Khalaatiya 3
3
Naas Khalaatiya khilto
1Ya naas Khalaatiya al-mataamiis ! Be kalaam waadih bilheen fassarna leeku moot Isa al-Masiih fi l-saliib. Wa hassaʼ naadum sawwa leeku sihir walla ? 2Nidoor nasʼalku cheyy waahid. Al-Ruuh al-Khudduus nazal foogku achaan intu taabaʼtu churuut al-Tawraat, walla achaan simiʼtu bichaarat al-Masiih wa aamantu beeha ? 3Bigiitu mataamiis marra waahid walla ? Wakit badeetu fi derib Allah, khatteetu baalku fi gudrat al-Ruuh al-Khudduus. Laakin hassaʼ tidooru tikammuluuh be gudra insaaniiye walla ? 4Kulla cheyy al-ichtuuh, da bala faayde walla ? Ma mumkin da bala faayde.
5Fakkuru foogah. Allah yinazzil foogku al-Ruuh al-Khudduus be gudra wa yisawwi ajaayib fi usutku maala ? Achaan titaabuʼu churuut al-Tawraat walla achaan simiʼtu bichaarat al-Masiih wa aamantu beeha ?
Barakat Ibraahiim
6Fakkuru fi Ibraahiim. Maktuub : <Hu aaman be kalaam Allah wa fi chaan iimaanah, Allah jaʼalah naadum saalih.>#3:6 Al-kalaam da talgooh fi Takwiin 15:6. 7Wa min al-kalaam da, aʼarfu kadar al-naas al-bigo muʼminiin, humman bas iyaal Ibraahiim. 8Wa min awwal al-Kitaab buguul kadar Allah yajʼal al-naas al-ma Yahuud saalihiin be sabab iimaanhum. Wa ballakh al-bichaara di le Ibraahiim wa gaal : <Be sababak inta, kulla l-gabaayil yalgo baraka.>#3:8 Al-kalaam da talgooh fi Takwiin 12:3. 9Wa be misil da, al-naas al-karabo al-iimaan, humman yalgo baraka maʼa Ibraahiim al-muʼmin.
Churuut al-Tawraat yijiibu al-laʼana
10Wa kulla l-naas al-ankarabo fi tabbigiin churuut al-Tawraat, al-laʼana gaaʼide fooghum. Achaan maktuub fi l-Kitaab kadar ayyi naadum al-ma yitaabiʼ al-kalaam al-maktuub fi l-Tawraat kulla ke wa ma yitabbigah tamaam, hu malʼuun. 11Akiid kadar ma fi naadum yabga saalih giddaam Allah be tabbigiin churuut al-Tawraat. Wa achaan da, maktuub : <Be iimaanah, al-saalih yahya.>#3:11 Al-kalaam da talgooh fi Habaguug 2:4. 12Laakin churuut al-Tawraat ma bukhussu al-iimaan. Be l-aks, bukhussu amal al-naas. Achaan maktuub : <Al-naadum al-yitabbig kulla l-churuut dool yahya beehum.>#3:12 Al-kalaam da talgooh fi Laawiyiin 18:5.
13Laakin al-Masiih fadaana min al-laʼana al-jaaye min al-Tawraat. Hu zaatah bigi malʼuun fi chaanna. Achaan al-Kitaab buguul : <Ayyi naadum al-muʼallag foog fi l-hatab, hu malʼuun.>#3:13 Al-kalaam da talgooh fi Tasniya 21:23. 14Wa bigi misil da, achaan be l-Masiih Isa al-baraka al-Allah waaʼad beeha Ibraahiim taji fi l-naas al-ma Yahuud kula. Wa khalaas be sabab al-iimaan, Allah yinazzil foogna kullina al-Ruuh al-Khudduus al-hu waaʼad beyah al-naas.
Waʼad Allah wa churuut al-Tawraat
15Ya akhwaani, nantiiku masal fi l-cheyy al-yisawwuuh al-naas. Kan naaseen induhum muʼaahada wa astafago fi cheyy waahid wa mado foogah khalaas, ma fi naadum al-yagdar yibattilah walla yiziid foogah cheyy. 16Zeen. Allah waaʼad Ibraahiim wa l-yaji min zurriiytah. Wa l-Kitaab ma buguul : «al-yaju min zurriiytak» yaʼni naas katiiriin, laakin buguul : «al-yaji min zurriiytak» yaʼni naadum waahid. Wa hu al-Masiih. 17Daahu al-cheyy al-nidoor niʼooriiku beyah. Allah sawwa muʼaahada maʼa Ibraahiim wa baʼad 430 sana, kitaab al-Tawraat ja laakin churuut al-Tawraat ma battalo al-waʼad wa la nagado al-muʼaahada al-Allah zaatah sawwaaha. 18Achaan kan al-naas ma ligo al-baraka al-Allah waaʼad beeha Ibraahiim illa kan yitaabuʼu churuut al-Tawraat, al-baraka ma taji be sabab al-waʼad. Laakin aniina naʼarfu kadar hu antaaha le Ibraahiim be waʼad bas.
Hadaf churuut al-Tawraat
19Wa kan ke da, maala Allah nazzal al-Tawraat le Muusa ? Allah zaad le juduudna al-Tawraat be kulla churuutah be sabab zunuub al-naas. Wa dawwar al-naas yitaabuʼu churuut al-Tawraat lahaddi al-naadum al-min zurriiyit Ibraahiim al-Allah waaʼadah be l-baraka yaji. Wa l-Tawraat da, al-malaaʼika nazzalooh fi iid wasiit wa hu Muusa. 20Laakin kan fi jaanib waahid bas, ma fi waasita. Wa Allah hu waahid.
21Al-Tawraat yikhaalif waʼad Allah walla ? La, abadan. Kan awwal al-naas yagdaro yalgo al-haya al-abadiiye be tabbigiin churuut al-Tawraat al-Allah antaahum, khalaas humman yabgo saalihiin be l-churuut dool. 22Laakin fi l-Kitaab, Allah gaal kadar kulla l-naas gaaʼidiin tihit hukum al-zanib wa ma yagdaro yamurgu minnah. Wa bigi misil da achaan Allah indah niiye yanti le l-muʼminiin bas al-baraka al-hu waaʼad beeha be sabab iimaanhum be Isa al-Masiih.
23Gubbaal al-iimaan ma yaji, aniina misil masaajiin wa churuut al-Tawraat humman misil al-haras al-gaaʼid foogna lahaddi Allah bayyan leena derib al-iimaan. 24Be misil da, al-Tawraat gaaʼid yiraakhib foogna lahaddi l-Masiih yaji achaan nabgo saalihiin be l-iimaan. 25Wa hassaʼ zaman al-iimaan ja khalaas wa churuut al-Tawraat ma yiraakhubu foogna battaan.
26Achaan intu kulluku iyaal Allah fi Isa al-Masiih be derib al-iimaan. 27Kulluku achtaraktu maʼa l-Masiih wa be l-khattisiin, intu anrabattu maʼaayah. 28Wa hassaʼ ma fi farig been al-Yahuudi wa l-ma Yahuudi, wa la been al-abid wa l-hurr, wa la been al-raajil wa l-mara, laakin kulluku waahid fi l-Masiih Isa. 29Wa kan intu naas hana l-Masiih, khalaas intu kula min zurriiyit Ibraahiim wa tawrusu al-baraka al-Allah waaʼadah beeha.
Currently Selected:
Khalaatiya 3: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.