ko koya, ka vaka, Taya sobu na kau, ka taya laivi na tabana, kurea na drauna, ka duibiubiuta na vuana: me lako tani na manumanu mai na rukuna, kei na manumanu vuka mai na tabana: 15ia na vu ni wakana me laivi tu ga e na qele, ka me sa vauci e na wa aironi ka parasa, ki na veico ni vanua; me sa suasua talega e na tegu ni lomalagi, ia me sa votai vata ko koya kei ira na manumanu e na co ni qele: 16me kakua tiko vua na yalo ni tamata, ia me solia vua na yalo ni manumanu; ka me oti mada vua e vitu na gauna. 17Ni sa nodra lewa oqo ko ira nai vakatawa; kei na taro e na nodra vosa na yalosavasava: me ra kila kina ko ira sa bula ni sa lewa ko Koya sa Cecere sara e na matanitu ni tamata, ka sa solia vua sa lomana kina, ia na tamata wale sa lesia ko koya me lewa kina. 18A tadra oqo ka'u a raica koi au, ko Nepukanesa na tui. Ia ko iko, Pelitisasari, mo tukuna mai na kenai balebale, ni ra sa sega ni rawata ko ira kece na tamata vuku e na noqu matanitu me vakatakila vei au na kenai balebale: ia ko sa rawata ga, ni sa tiko vei iko na yalodra na kalou tabu.
19Ia ko Taniela, na yacana ko Pelitisasari, sa qai kidacala tiko ka dua na tiki-ni-siga, ia sa kidroa ko koya e na nanuma ni lomana. Sa qai kaya na tui vei Pelitisasari, mo kakua ni kidroa e na tadra, se na kenai balebale. Sa vosa ko Pelitisasari, ka kaya, Noqu turaga, me yacovi ira sa cati kemuni na tadra oqo, kei na kenai balebale, vei ira na nomuni meca. 20Na kau ko ni a raica ka tubu me kaukauwa, ka sa yala ki lomalagi na kena cecere, ka sa raici e vuravura taucoko; 21ka sa matavinaka na drauna, ka sa levu na vuana, ka sa tiko kina na kakana sa rauta kece; ka sa tiko na manumanu ni vanua e rukuna, ka sa ro talega e na tabana, na manumanu vuka: 22sai kemuni na tui, ka sa tubu me kaukauwa mai: ni sa tubu na kemu levu, ka sa yala ki lomalagi, kei na nomuni lewa, sa yaco ki nai yalayala kei vuravura. 23Ka ni sa raica na tui ni sa dua nai vakatawa ka yalosavasava sa lako sobu mai lomalagi, ka kaya, Taya sobu na kau, ka vakarusa; ia na vu ni wakana me tu ga e na qele, ka me sa vauci kina e na wa aironi ka parasa, ki na veico ni vanua; ka me sa suasua e na tegu ni lomalagi, ia me sa votai vata ko koya kei ira na manumanu ni vanua e na co ni qele: ka me oti mada vua e vitu na gauna; 24sa vakaoqo, kemuni na tui, na kenai balebale, ka sa vakaoqo na lewa i Koya sa Cecere sara, sa yacovi koya na noqu turaga na tui: 25Ia era na vakasavi kemuni tani mai vei ira na tamata, ia kemuni na tiko vata kei ira na manumanu, ka ra na vakani kemuni e na co me vaka ko ni sa pulumokau, ia kemuni na suasua e na tegu ni lomalagi, ka me oti mada vei kemuni e vitu na yabaki, mo ni kila mada kina ni sa lewa ko Koya sa Cecere sara e na matanitu ni tamata, ka sa solia vua sa lomana kina. 26Ia ni ra a vakarota me laiva tu ga na vu ni waka ni kau; ena vakataudeitaki vei kemuni na nomuni matanitu, ni kemuni sa kila oti mada ni sa lewa ko lomalagi. 27O koya oqo, na tui, me vinaka kina vei kemuni na noqu i vakavuvuli, ia mo ni muduka mada na nomuni valavala ca ka me kenai sosomi nai valavala dodonu, kei na nomuni caka cala me vakaisosomitaki e na loloma vei ira na dravudravua; de vakadedetaki kina na nomuni tiko vinaka.
28Sa yaco kece na ka oqo vei Nepukanesa na tui. 29Sa oti mada e tinikarua na vula sa qai gade voli ko koya e na vale levu ni matanitu vaka-Papiloni. 30Ka sa kaya na tui, Sa sega beka ni ko Papiloni levu oqo, ka'u sa tara koi au me vale levu ni matanitu e na noqu kaukauwa levu, ka me sa rogo kina na noqu lagilagi? 31Ni sa vosataka tiko na vosa oqo ko koya na tui, sa dua na domo sa rogo mai lomalagi, ka kaya, Sa tukuni vei iko, Nepukanesa na tui, Ni sa qai suka tani vei iko na nomu matanitu: 32ia era na vakasavi iko tani mai vei ira na tamata, ia ko na tiko kei ira na manumanu ni vanua era na vakani iko e na co, me vaka na pulumokau, ka me oti mada vei iko e vitu na gauna, mo kila mada kina ni sa lewa ko Koya sa Cecere sara e na matanitu ni tamata, ka sa solia vua sa lomana kina.
33E na tiki-ni-siga ko ya sa yaco na ka oqori vei Nepukanesa: ia sa vakasavi tani kina ko koya mai vei ira na tamata, ka sa kana co, me vaka na pulumokau, ka sa suasua talega na yagona e na tegu ni lomalagi, ia na drau ni uluna sa tubu me vaka na lawe ni ikeli, kei na nonai taukuku me vaka nai qaso ni manumanu.
34Ni sa oti na kena gauna, koi au ko Nepukanesa, ka'u a ta cake ki lomalagi, ia sa lesu tale mai vei au na lomaqu, ka'u a qai vakavinavinakataki Koya sa Cecere sara, io ko koya sa bula ka sega ni mudu ka'u a vakacaucautaka ka vakarokorokotaka, ia sa sega ni mudu na nona lewa, kei na nona matanitu mai nai tabatamata ka yaco ki nai tabatamata: 35ia na kai vuravura kecega sa nanumi me ra ka wale: ka sa cakava na ka e vinakata ko koya e na kedra maliwa nai vavakoso vakalomalagi, kei ira talega na kai vuravura: ka sa sega e dua e vakadaroya rawa na ligana, se kaya vua, A cava ko sa cakava? 36E na gauna ko ya sa lesu tale mai vei au na lomaqu; ia me rogo kina na noqu matanitu, sa lesu mai vei au na noqu lagilagi kei na noqu serau; ka ra sa mai qaravi au tale ko ira na noqu lewe ni bose, kei ira na noqu tamata turaga; ia ka'u a vakataudeitaki tale e na noqu matanitu ka sa vakaikuritaki vei au na ka vakaturaga sa uasivi cake.
37Ia koi au ko Nepukanesa ka'u sa qai vakavinavinakataka ka vakalevulevuya ka vakarokorokotaka na Tui kei lomalagi, ni sa dinadina kecega na nona cakacaka, ka sa dodonu na nonai valavala: ia ko ira era viavialevu voli sa rawa vua me vakamalumalumutaka.
Currently Selected:
TANIELA 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific