TANIELA 3
3
Ko Nepukanesa, sa bulia e dua na matakau koula mai Tura, 1-7. Sa beitaki ko Setareki, kei Mesaki, kei Apeti-niko e na nodratou sega ni cuva sobu ki na matakau, 8-12. Ni sa vosa vakacudrucudruya vei iratou na tui, eratou sa vakatusa vinaka na Kalou dina, 13-18. Eratou sa biu ki loma ni bukawaqa, 19-23. Sa vakabulai iratou na Kalou, ia ko Nepukanesa, ni sa raica na cakacaka ni Kalou, sa vakavinavinaka vua, 24-30.
1O Nepukanesa na tui sa cakava e dua na matakau koula, na kena cecere sa onosagavulu na kiupiti, na kena rabailevu sa ono na kiupiti: ka sa vakaduria ko koya e na buca ko Tura, e na yasana vaka-Papiloni. 2Sa qai talaki ko Nepukanesa na tui me ra vakasoqoni ira vata na turaga lelevu, kei ira na kovana, kei ira na kapiteni, kei ira na turaga-ni-lewa lelevu, kei ira na dau ni yau, kei ira na lewe ni bose, kei ira na vu-ni-vunau, kei ira kece na turaga ni veitikina, me ra lako mai ki na kena veibuli na matakau sa vakaduria ko Nepukanesa na tui. 3Sa ra qai soqoni vata na turaga lelevu, kei ira na kovana, kei ira na kapiteni, kei ira na turaga-ni-lewa, kei ira na dau ni yau, kei ira na lewe ni bose, kei ira na vu-ni-vunau, kei ira kece na turaga ni veitikina, ki na kena veibuli na matakau sa vakaduria ko Nepukanesa na tui; ka ra sa mai tu e na mata ni matakau sa vakaduria ko Nepukanesa.
4Sa qai dua na matanivanua sa kacivaka vakadomoilevu, ka vaka ne, Sa vakaroti vei kemudou, koi kemudou na tamata, na lewe ni veivanua, kei na dui vosavosa, 5ni dou sa rogoca na domo ni koneti, na bitu-ni-vakatagi, na api, na lali e vakawa, na soliteri, na pakipaipi, kei na ka kecega sa rogo vinaka, mo dou qai cuva sobu ka vakarokoroko ki na matakau koula sa vakaduria ko Nepukanesa na tui: 6ia ko koya sa sega ni cuva sobu ka vakarokoroko ena biu ga e na tiki-ni-siga ko ya ki na loma ni lovo ni bukawaqa. 7O koya oqo e na tiki-ni-siga ko ya, ni ra rogoca na tamata kecega na domo ni koneti, na bitu-ni-vakatagi, na api, na lali e vakawa, na soliteri, kei na ka kecega sa rogo vinaka, era sa qai cuva sobu kece na tamata, na lewe ni veivanua, kei na dui vosavosa, ka ra sa vakarokoroko ki na matakau koula sa vakaduria ko Nepukanesa na tui.
8E na tiki-ni-siga ko ya era sa qai toro mai eso na kai Kalitia, ka beitaki ira na Jiu. 9Era kaya vua na tui ko Nepukanesa, Mo ni bula, na tui, ka sega ni mudu. 10Kemuni, na tui, ko ni a vakarota vei ira kece na tamata ni ra rogoca na domo ni koneti, na bitu-ni-vakatagi, a api, na lali e vakawa, na soliteri kei na pakipaipi, kei na ka kecega sa rogo vinaka, me ra cuva sobu ga ka vakarokoroko ki na matakau koula: 11ia ko koya sa sega ni cuva sobu ka vakarokoroko, me biu ga ki na loma ni lovo ni bukawaqa. 12Ia sa so na Jiu ko ni sa lesia me ra vakaitavi e na cakacaka ni yasana vaka-Papiloni, ko Setareki, kei Mesaki, kei Apeti-niko; ko iratou na tamata oqo eratou sa sega ni vakarorogo vei kemuni, na tui: ka ni ratou sa sega ni qarava na nomuni kalou, ka sega talega ni vakarokorokotaka na mataka koula ko ni sa vakaduria.
13Sa qai cudru ka nini ko Nepukanesa ka sa vakarota me ra kauti iratou mai ko Setareki, kei Mesaki, kei Apeti-niko. Sa ra qai kauti iratou mai na tamata oqo vua na tui. 14Sa qai kaya vei iratou ko Nepukanesa, Sa ka dou a nakita, Setareki, kei Mesaki, kei Apeti-niko, ni dou a sega ni qarava na noqu kalou, ka ni dou a sega ni vakarokoroko ki na matakau koula ka'u sa vakaduria? 15Dou rogoca mada, kevaka dou na vakarau tu e na tiki-ni-siga dou na rogoca kina na domo ni koneti, na bitu-ni-vakatagi, na api, na lali e vakawa, na soliteri, na pakipaipi, kei na ka kecega sa rogo vinaka, mo dou cuva sobu ka vakarokoroko ki na matakau ka'u sa cakava, sa vinaka: ia, kevaka dou na bese ni vakarokorokotaka, e na tiki-ni-siga ko ya dou na biu ga ki na loma ni lovo ni bukawaqa; ia ko cei na kalou ko ya me na vakabulai kemudou mai na ligaqu?
16Eratou sa qai vosa ko Setareki, kei Mesaki, kei Apeti-niko, ka kaya vua na tui, Kemuni Nepukanesa, sa sega ni yaga vei keitou me keitou vosa vei kemuni e na ka oqo. 17Ke sa vakaoqori, ko koya na neitou Kalou o koya keitou sa qarava sa rawata me vakabulai keitou mai na lovo ni bukawaqa, ia ena vakabulai keitou mai na ligamuni, na tui. 18Ia ke sega, mo ni kila, koi kemuni na tui, ni keitou sa bese ni qarava na nomuni kalou, keitou sa bese talega ni vakarokoroko ki na matakau koula ko ni sa vakaduria.
19Sa qai cudru vakalevu sara ko Nepukanesa, ia sa dua tani mai nai tovo ni matana vei Setareki, kei Mesaki, kei Apeti-niko: ka sa vakarota ko koya, me vakatakatataki na lovo me uasivi cake vakavitu na kena daukatakata. 20Ia sa kaya ko koya vei ira eso era tamata qaqa sara e na nonai valu me ra vesuki Setareki, kei Mesaki, kei Apeti-niko, ka biuta ki na lovo ni bukawaqa. 21Sa ratou qai dui vauci vata na tamata oqo kei na nodratou i curucuru, kei na nodratou i sulu eloma, kei na nodratou i sala, kei na nodratou i sulu eso, a ratou sa biu ki loma ni lovo ni bukawaqa. 22Ia ni sa dua tani na vosa ni tui, ka sa katakata vakalevu sara na lovo, sa ra mate e na yameyame ni bukawaqa ko ira na tamata era biuti iratou kina ko Setareki, kei Mesaki, kei Apeti-niko. 23Ia ko iratou na tamata tolutolu oqo, ko Setareki, kei Mesaki, kei Apeti-niko, sa lutu sobu ki na loma ni lovo ni bukawaqa ka vesuki tu.
24Ia sa qai kidacala ko Nepukanesa na tui, ka sa tu cake vakasauri mai, ka kaya vei ira na nona lewe ni bose, Eda a sega li ni biuta e lewe tolu na tamata ka vesu tu ki na loma ni bukawaqa? Era kaya vua, Sa dina saka ga na tui. 25Sa qai kaya tale ko koya, Raica, au sa kunea e lewe va na tamata sa sereki tu, ka ratou lako voli tiko e loma ni bukawaqa, ka sa sega na ca e yacovi iratou; ia na kenai rairai ni kenai kava sa vaka na luve ni Kalou. 26Sa qai toro mai ko Nepukanesa ki na gusu ni lovo ni bukawaqa, ka kaya ko koya, I Setareki, kei Mesaki, kei Apeti-niko, oi kemudou na tamata ni Kalou cecere, dou curu mada ki tuba ka lako mai ki ke. Sa qai curu mai ko Setareki, kei Mesaki, kei Apeti-niko mai na loma ni bukawaqa. 27Ka ra sa soqoni mai ko ira na turaga lelevu, na kovana kei na kapiteni, kei ira na nona lewe ni bose na tui, ka ra sa vakaraici iratou na tamata oqo, sa sega ni kama na yagodratou e na bukawaqa, se coro e dua na drau ni uludratou, se dua tani mai na nodratou i curucuru, se boici vei iratou nai boiboi ni bukawaqa.
28Sa qai kaya ko Nepukanesa, Me vakacaucautaki ko koya na Kalou i Setareki, kei Mesaki, kei Apeti-niko, o koya sa tala mai na nona agilose, ka vakabulai iratou na nona tamata eratou sa vakararavi vua, ka sa vakatanitaka na vosa ni tui, ka sa bese ni solia na yagodratou, me qarava se vakarokoroko vua e dua tale na kalou, na nodratou Kalou duaduaga. 29O koya oqo sa dua kina na noqu lawa ka'u sa vakatura, ka vaka, Ko ira na tamata, se na vanua, se ko ira na duivosavosa kecega, sa na vosavakacacataka na Kalou i Setareki, kei Mesaki, kei Apeti-niko, era na tavai bulabula, ia na nodra veivale ena caka mei benubenu: ni sa sega tale na Kalou sa rawata me ia na veivakabulai vakaoqo. 30Ia sa qai vakayacori Setareki, kei Mesaki, kei Apeti-niko ko koya na tui e na yasana vaka-Papiloni.
Currently Selected:
TANIELA 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific